ރައީސް ނަޝީދަށް ދިން ހަމަލާގައި ދައުވާ އުފުލިފައިވާ މީހުންގެ މައުލޫމާތު ފޯރުކޮށްދޭން ވަކީލުން އެދިއްޖެ
ކުރީގެ ރައީސް އަދި މިހާރު ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އަވަހާރަ ކޮށްލަން އަމާޒުކޮށް ދިން ހަމަލާއާ ގުޅިގެން ދައުވާ އުފުލިފައިވާ ހަތަރު މީހުންގެ މައުލޫމާތު ފޯރު ކޮށްދިނުމަށް އެ މަނިކުފާނުގެ ވަކީލުން އެދިވަޑައިގެންފިއެވެ.
މެއި މަހުގެ ހަވަނަ ދުވަހުގެ ރޭ ރައީސް ނަޝީދަށް ދިން ހަމަލާއާ ގުޅިގެން ހައްޔަރުކުރި 10 މީހުންގެ ތެރެއިން ދައުވާ ކޮށްފައި ވަނީ ހަތަރު މީހަކަށެވެ. އެއީ ވ. ތިނަދޫ، ހިޔާ، އަދުހަމް އަހުމަދު ރަޝީދާއި މއ. ފޭރުގޭ މުޖާޒް އަހުމަދާއި ގއ. ކޮނޑޭ، ފޮޅޭމާ ތަހުމީން އަހުމަދު އަދި ނ. މަނަދޫ، ނޫރީގެ އަލީ ހައިޝަމްގެ މައްޗަށެވެ.
އެމީހުންގެ އިތުރު މައުލޫމާތު ހޯދުމަށް ރައީސް ނަޝީދުގެ ފަރާތުން އެމަނިކުފާނުގެ ވަކީލުން މިއަދު ވަނީ ޕްރޮސެކިއުޓާ ޖެނެރަލް (ޕީޖީ) ޙުސެއިން ޝަމީމް އަރިހުން އެދިވަޑައިގެންފައެވެ. އެގޮތުން ޕީޖީ ޝަމީމަށް އެޑްރެސްކޮށް ރައީސް ނަޝީދުގެ ކޮއްކޯފުޅު އަދި ޤާނޫނީ ވަކީލު ނާޒިމް ސައްތާރު ފޮނުއްވި ސިޓީއެއްގައި ވިދާޅުވެފައި ވަނީ ރައީސް ނަޝީދަށް ދިން ހަމަލާއާ ގުޅިގެން މިހާރު ދައުވާ ކޮށްފައިވާ 4 ފަރާތުގެ ދައުވާއާއި ދައުވާއާ ގުޅޭ އެންމެހައި ލިޔެކިޔުމުގެ ތެރެއިން، އާންމުކޮށް ހުޅުވައިލެވިގެން ބާއްވާ ޝަރީޢަތްތަކުގައި ހާމަވާނެ ލިޔެކިޔުންތަކުގެ ކޮޕީ ފޯރުކޮށްދެއްވުމަށެވެ.
މި ލިޔެކިޔުންތައް ބޭނުން ވަނީ، ރައީސް ނަޝީދަށް ދިން ހަމަލާގެ މައްސަލައިގައި ވަޑައިގަންނަވާ ބިދޭސީ ވަކީލާއެކު އެ މައުލޫމާތު ހިއްސާ ކުރުމަށާއި، އަނިޔާވި ފަރާތުގެ ހައިސިއްޔަތުން ރައީސް ނަޝީދަށް ލިބިވަޑަައިގަތް ޒަޚަމްތަކަށް ޖެހޭ ދިޔައިގެ ކަންކަން ކަނޑައެޅުމަށް ޓަކައި، މުއްތަހަމުން ކުރެން ކާކު ކުރީ ކޮން އަމަލެއްތޯ ދެނެގަތުމަށް ކަމަށް ވެސް ވަކީލުންގެ ފަރާތުން ފޮނުއްވި ސިޓީގައި ވިދާޅުވެފައިވެއެވެ.
Ads by STO
