"ރައިސް އަޕް" ގެ ފަރާތުން މިފަހަރު އެހީތެރިކަމުގެ ދީލަތި އަތެއް ދިއްކޮށްލީ ފިޔަވަތީގައި ތިބި ކުދިންނަށް
ޒުވާނުން އިސްނަގައިގެން ކުރިއަށް ގެންދާ ހަރަކާތެއް ކަމުގައިވާ "ރައިސް އަޕް އެމްވީ"އިން ފިޔަވަތީގެ ކުދިންނަށް ބައެއް ޒަރޫރީ ސާމާނު ހަދިޔާ ކޮށްފިއެވެ.
އެ ހަރަކާތުގެ ރިޕްރެޒެންޓޭޓިވް، ލަމްހާ އަސްލަމް "ދެން"އަށް މައުލޫމާތު ދެމުން ބުނީ، ފިޔަވަތީގެ ކުދިންނަށް ޒަރޫރީ ބައެއް ތަކެތި އިއްޔެ ހަދިޔާ ކުރި ކަމަށެވެ.
"ޒަރޫރީ ބޭނުންތަކަށް ބޭނުން ކުރެވޭނެ ސާމާނު ހަދިޔާ ކުރީ. މި ވަގުތު އެތަނުގައި ތިބި ހުރިހާ ކުދިންނަށް ވެސް ވާވަރަށް ތަކެތި ހުންނާނެ ކަމަށް އަޅުގަނޑުމެންނަށް ލަފާ ކުރެވެނީ" ލަމްހާ ބުންޏެވެ.
މި އަހަރުގެ މެއި މަހު އުފެއްދި މި ހަރަކާތުގެ ފަރާތުން މީގެ ކުރިން ވެސް ވަނީ މިފަދަ ޑޮނޭޝަންތައް ކުރިއަށް ގެންގޮސްފައެވެ.
އެގޮތުން "ރައިސް އަޕް"ގެ ފަރާތުން މީގެ ކުރިން ވަނީ ހުޅުމާލޭ ކޮވިޑް ފެސިލިޓީގައި ފަރުވާ ހޯދަމުން ދިޔަ 100 ފަރާތަކަށް ކާބޯތަކެތި ވެސް ފޯރު ކޮށްދީފައެވެ.
މީގެ އިތުރުން އޭޑީކޭ ހޮސްޕިޓަލުގައި އެޑްމިޓު ކޮށްފައި ތިބި ކުޑަކުދިންނަށް ޢީދު ހަދިޔާ ދިނުމާއި މާލެ ސިޓީގެ 150 ކުޑަ ކުއްޖަކަށް ޢީދު ހަދިޔާ ވެސް، ޒުވާނުންގެ އެ ހަރަކާތުން ވަނީ ބަހައިފައެވެ.
ލަމްހާ ބުނި ގޮތުގައި "ރައިސް އަޕް"އަކީ އަދި ރެޖިސްޓަރ ކޮށްފައިވާ ޖަމިއްޔާއެއް ނޫނެވެ. އެހެންކަމުން އެ ހަރަކާތުގެ ފަރާތުން ހިންގާ މި ފަދަ ޕްރޮގްރާމުތަކަށް ގިނައިން ފަންޑު ކުރަނީ އަމިއްލަ ޖީބުން ކަމަށާއި ބައެއް އެހެނިހެން ފަރާތްތަކުން ވެސް އެހީތެރިވާކަން ލަމްހާ ފާހަގަ ކުރިއެވެ.
