މާރިޔާއާއި އިމްރާން އެކަހެރި ކުރަން އެމްޕީ ޝިޔާން ގޮވައިލައްވައިފި
ރައީސް ނަޝީދަށް އަމާޒުކޮށް ދިން ނުރައްކާތެރި ޓެރަރިސްޓް ހަމަލާއާ ގުޅިގެން މަޖިލީހުގެ ގައުމީ ސަލާމަތާ ބެހޭ ކޮމިޓީން ކުރިއަށް ގެންދިޔަ އިންކުއަރީގެ ރިޕޯޓްގައި ކޮށްފައިވާ ރިކޮމެންޑޭޝަންތައް ތަންފީޒު ކުރެވޭނީ ޑިފެންސް މިނިސްޓަރ މާރިޔާ އަހުމަދު ދީދީއާއި ހޯމް މިނިސްޓަރ އިމްރާން އަބްދުﷲ މަގާމުން އެކަހެރިކޮށްގެން ކަމަށް ރައްޔިތުންގެ މަޖިލީހުގެ ތޮއްޑޫ ދާއިރާގެ މެމްބަރު ހަސަން ޝިޔާން (ގިޓާ) ވިދާޅުވެއްޖެއެވެ.
މިކަމާ ބެހޭ ގޮތުން ވާހަކަ ދައްކަވަމުން ޝިޔާން (ގިޓާ) ވިދާޅުވީ ހޯމް މިނިސްޓަރ އިމްރާނާއި ޑިފެންސް މިނިސްޓަރ މާރިޔާ މަގާމުގައި ތިއްބަވައިގެން މަޖިލީހުގެ ގައުމީ ސަލާމަތާބެހޭ ކޮމިޓީން ރިކޮމެންޑްކޮށްފައިވާ ކަންކަމެއް ތަންފީޒެއް ނުކުރެވޭނެއެވެ.
"241 ކޮމިޓީގެ ރިކޮމެންޑޭޝަންތައް ތަންފީޒު ކުރުމުގައި ސަރުކާރުން ފަހަތު ފަޔަށް ބަރުވެފައިވާ މިންވަރު އެއީ އަޅުގަނޑުމެން ޕާޓީގެ ނަޒަރިއްޔާތުން ޕާޓީގެ މެމްބަރުން މިއަދު ވިސްނާ އެކަމާ ދޭތެރޭ ކަންބޮޑުވާން ޖެހޭ ކަމެއް. އަޅުގަނޑު ދެކޭ ގޮތުގައި މިވަގުތު ޑިފެންސް މިނިސްޓަރާއި ހޯމް މިނިސްޓަރ އެމަގާމުގައި ތިއްބަވައިގެން ރިކޮމެންޑޭޝަންތައް ތަންފީޒު ކުރުމުގައި ބޮޑެތި ގޮންޖެހުންތަކާ ކުރިމަތިވާނެ. އެހެންކަމުން އަޅުގަނޑު އެދެން ވަރަށް ބޮޑަށް އެބޭފުޅުން އެކަހެރިކޮށްގެން ވިޔަސް މި ރިކޮމެންޑޭޝަންތައް ރަނގަޅަށް ތަންފީޒުކޮށް މި ދިިވެހިރާއްޖެއަކީ ހަރުކަށި ފިކުރާއި ކަންކަމުން ސަލާމަތްވެފައިވާ ގައުމަކަށް މި ކުރާ މަސައްކަތްތައް ކުރުމުގައި މުޅި ދައުލަތުން އެއްބާރުލުން ދެއްވުން" ޝިޔާން ވިދާޅުވިއެވެ.
ރޭ އެމްޑީޕީން ބޭއްވި އެޕާޓީގެ ގައުމީ މަޖިލީހުގެ ޖަލްސާގައި ވާހަކަދެއްކި ބައެއް މެމްބަރުން ވިދާޅުވީ 241 ކޮމިޓީގެ އިންކުއަރީ ރިޕޯޓްގެ ރިކޮމެންޑޭޝަންތައް ތަންފީޒު ނުކުރެވޭ ކަމީ ކަންބޮޑުވާ ކަމެއްކަމުގައި ފާހަގަކޮށްފައެވެ.
