ސަރުކާރުގެ ތެރޭގައި ކޮރަޕްޝަން އެބައޮތް، އެމްޑީޕީގެ ތެރޭގައި މައްސަލަ ޖެހިގެން އުޅެނީ އެހެންވެ: އަފީފް

މޯލްޑިވްސް ޑިމޮކްރަޓިކް ޕާޓީ، އެމްޑީޕީގެ ސަރުކާރުގެ ތެރޭގައި ކޮރަޕްޝަމްގެ އަމަލުތައް ހިނގާ ކަމަށާއި އެ ޕާޓީގެ އެތެރޭގައި ޖެހިގެން އުޅޭ މައްސަލައިގެ އަސްލަކީ އެއީ ކަަމަށް ވިލުފުށީ ދާއިރާގެ މެންބަރު ހަސަން އަފީފް ވިދާޅުވެއްޖެއެވެ.

Ads by STELCO

މިރޭ ސަންގް ޓީވީގެ ޚަބަރަށް ފަހު ޕްރޮގްރާމްގައި ވާހަކަފުޅު ދައްކަވަމުން އެމްޑީޕީގެ އެތެރޭގައި ޖެހިގެން އުޅޭ މައްސަލައިގެ އަސްލަކީ ކޮބާތޯ ސުވާލު ކުރުމުން އަފީފް ވިދާޅުވީ، އެމްޑީޕީގެ ސިޔާސަތަކީ އަމަދުވެސް ކޮރަޕްޝަންގެ އަމަލުތައް ހުއްޓުވުން ކަމަށާއި އެމްޑީޕީގެ މެންބަރުން ޤަބޫލު ކުރާ ގޮތުގައި ދައުލަތް ހިންގަން ތިބޭ މީހުންނަކީ އަމާނާތްތެރި ބަޔަކަށްވާން ޖެހޭނެ ކަަމެވެ. އަދި އެމްޑީޕީއިން އަބަދުވެސް އިންތިޚާބުތަކުގައި ވިއްކަމުން އަންނަނީ އެ ވާހަކަ ކަމަށާއި މެނިފެސްޓޯގެ އިތުރުން ރައްޔިތުން އެމްޑީޕީއަށް ތާޢީދު ކުރަނީ އެ ޕާޓީގައި އެ ސިފަ ހުުރުމުން ކަމަށވެ.

"ސިޔާސީ ޕާޓީއަކީ ފިކުރެއް. އެމްޑީޕީގެ ފިކުރަކީ 2006 ވަނަ އަހަރުން ފެށިގެން ގެންނަން އުޅޭ ބަދަލެއް. އަޅުގަނޑުމެން ދެކޭ ގޮތުގައި ދައުލަތެއް ހިނގަންވާނީ އެ ދަޢުލަތެއް ހިނގަން ތިބޭ މީހުންގެ ތެރޭގައި އަމާނާތްތެރިކަން އޮވެގެން. އެއްވެސް ކަހަލަ ކަރަޕްޝަނުގެ މައްސަލައެއް އޮވެގެން ނުވާނެ." އަފީފް ވިދާޅުވިއެވެ.

އަފީފް ވިދާޅުވީ ކޮރަޕްޝަނަކީ އެމްޑީޕީގެ ފިކުރާ ވަރަށް ތަފާތު ކަމެއް ކަމަށާއި ކޮރަޕްޝަން އުޅޭނަމަ އެމްޑީޕީގެ މެންބަރުން ނުރުހޭނެ ކަމަށެވެ. އަދި އެކަން މިއަހަރު އޮތް ލޯކަލް ކައުންސިލުން ރައްޔިތުން ހާމަކޮށްދިން ކަމަށާއި 2023 ވަނަ އަހަރުގެ ރިޔާސީ އިންތިހާބު ކާމިޔާބު ކުރެއްވުމަށް އެންމެ ފުރަތަމަ ކުރަން ޖެހޭ ކަމަކަކީ އެމްޑީޕީގެ އާންމު މެމްބަރުން ހިތްހަމަޖެއްސުން ކަމަށެވެ. އެހެންނަމަވެސް މިކަން ކުރައްވަން ރައީސް ޞާލިޙް މަސަައްކަތް ކުރައްވާތަން ފެނި ވަޑައިނުގަންނަވާ ކަަމަށް ވިދާޅުވެ، ރައީސް ޞާލިޙަށްވަނީ ފާޑު ވިދާޅުވެފައެވެ.

