ބޭރު ޤައުމެއްގެ މިލިޓަރީ ބޭސްއެއް ރާއްޖޭގައި ބިނާ ކޮށްފިނަމަ އެކަންވާނީ ހިތިނުފިލާނެ ވޭނަކަށް: ސައީދު
ބޭރުގެ އެއްވެސް ޤައުމެއްގެ މިލިޓަރީ ބޭސްއެއް ރާއްޖޭގައި ބިނާ ކުރުމަށް ޖާގަ ދެވިގެން ގޮސްފިނަމަ، އެކަން ވެގެންދާނީ މުޅި ދިވެހި ޤައުމުން އެކަމުގެ ހިތި ފިލައިގެން ނުދާނެ ވަރުގެ ބޮޑު ވޭނަކަށް ކަމަށް ރައީސް ޔާމީންގެ އިކޮނޮމިކް މިނިސްޓަރު ، މާވަށު ދާއިރާގެ މެންބަރު މުޙައްމަދު ސައީދު ވިދާޅުވެއްޖެއެވެ.
ސައީދު މިހެން ވިދާޅުވީ، އިންޑިއާއިން މޮރިޝަސްގެ ރަށެއްގައި ސިއްރިއްޔާތުގައި މިލިޓަރީ ބޭސްއެއް އަޅަން އުޅޭ ކަމަށް އަލް-ޖަޒީރާއިން ހިންގި ތަޙްޤީޤަކުން ހާމަވުމާ ގުޅިގެން، އެ ނޫހުން ލިޔުނު އާޓިކަލްއެއް ޓްވީޓް ކުރައްވަމުންނެވެ.
ސަޢީދު ވިދާޅުވީ، މިލިޓަރީ ބޭސްއެއް ޤައުމުތަކުން ތަރައްޤީ ކުރާނީ، އެކަން ކުރާކަން އަކުރުން އަކުރަށް ބުނުމަށް ފަހުގައި ނޫން ކަމަށެވެ. އަދި ރައީސް ޞާލިޙްގެ ސަރުކާރާއި ބައިވެރިންގެ އެއްބަސްވުންތަކުން ރާއްޖެ ކޮންޕްރޮމައިޒްކޮށްފައިވާ ކަމަށް އޭނާ ވިދާޅުވިއެވެ. ސައީދު ވިދާޅުވީ، މިލިޓަރީ ބޭސްއެއް ރާއްޖޭގައި އަޅައިފިނަމަ އޭގެ ހިތި ދުވަހަކު ވެސް ނުފިލާނެކަމަށެވެ.
އިންޑިއާއިން މޮރިޝަސްގެ އަގޭލާގައި މިލިޓަރީ ބޭސްއެއް ހެދުމުގެ މަސައްކަތް ކުރަމުން އަންނަ ކަމަށް އަލްޖަޒީރާގެ ތަޙްޤީޤީ ނޫސްވެރިކަން ކުރާ ޓީމުން ވަނީ ހޯދައިފައެވެ. މިގޮތުން އެކަން ކުރުމަށް ހިންގި ފައިސާގެ މުއާމަލާތްތަކާއި ބައެއް ލިޔެކިޔުންތައް ވެސް ވަނީ ހޯދައިފައެވެ. 2018 ވަނަ އަހަރު ވެސް އިންޑިއާއިން މޮރިޝަސްގައި މިލިޓަރީ ބޭސްއެއް ޤާއިމް ކުރަން އުޅޭ އަޑުތައް ގަދަވިއެވެ. އެހެން ނަމަވެސް އޭރު ދެ ޤައުމުގެ ސަރުކާރުން ވެސް އެކަން ވަނީ ދޮގުކޮށްފައެވެ.
؟؟؟؟