ލުމޭރިއާ ސެލޫން: އުފާވެރި މާހައުލެއްގައި ކަސްޓަމަރުން ހިތްހަމަ ޖެހޭނެ ފުރިހަމަ ޚިދުމަތެއް ދިނުމުގެ އަޒުމުގައި
ޒީނަތްތެރިވުމަކީ ކޮންމެ މީހަކު ވެސް ދިރިއުޅުމުގައި ވަރަށް އަޙައްމިއްޔަތުކަން ދޭނެ އެއް ކަމެވެ. މޫނުމަތި ތެޔޮވުމާއި، ބިހި ނެގުން ހުއްޓުވައި، ބޮލުގެ އިސްތަށިގަނޑު ވަރުގަދަކޮށް ބޭނުން ކުލައެއް ޖައްސައިލުމަށް ބޭނުންވާ މީހުން ވެސް މަދެއް ނޫނެވެ. މީގެ އިތުރުން ނިޔަފަތިތަކުގެ ބައްޓަން ރީތި ކޮށްލުމާއި ތިމާއާ ގުޅޭނެ ކުލައެއް ނިޔަފަތިތަކުގައި ޖައްސައިލުމަށް ވެސް ޝައުޤުވެރިވާ ފަރާތްތައް މަދެއް ނޫނެވެ.
މި ހުރިހާ ޚިދުމަތެއް ލިބިގަތުމަށް ބައެއް މީހުން، މިކަމުގެ ތަޖުރިބާކާރުން ގެ އެހީ ހޯދައެވެ. ބޭނުން ވަނީ ތިމާ ހިތް އެދޭ ފަދަ ޒީނަތްތެރިކަމެއް ލިބުމެވެ.
ލުމޭރިއާ ސެލޫނަކީ އެފަދަ ސެލޫނެކެވެ. ހެއާ ޑްރެސިންގް އެންޑް ބިއުޓީ ކެއާގެ ހިދުމަތް ފޯރުކޮށް ދިނުމުގައި ތަޖުރިބާ ހުރި މުވައްޒަފުންނާ އެކު މާދަމާ ހުޅުވޭ މި ސެލޫނަށް ވަންނަ ކޮންމެ ކަސްޓަމަރަކު ވެސް ހިތްހަމަ ޖެހޭނެ ފަދަ ހިދުމަތެއް ދިނުމަށް ޚާއްސަ އަހައްމިއްޔަތު ކަމެއް ދޭނެ ކަމަށް އެ ސެލޫނުން ބުނެއެވެ.
އޮކްސިޖެން ރެސްޓޯރަންޓްގެ މަތީގައި ހަދާފައި ހުންނަ ލުމޭރިއާ ސެލޫނާ ބެހޭގޮތުން "ދެން" އަށް އިތުރަށް މައުލޫމާތު ދެއްވަމުން އެ ސެލޫންގެ ފައުންޑަރ ކަމުގައިވާ އާއިޝަތު ޝެރިއަން ވިދާޅުވީ އޭނާ މި ސެލޫން ހުޅުވަން ގަސްތުކުރީ މި ދާއިރާއަށް ހުންނަ ޝައުޤުވެރިކަމެއްގެ ބޮޑުކަމުން ވަރަށް ގިނަ ދުވަސް ވަންދެން މިކަމަށް ތައްޔާރު ވުމަށް ފަހުގައި ކަމަށެވެ.
"ސެލޫނެއް ހުޅުވުމުގެ ހިޔާލު އިންނަތާ މިހާރު ފަސް ވަރަކަށް އަހަރު ވެދާނެ. އަމިއްލަ ކަމެއް ފެށުމަކީ ފަސޭހަ ކަމަކަށް ނުވާތީ މިކަން ހަގީގަތަކަށް ހެދުމަށް ޓަކައި ވާން ޖެހޭ ތައްޔާރީތައް ވުމަށް މިހާ ދުވަސް ނެގީ. ތައްޔާރު ވުމަށްފަހު މިތަނުގެ މަސައްކަތް ނިންމާލެވުނީ އެއް އަހަރާއި 5 ވަރަކަށް މަސް ތެރޭގައި" ޝެރިއަން ވިދާޅުވިއެވެ.
ލުމޭރިއާ ސެލޫނުން ވެސް ޒީނަތްތެރިވުމަށް ބޭނުން ވާނެ ހުރިހާ ޚިދުމަތެއް ލިބޭނެ ކަމަށް ޝެރިއަން ވިދާޅުވިއެވެ.
"އަޅުގަނޑުމެން ބޭނުން ކުރަނީ ވަރަށް ރަނގަޅު ކޮލިޓީ ބްރޭންޑުތަކެއް. އޭގެ ތެރޭގައި ރާއްޖެއަށް އަލަށް ތައާރަފް ކުރާ އެމެރިކާގެ މަޝްހޫރު ޕްރޮޑަކްޓެއް ކަމަށްވާ ޖީކޭ ހެއާ ޕްރޮޑަކްޓްސް ހިމެނޭނެ. މީގެ އިތުރުން ޔޫކޭ، އެމެރިކާ އަދި އޭޝިއާ ޤައުމުތަކުގެ މަޝްހޫރު ޕްރޮޑަކްޓްސްތައް ބޭނުން ކޮށްގެން އަޅުގަނޑުމެން އިސްތަށިގަނޑު ޒީނަތްތެރި ކުރުމަށް ވެސް ދޭ ހިދުމަތްތައް ހުންނާނީ. މީގެއިތުރުން ހަންގަނޑުގެ ރީތިކަން ދެމެހެއްޓުމަށް ވެސް ބޭނުން ކުރަނީ ވަރަށް ކޮލިޓީ ރަނގަޅު ޕްރޮޑަކްޓުތައް" ޝެރިއަން ވިދާޅުވިއެވެ.
