ރައީސް ނަޝީދަށް މަރުގެ އިންޒާރު ދިން މީހާ ކޯޓުގެ ހުރުމަތް ކަނޑައިގެން ޖަލަށް
"ބަދުރުގެ ދުވަހު އަބޫ ޖަހުލަށް ހެދި ގޮތް" ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ހަދާނެ ކަމަށް ބުނެ އިންޒާރު ދިނުމުގެ ސަބަބުން ހައްޔަރުކޮށްފައިވާ މީހާ ކޯޓުގެ ހުރުމަތް ކެނޑުމުގެ ކުށުގައި 15 ދުވަހަށް ޖަލަށް ލާން ހުކުމް ކޮށްފިއެވެ.
ރައީސް ނަޝީދަށް މަރުގެ އިންޒާރު ދިނުމުގެ ސަބަބުން ހައްޔަރުކޮށް 15 ދުވަހަށް ބަންދުގެ މުއްދަތު ޖަހައި ކޯޓުގެ ހުރުމަތް ކެނޑުމުގެ ސަބަބުން ޖަލަށް ލާން ހުކުމް ކޮށްފައިވާ މީހާއަކީ 40 އަހަރުގެ ދިވެހި ފިރިހެެނެއް ކަމަށް މައުލޫމާތު ލިބެއެވެ.
ރައީސް ނަޝީދުގެ ހަށިކޮޅަށް ގެއްލުން ދޭނެ ކަމަށް ސޯޝަލް މީޑިއާގައި ބުނި މީހާ ހައްޔަރުކޮށްފައި ވަނީ ރ.މީދޫއިން ކަމަށް ވަނީ މައުލޫމާތު ލިބިފައެވެ. އަދި އެމީހާ، ރައީސް ނަޝީދު ރާއްޖެ ވަޑައިގެންފި ނަމަ "ބަދުރުގެ ދުވަހު އަބޫ ޖަހުލަށް ހެދި ގޮތް" ހަދާނެ ކަމަށާއި ދެން ފަހަރަކުން އެއަށް ވުރެ ހިތި ވާނެ ކަމަށް ސޯޝަލް މީޑިޔާގައި ވަނީ ބުނެފައެވެ.
މިދިޔަ މެެއި މަހުގެ 6ވަނަަ ދުވަހުގެ ރޭ ރައީސް ނަޝީދަށް އަމާޒުކޮށް ދިން ނުރައްކާތެރި ޓެރަރިސްޓް ހަމަލައިގައި ލިބުނު ޒަހަމްތަކަށް އެމަނިކުފާނު އަދިވެސް ދަނީ ފަރުވާ ހޯއްދަވަމުންނެވެ.
ހަމަލާގެ ތަހްގީގު އަދި ނުނިމި ކުރިއަށްދާ މި ދަނޑިވަޅުގައި ތަޙްޤީޤު ނިމި، އެކަން ރާވައި ހިންގި ފަރާތްތައް އިންސާފުގެ ކުރިމައްޗަށް ގެނެވި، ހައްޔަރުގައި ބޭތިއްބުމުގެ ކުރީގައި އެނބުރި ރާއްޖެއަށް އައުމަށް ޖެހިލުންވާކަމަށް ރައީސް ނަޝީދު ވަނީ ވިދާޅުވެފައެވެ.
ރައްޔިތުންގެ މަޖިލީހުގެ ނައިބު ރައީސާ އީވާ އަބްދުﷲއަށް އެޑްރެސް ކުރައްވައި ރައީސް ނަޝީދު ފޮނުއްވި ސިޓީއެއްގައި ވިދާޅުވީ މިވަގުތު ރާއްޖެއަށް އައުމަށް އާއިލާއާއި، ހެޔޮއެދޭ އެތައް ބަޔަކު ވެސް އަދި އެމަނިކުފާނު ވެސް ޖެހިލުންވާ ކަމަށެވެ.
