ޕީއެސް ވަކި ކުރަން ހުށަހަޅަން ޖެހުނީ މުވައްޒަފުންނާ ވަރަށް ދަށް ފެންވަރަށް މުއާމަލާތް ކުރާތީ: އިސްލާމިކް މިނިސްޓްރީ
އިސްލާމިކް މިނިސްޓްރީގެ ޕާމަނަންޓް ސެކްރަޓަރީކަމުގެ މަގާމުގައި ހުންނެވި ހަސީބް އިސްމާއިލް، އެ މަގާމުން ވަކި ކުރަން ހުށަހަޅުއްވަން ޖެހުނީ، މުވައްޒަފުންނާ މުއާމަލާތް ކުރުމުގައި ވަރަށް ދަށް ފެންވަރެއް ގެންގުޅުއްވާތީ ކަމަށް އެ މިނިސްޓްރީން ވިދާޅުވެއްޖެއެވެ.
ހަސީބް އިސްމާއިލް މިއަދު ވަނީ، އިސްލާމިކް މިނިސްޓްރީގެ ޕީއެސް ކަމުގެ މަގާމުން އެމަނިކުފާނު ވަކި ކޮށްދެއްވުމަށް އެދި ސިވިލް ސާވިސް ކޮމިޝަން (ސީއެސްސީ)އަށް ހުށަހަޅައިފައިވާ ސިޓީއެއް މީސް މީޑިއާގައި އާންމު ކޮށްފައެވެ.
އިސްލާމިކް މިނިސްޓަރ ޑރ. އަހުމަދު ޒާހިރު ސޮއި ކުރައްވާ ހުށަހެޅި އެ ސިޓީ ފޮނުވައިފައި ވަނީ މި އަހަރުގެ ޖެނުއަރީ މަހުގެ 25ވަނަ ދުވަހުގައެވެ.
މިކަމާ ގުޅޭގޮތުން "ދެން" އަށް މައުލޫމާތު ދެއްވަމުން އިސްލާމިކް މިނިސްޓްރީގެ އޮފިޝަލަކު ވިދާޅުވީ ހަސީބް ވަޒީފާއިން ވަކި ކުރަން ވެގެން މިނިސްޓަރ ވަނީ ސީއެސްސީއަށް ސިޓީ ފޮނުވައިފައި ކަމަށެވެ.
"ޕީއެސް ވަޒީފާއިން ވަކި ކުރަން މިނިސްޓަރ ހުށަހެޅި މައިގަނޑު ސަބަބަކީ މުވައްޒަފުންނާ ވަރަށް ދަށް ފެންވަރެއްގައި މުއާމަލާތް ކުރާތީ. އެގޮތުން ރުޅި އިސްކޮށް ވާހަކަ ދެއްކުމާއި ވަޒީފާގެ ބިރު ދެއްކުމާއި މިކަހަލަ މައްސަލަތައް ހިމެނޭ" އެ މިނިސްޓްރީގެ އޮފިޝަލު ވިދާޅުވިއެވެ.
މީގެ އިތުރުން އޮފިޝަލު ވިދާޅުވީ، ޕީއެސްއާ މެދު ޖެހުނު އަނެއް މައްސަލައަކީ މަސައްކަތުގެ މާހައުލުގައި (ރައްޔިތުންނަށް ހިދުމަތް ދިނުމުގައި) އެކަށީގެންވާ މުއާމަލާތް ނުކުރައްވާ ކަމަށެވެ.
މިކަމާ ގުޅޭ ގޮތުން ހަސީބް އިސްމާއިލްގެ ބަހެއް އަދި ވަނީ ލިބޭ ގޮތެއް ނުވެއެވެ.
