އަދުހަމްއާ އެކު ދައުލަތުން އެއްބަސްވުމެއް ހަދައި 23 އަހަރުގެ ހުކުމަކަށް އެއްބަސްވެއްޖެ

ކުރީގެ ރައީސް މުޙައްމަދު ނަޝީދުއަށް އަމާޒުކޮށް ދިން ނިރުބަވެރި ހަމަލައިގައި ބޮން ގޮއްވައިލި އަހުމަދު އަދުހަމް ރަޝީދާ އެކު ދައުލަތުން އެއްބަސްވުމެއް ހަދައި އޭނާގެ މައްޗަށް 23 އަހަރުގެ ޖަލު ހުކުމަކަށް އެއްބަސްވެއްޖެއެވެ.

Ads by MWSC

އަދުހަމަކީ މެއި ހަ ވަނަ ދުވަހުގެ ރޭ ރައީސް ނަޝީދު އަވަހާރަ ކޮށްލަން އަމާޒުކޮށް ހަމަލާ ދިނުމަށް ޓަކައި އަތަމާ ޕެލަސްގެ ގޯޅިތެރޭ ހުރެގެން ބޮން ގޮއްވައިލި މީހާއެވެ. އޭނާ ހުރީ ޖާނުން ފިދާވެގެން ވެސް އެ ހަމަލާ ދިނުމަށް ތައްޔާރަށް ކަމަށް ތަހުގީގަށް ވަނީ އެނގިފައެވެ.

ޕްރޮސެކިއުޓާ ޖެނެރަލް (ޕީޖީ) ހުސެއިން ޝަމީމް މިހާރު ކުރިއަށްގެންދާ ނޫސްވެރިންގެ ބައްދަލުވުމުގައި ވިދާޅުވީ މި ހަތަރު މީހުންގެ މައްޗަށް ޖުމްލަ 13 ދައުވާއެއް އުފުލައި ކޯޓަށް ފޮނުވައިފައިވާ ކަމަށެވެ.

އަދުހަމްގެ މައްޗަށް ދައުލަތުން އުފުލައިފައި ވަނީ ހަތަރު ދައުވާއެކެވެ. އެއީ ޓެރަރިޒަމްގެ އަމަލެއް ކުރުމުގެ ކުށުގެ ދައުވާއާއި ޓެރަރިޒަމްގެ އަމަލެއް ކުރަން ރޭވުމުގެ ކުށުގެެ ދައުވާއާއި ޓެރަރިސްޓް ޖަމާއަތަކަށް ތާއީދުކުރުމުގެ ކުށުގެ ދައުވާއާއި ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްދުގައި މީހަކު މަރައިލާން އުޅުމުގެ ކުށުގެ ދައުވާއެވެ.