ސިޔާސީ ޕާޓީތަކުގެ ލީޑަރޝިޕްގައި ތިއްބަވަނީ އެއްބަޔަކު، ޖޭޕީން ވަކިވެ އައު ޕާޓީއެއް އުފެއްދީ އެހެންވެ: ނާޒިމް
ސިޔާސީ ޕާޓީތަކުގެ ލީޑަރޝިޕްގައި އަބަދުވެސް ތިއްބަވަނީ އެއްބަޔަކު ކަމަށާއި، ޖުމްހޫރީ ޕާޓީން ވަކިވެ، އަމިއްލަ ޕާޓީއެއް އުފެއްދެވުމަށް ނިންމެވީ، އެ ސަބަބާ ހުރެ ކަމަށް ދަނގެތީ ދާއިރާގެ މެންބަރު ކާނަލް މުޙައްމަދު ނާޒިމް ވިދާޅުވެއްޖެއެވެ.
އޮންލައިން ނޫހެއް ކަމަށްވާ "އަދަދު"އަށް ދެއްވި އިންޓަރވިއުއެއްގައި ނާޒިމް ވިދާޅުވީ، ރާއްޖޭގެ ސިޔާސީ ޕާޓީތަކުގައި އިތުރު ބަޔަކަަށް ފުރުސަތު ނެތް ކަމަށެވެ. މިގޮތުން ޒުވާނުންނަށް ލީޑަރޝިޕުން ފުރުސަތު އޮތީ ކޮން ޕާޓީއެއްގައިތޯ ނާޒިމް ވަނީ ސުވާލު އުފައްދަވައިފައެވެެ. ނާޒިމް ވިދާޅުވީ، އެ ބޭފުޅުން ހައްދަވަން މަސައްކަތް ކުރައްވާ ޕާޓީގެ ލީޑަރޝިޕްގައި އެންމެ ގިނަ ވެގެން ތިބެވޭނީ ދެ ދައުރުގައި ކަމަށެވެ.
"ކޮން ޕާޓީއަކުން ޒުވާނުންނަށް ޕާޓީގެ ލީޑަރޝިޕަށް ފުުރުސަތު އޮތީ. ކޮންމެ ޕާޓީއަކަށް ވެސް 15 އަހަރު 10 އަހަރު ވެގެން ދިޔައިރު ވެސް އެ ތިބީ އެއް ބައެއް. އެކަމަކު އަޅުގަނޑުމެން ޕާޓީގެ ގަވަނެންސްގައި ގެންނާނެ ބަދަލަކީ، މި ޕާޓީގައި ލީޑަރޝިޕްގައި އެންމެ ގިނަ ވެގެން ބޭފުޅަކަށް ހުންނެވޭނީ ދެ ދައުރޭ، ކޮންމެ އިންތިޚާބަކީ އެހެން ޕާޓީއަކުން މޮނިޓަރކޮށްގެން ބޭއްވޭ އިންތިޚާބަކަށް ހަދާނަން." ނާޒިމް ވިދާޅުވިއެވެ.
ޑިފެންސް މިނިސްޓަރުކަން ވެސް ކުރެއްވި ނާޒިމާއި ކުރީގެ ޕޮލިސް ކޮމިޝަނަރު އަބްދުﷲ ރިޔާޒާއި ރައްޔިތުންގެ މަޖިލީހުގެ ތިން މެމްބަރަކު ގުޅިވަޑައިގެން މޯލްޑިވްސް ނެޝަނަލް ޕާޓީ (އެމްއެންޕީ)ގެ ނަމުގައި ޕާޓީއެއް އުފެއްދުމުގެ މަސައްކަތް ދަނީ ކުރައްވަމުންނެވެ. ނާޒިމް ވިދާޅުވީ، އެބޭފުޅުން މަސައްކަތް ކުރައްވަނީ މެދުމިނުގެ ފިކުރެއް އުފެއްދެވުމަށް ކަމަށެވެ.
"މި ފިކުރު އެހެން ޕާޓީތަކުގެ ފިކުރާ ތަފާތުވާނެ. އަޅުގަނޑުމެން އިސްލާމް ދީނުގައި ސާބިތުކަމާ އެކު ތިބުން އެއީ އެއްކަން. ދެން އަޅުގަނޑުމެންނަކީ ވަރަށް މެދުމިނުގެ ސިޔާސަތުތަކެއް ކޮންމެ ކަމެއްގައި ގެންގުޅޭ. އަޅުގަނޑުމެންނަކީ އިޤްތިޞާދުގައި ވަރަށް ހުޅުވައިލެވިގެން މަސައްކަތް ކުރެވޭ ބައެއް. އަދި އަޅުގަނޑުމެންނަކީ ޓެކްނޮލޮޖީއާ ރައްޓެހި، ޑިޖިޓަލައިޒްޑް ގޮތަކަށް މަސައްކަތް ކުރާނެ ބައެއް. ހަމަ އެއާ އެކީގައި ޒުވާނުންނަށް ހަމަހަމަ ކަމާއެކު ފުުރުސަތުތައް ހުޅުވާލެވިގެން މަސައްކަތް ކުރާ ޕާޓީއެއްގެ ގޮތުގައި އަޅުގަނޑުމެން މަސައްކަތް ކުރާނީ." ނާޒިމް ވިދާޅުވިއެވެ.
ނާޒިމް ވިދާޅުވީ، އޭނާ 2018 ވަނަ އަހަރު ޖުމްހޫރީ ޕާޓީއާ ގުޅިވަޑައިގެން ރައްޔިތުންނަށް ޚިދުމަތް ކުރެއްވުމަށް މަަސައްކަތްތަކެއް ކުރެވުނު ކަމަށެވެ. އެހެން ނަމަވެސް އައު ޕާޓީއެއް އުފެއްދެވީ ޖުމްހޫރީ ޕާޓީގައި ހުރެގެން ރައްޔިތުންނަށް ޚިދުމަތް ކުރަން ބޭނުންވި ވަރަށް އެކަން ނުވާތީ ކަމަށް އޭނާ ވިދާޅުވިއެވެ. އަދި ވިދާޅުވީ، ޖޭޕީން ދުރަށް ވަޑައިގަތީ އެ ޕާޓީ ތެރޭގައި ފުރުސަތުތަކެއް ނެތުމުން ކަމަށާއި ސިޔާސީ ކަންކަމުގައި ވެސް އުޅުއްވާއިރު އުއްމީދެއް އޮންނަންވާނެ ކަމަށް އޭނާ ވިދާޅުވިއެވެ.
"އެހެންވީމަ އަޅުގަނޑުމެން އިތުރު ފިކުރެއް މި އުފަން ކުރުވަނީ." ނާޒިމް ވިދާޅުވިއެވެ.
އަލްހާން ފަހުމީީ އެމްޑީޕީގެެ ނައިބްް ރައީސްކަންް ކުރިި، އަލީވަހީދުު އެމްޑީޕީގެެ ޗެއަރ ޕާރސަންް އަދިި ޖޭޕީގެެ ރައީސްް ކަންކުރެއްވިި، އެހެންވީމަށްް ޒުވާންނުންނަށްް ފުރުސަތުު ލިބޭޭ. ތިދައްވާާ ވާހަކަަފުޅުު މުޅިންް ރަނގަޅެއްް ނޫންް.
ނަމަކަށް ދޯ