މިނިސްޓަރ މަޙްލޫފްގެ މައްސަލައިގެ ތަހުގީގު ހިންގީ ގޯސްކޮށް ކަމަށް ރައީސް އޮފީހުން އަންގައިފި
ޔޫތު މިނިސްޓަރު އަހުމަދު މަޙްލޫފްގެ މައްޗަށް ކުރި ކަރަޕްޝަންގެ ތުހުމަތުގައި އެސެޓް ރިކަވަރީ ކަމިޝަނުން ތަހުގީގު ހިންގީ ގޯސްކޮށް ކަމަށް ރައީސް އޮފީހުން އެ ކޮމިޝަނަށް މިއަދު އަންގަވައިފިއެވެ.
ހެކިބަސް ނެގުމުގެ ކަންކަން ކުރިއަށް ގެންދިޔަ ގޮތް ބެލުމަށް ރައީސް އޮފީހުން ފޮރިން މިނިސްޓްރީއަށް އެންގި އެންގުމާ ގުޅިގެން އެ މިނިސްޓްރީން ހިންގި ތަހުގީގަށް ފަހު އެކުލަވައިލި ރިޕޯޓް ރައީސް އޮފީހަށް ފޮނުއްވުމުން އެ އޮފީހުން އެސެޓް ރިކަވަރީ ކޮމިޝަނަށް ފޮނުވި ސިޓީގައި، ރައީސް އޮފީހުން ވިދާޅުވީ މިނިސްޓަރ މަޙްލޫފްގެ މައްސަލައިގައި ލަންކާގެ ރައްޔިތެއްގެ ހެކިބަސް ނަގަން އެސެޓް ރިކަވަރީ ކޮމިޝަނުން ލަންކާގައި ހުންނަ ދިވެހި އެންބަސީ މެދުވެރިކޮށް އަމަލުކޮށްފައި ވަނީ ގާނޫނުތަކާ ހިލާފަށް ކަމަށެވެ. އަދި އާންމު އުސޫލުތަކުގެ ދަށުން ޖިނާއީ މައްސަލަތަކާ ގުޅިގެން ބޭރު މީހެއްގެ ބަޔާން ނަގަން ޖެހިއްޖެ ހާލަތެއްގައި ބަޔާން ނެގުމުގެ ކަންކަން އިންތިޒާމު ކުރާނީ އެ މީހެއް ހުރި ގައުމެއްގެ ސަރުކާރެއްގައި ގާނޫނީ އެހީތެރިކަމަށް އެދި ހުށައަޅާ ހުށަހެޅުމެއް (މިއުޗުއަލް ލީގަލް އެސިސްޓެންސް ރިކުއެސްޓް) ފޮނުވައިގެން ކަމަށްވީ ނަމަވެސް އެ އުސޫލުން ކަންކޮށްފައި ނުވާ ކަމަށް ވެސް ސިޓީގައި ވިދާޅުވެފައިވެއެވެ.
އެމްއެމްޕީއާރްސީގެ ޚިޔާނާތުގައި ބައިވެރިވިކަމުގެ ތުހުމަތު އުފުލި، މިވަގުތު މިނިސްޓަރުކަމުން ސަސްޕެންޑު ކޮށްފައިވާ މަޙްލޫފްގެ މައްސަލައިގައި ހެކިބަސް ނަގަން އެސެޓް ރިކަވަރީ ކޮމިޝަނުން ވަނީ ލަންކާގައި ހުންނަ ދިވެހި އެމްބަސީއަށް ސީދާ ގުޅައިގެން ލަންކާ ރައްޔިތަކަށް ސީދާ އެމްބެސެޑަރު އެތައް ފަހަރަކު ފޯނުކޮށް ލޯޔަރެއްގެ ފުރުސަތު ވެސް ނުދީ އޭނާ ލައްވައި އެންބެސެޑަރު ބޭނުންވާ ގޮތަށް ހެކިބަސްނަގައިފައި ކަމަށް މައުލޫމާތު ލިބެއެވެ.