"މެނިފަސްޓޯގެ އިތުރަށް އަޅުގަނޑުމެން އެބަ ބުނަން އަދުލު އިންސާފު ޤާއިމް ކުރާނެ ވާހަކަ. އަޅުގަނޑުމެން އެބަ ބުނަން ނަޒާހަތްތެރިވާނެ ވާހަކަ. އެހެންވީމަ މިކަންތައްތަކާ ދުރަށް ދެވޭ ކަމަށް ވަންޏާ އަޅުގަނޑުމެންގެ ތެރޭގައި ޚިޔާލު ތަފާތުވުންތައް ވަރަށް ބޮޑަށް އަންނާނެ. މިއީ އަޅުގަނޑުމެންނަށް މިއަދު ދިމާވެގެން މިއުޅޭ މައްސަލައަކީ. ޤަބޫލު ކުރެއްވިޔަސް ނުކުރެއްވިޔަސް، ސަރުކާރުގެ ތެރޭގައި ކަރަޕްޝަނުގެ މައްސަލަތައް ވަރަށް ބޮޑަށް ހިނގަމުން އެބަދޭ. މިކަންތައްތަކަކީ އަސްލު އެމްޑީޕީގެ ފިކުރުގެ މެންބަރުން ބޭނުންވާ ކަމެއް ނޫން." އަފީފް ވިދާޅުވިއެވެ.

ސަރުކާރުގެ ތެރޭގައި ކޮރަޕްޝަން ހިނގާނަމަ އެކަން ހުއްޓުވަން މަޖިލީހުން މަސައްކަތް ނުކުރައްވަނީ ކީއްވެތޯ ކުރި ސުވާލަށް ޖަވާބު ދެއްވަމުން އަފީފް ވިދާޅުވީ، އެމްޑީޕީގެ ޓިކެޓްގައި ވާދަކޮށް މަޖިލީހަށް ހޮވިފައިވާ ބައެއް މެންބަރުންނަކީ އަމިއްލަ ނާޖާއިޒު ފައިދާއަށް މަސައްކަތް ކުރާ ބައެއް ކަމަށެވެ. މިހެންވެ، މަޖިލީހުގެ ތެރެއިން އެކަން ކުރުމަކީ އެހާ ފަސޭހަ ކަމެއް ނޫން ކަމަށްވެސް އޭނާ ވިދާޅުވިއެވެ.

އަފީފް ފާހަގަ ވެގެންގޮސްފައިވަނީ ފަހަކަށް އައިސް ރައީސް ޞާލިޙަށް ވަރަށް ބޮޑަށް ފާޑު ވިދާޅުވަމުން ގެންދަވާ އެމްޑީޕީގެ މެންބަރެއްގެ ގޮތުގައެވެ. މިގޮތުން މިރޭވެސް ރައީސް ޞާލިޙް ކޯލިޝަން ރުއްސަން މަސައްކަތް ކުރައްވާ ކަަމަށް ދޭހަވާ ފަދަ އިބާރާތަކުންވަނީ ވާހަކަފުޅު ދައްކަވާފައެވެ.

މިގޮތުން ވިދާޅުވީ، 2018 ވަނަ އަހަރު ރައީސް އެމްޑީޕީ ކޯލިޝަނެއްގެ ތެރެއިން ސަރުކާރަށް އައި ނަމަވެސް އެހެން ޕާޓީތަކުން މާގިނަ ވޯޓެއް ހޯދިފައިވާ ކަމަށް ޤަބޫލުފުޅު ނުކުރެއްވޭ ކަމަށެވެ. އަދި އެގޮތަށް ދެކިވަޑައިނުގަންވަނީ މަޖިލިސް އިންތިޚާބުގައި އެމްޑީޕީއަށް ބޮޑު ކާމިޔާބީއެއް ލިބުމުން ކަމަށް އޭނާ ވިދާޅުވިއެވެ. އަދި ސަރުކާރުގެ 60 އިންސައްތަ ކޯލިޝަނަށް ދެއްވުމަކީ ހަމަޖެހޭ ނިންމުމެއް ނޫން ކަމަށާއި މެޖޯރިޓީ ޕާޓީއަށް މެޖޯރިޓީ ނުލިބި ސަރުކާރު ހިންގުމުގައި ދަތިވާ ކަަމަށް އޭނާގެ ވާހަކަފުޅުގައި ފާހަގަ ކުރެއްވިއެވެ.