ދާއިރާގައި ކުރިންވެސް މަސައްކަތް ކޮށްފައިވާ ތަޖުރިބާކާރުންގެ ފަރާތުން ލުމޭރިއާ ސެލޫންގެ ކަސްޓަމަރުންނަށް ލިބޭ ޚިދުމަތްތަކުގެ ތެރޭގައި ހިމެނެނީ ހެއާ ޓްރީޓްމަންޓާއި، ހެއާ ސްޓައިލިންގާއި ކަލަރިންގ، ފޭޝަލްސް، މެނިކުއާރ، ޕެޑިކުއާރ، ވެކްސިންގް، ކެރަޓިން ޓްރީޓްމަންޓް، ހެއާކަޓް އަދި ހަމުގެ އެކިއެކި ޓްރީޓްމަންޓްތަކެވެ. ކޮންމެ ޚިދުމަތަކީ ވެސް ވަރަށް ކޮލިޓީ ޕްރޮޑަކްޓްތައް ބޭނުން ކޮށްގެން ދޭ ޚިދުމަތްތަކެއް ކަމަށް ވެސް ލުމޭރިއާ ސެލޫނުން ބުނެފައިވެއެވެ.
އަޅުގަނޑުމެންގެ އަމާޒަކީ ރަނގަޅު ކޮލިޓީ ޕްރޮޑަކްޓުތައް ބޭނުން ކޮށްގެން، އަޅުގަނޑުމެންގެ ކަސްޓަމަރުންނަށް ވަރަށް ފުރިހަމަ ޚިދުމަތެއް ހިތް ފަސޭހަ މާހައުލެއްގައި ދިނުން
ފުރިހަމަ އަޒުމަކާ އެކު މި މަހުގެ 24 ވަނަ ދުވަހު ލުމޭރިއާ ސެލޫން ހުޅުވޭ އިރު، މި ސެލޫން ހުޅުވިފައި ހުންނާނީ ކޮންމެ ހޮނިހިރު ދުވަހުން ބުރާސްފަތި ދުވަހުގެ ހެނދުނު 10:00އިން ރޭގަނޑު 8:00 އަށެވެ. އަދި ހުކުރު ދުވަހު މެންދުރު ފަހު 3:00އިން ރޭގަނޑު 8:00އަށް ވެސް ލުމޭރިއާ ސެލޫނުން ހިދުމަތް ލިބޭނެ ކަމަށް ސެލޫނުން މައުލޫމާތު ދެއެވެ.
މީގެ އިތުރުން ކައިވެނި ޙަފްލާތަކަށް ތައްޔާރުވުމުގެ ގޮތުން ކުރާ މޭކަޕް (ބްރައިޑަލް މޭކަޕް)ތަކާއި ހަވީރީ މޭކަޕާއި ހިޖާބް ސްޓައިލިންގްގެ ހިދުމަތް ވެސް ލުމޭރިއާ ސެލޫނުން ދޭނެކަން ޝެރިއަން ފާހަގަކޮށްލެއްވިއެވެ.
ލުމޭރިއާ ސެލޫން ހުޅުވުމުގެ ކުރިން އެ ސެލޫނުން ވަނީ ގިވްއަވޭއެއް ވެސް ފަށައިފައެވެ. 1000ރުފިޔާގެ ދޭ މި ގިވްއަވޭ އިއްޔެ ވަނީ ނިމިފައެވެ. އަދި އިނާމު ލިބުން ފަރާތް މިއަދު އިއުލާނު ކުރާނެ ކަމަށް ވެސް ޝެރިއަން ވިދާޅުވިއެވެ.
މާދަމާއިން ފެށިގެން ލުމޭރިއާ ސެލޫން ހުޅުވޭއިރު، އެ ސެލޫނުން ވަނީ ވަރަށް ޚާއްސަ ޑިސްކައުންޓުތަކެއް ވެސް ދޭން ނިންމައިފައެވެ. އެގޮތުން މާދަމާއިން ފެށިގެން އަންނަ ސެޕްޓެމްބަރު މަހުގެ 10އާ ހަމައަށް، އެ ސެލޫނުން ޚިދުމަތް ހޯދުމަށްދާ ކޮންމެ އައު ކަސްޓަމަރަކަށް، އެމީހަކު ބޭނުން ކޮންމެ ޚިދުމަތަކުން 20% ޑިސްކައުންޓު ލިބޭނެއެވެ.
މީގެ އިތުރުން ސެލޫން ހުޅުވޭ ފުރަތަމަ ހަފްތާ ތެރޭގައި ޚާއްސަ ޕެކޭޖުތަކެއް ވެސް ތައާރަފް ކުރާނެ ކަމަށް ޝެރިއަން ވިދާޅުވިއެވެ. އޭގެ އަޕްޑޭޓްތައް ލުމޭރިއާ ސެލޫންގެ އިންސްޓަގްރާމް އެކައުންޓުންނާއި ފޭސްބުކް ޕޭޖުން ލިބެން ހުންނާނެއެވެ.
ލުމޭރިއާ ސެލޫނުން ޚިދުމަތް ހޯދުމަށް ގުޅާނީ ނުވަތަ ވައިބާއިން މެސެޖު ކޮށްލާނީ 7882444 ނަންބަރު ފޯނަށެވެ.
