ރާއްޖެ އެތެރެކުރަން އުޅުނު 16.72 ކިލޯގެ މަސްތުވާތަކެތި އަތުލައިގެންފި

ރާއްޖެއަށް އެތެރެކުރަން އުޅުނު ގިނަ އަދަދެއްގެ މަސްތުވާތަކެތި އަތުލައިގެންފިއެވެ.

Ads by Sosun Fihaara

މޯލްޑިވްސް ކަސްޓަމްސް ސާވިސްއިން ބުނީ ބްރެޒިލުން ރާއްޖެ އައި އުމުރުން 29 އަހަރުގެ އަންހެނެއްގެ އަމަލުތައް ހުރި ގޮތުން ޝައްކުވެ އޭނާގެ ފޮށި ކަސްޓަމުން ބަލައި ފާސް ކުރިއިރު، ފޮށީގެ ތެރެއިން މަސްތުވާތަކެތި ކަމަށް ޝައްކުވާ ތަކެތި ފެނިފައިވާ ކަމަށެވެ.

ފުރަތަމަ މަރުހަލާގައި ކަސްޓަމުން އެ ތަކެތި ޓެސްޓްކުރިއިރު ކޮކެއިނަށް ޕޮޒިޓިވްވި ކަމަށާއި ބްރެޒިލްގެ އެ މީހާގެ އަތުން އަތުލި މަސްތުވާތަކެތީގެ ޖުމްލަ ބަރުދަނުގައި 16.723 ކިލޯ ގްރާމް ހަމަވާ ކަމަށެވެ. އަދި އެ އަންހެން މީހާގެ އަތުން އަތުލައިގަތް މަސްތުވާތަކެތީގެ މަގުމަތީ އަގު 83 މިލިއަން ރުފިޔާއަށް އަރާ ކަމަށެވެ.

މި މައްސަލައިގައި އެ އަންހެން މީހާއާއި މަސްތުވާތަކެތި ފުލުހާ ހަވާލު ކޮށްފައިވާކަމަށް ކަސްޓަމްސްއިން ވިދާޅުވިއެވެ.