ނަޝީދުގެ މައްސަލައިގައި ފާޑުކިޔާނެ ޖާގައެއް ނެތް: ރޮޒައިނާ
މިދިޔަ މެއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ނުރައްކާތެރި ހަމަލާގެ ތަޙްގީޤް ދަނީ ރަނގަޅަށްކަން ގަބޫލު ކުރަން ޖެހޭ ކަމަށާއި އެކަމުގައި ފާޑުކިޔާނެ ޖާގައެއް ނެތްކަމަށް ރައްޔިތުންގެ މަޖިލީހުން އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެެވެ.
ރޮޒެއިނާ މި ފަދައިން ވިދާޅުވީ ސަންގު ޓީވީގެ މިރޭގެ "ޚަބަރަށް ފަހު" ޕްރޮގްރާމްގައި ވާހަކަދައްކަވަމުންނެވެ.
"ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާގެ ތަޙްގީޤް ދަނީ ރަނގަޅަށް. އަޅުގަނޑުމެން ގަބޫލު ކުރަން ޖެހޭ ތަޙްގީޤް ރަނގަޅަށޭ ދަނީ. އެތަހްގީގުގައި އެބަ ބައިވެރިވޭ ދުނިޔޭގެ ބޮޑު ތިން ގައުމުގެ ޕްރޮފެޝަނަލްސް." ރޮޒައިނާ ވިދާޅުވިއެވެ،
ރޮޒައިނާ ވިދާޅުވީ ހަމަލާ ދިނުމުގައި ސީދާ ބައިވެރިވީ މީހުން ހައްޔަރު ކޮށްފައިވާކަމަށާއި އެހެންވީމާ ކަންކަން ގޯސް ނޫން ކަމަށެވެ. އަދި ތަހްގީގު ކުރިއަށް ދަނީ ރައީސް ނަޝީދުގެ ފަރާތުން މަންދޫބެއްގެ ހާޒިރުގައިކަމަށާއި އޭނާ ވެސް މިއިން ކަމެއް ގޯސްކޮށް ދާކަމަށް ފާހަގަކޮށްފައި ނުވާ ކަމަށް ރޮޒައިނާ ވިދާޅުވިއެވެ.
"އެކަމުގައި ސީދާ އިންވޯލްވް ވި ހަމަ ހުރިހާ މީހުންގެ އެތިބީ ހައްޔަރު ކުރެވިފަ. އެހެންވީމަ ކަންކަން ގޯހެއް ނޫނޭ. ޕީޖީ ވެސް އެ ވިދާޅުވީ ހަމަ ރަނގަޅަށް ޓައިމްލީކޮށް އެބަދެޔޭ. ބޭރުގެ ފަރާތްތަކުން ވެސް އެބަ ގަބޫލު ކުރޭ އެކަން ރަނގަޅަށް އެބަދޭކަން. ދެން ރައީސް ނަޝީދު ފަރާތުން ހުންނަވާ މަންދޫބެއް އެބަހުންނަވާ. އެބޭފުޅާ ވެސް މިއިން އެއްވެސް ކަމެއް ގޯސްކޮށް ދާކަމަށް ފާހަގައެއް ނުކުރައްވާ" ރޮޒައިނާ ވިދާޅުވިއެވެ.
ރައީސް ނަޝީދަށް އަމާޒުކޮށްގެން ދިން ޓެރަރިސްޓް ހަމަލާއާ ގުޅިގެން 4 މީހަކު ހައްޔަރުކޮށް އެމީހުންނާ މެދު ދައުވާކުރަން ޕްރޮސެކިއުޓަރ ޖެނެރަލް ދަނީ މަސައްކަތް ކުރައްވަމުންނެވެ.
މީގެ އިތުރުން ރައީސް މުޙައްމަދު ނަޝީދަށް އަމާޒުކޮށް މެއި 6 ވަނަ ދުވަހު ދިން ހަމަލާ ދޭން އިރުޝާދު ދިން މީހާ ކަމުގައިވާ ހއ. ހޯރަފުށީ އަލަނާސިގޭ މުހައްމަދު ތަސްނީމް ހައްޔަރުކޮށް ތަހްގީގު ކުރިއަށް ގެންދިޔަ އިރު މިމީހާއަކީ 2017 ވަނަ އަހަރު ބޮމެއް ހަދަމުން ދަނިކޮށް އޭޕްރީލް 24 ވަނަ ދުވަހު ހައްޔަރުކޮށްފައިވާ މީހެއް ކަމަށާއި 4 އޮކްޓޯބަރު 2018 ގައި އޭނާގެ މައްސަލަ ޝަރީއަތަށް ހުށަހަޅައިފައި ވަނިކޮށް ދޫކޮށްލައިފައިވާ ކަމަށް ފުލުހުން ވިދާޅުވިއެވެ.
