ފްލެޓުގެ އެއްބަސްވުން ހަދަން އަދިވެސް 100އަށްވުރެ ގިނަ މީހުން މައުލޫމާތު ނުދޭ: އެޗްޑީސީ
ހުޅުމާލޭ ދެވަނަ ފިޔަވަހީގައި ތަރައްޤީ ކޮށްފައިވާ ހިޔާ ފްލެޓުތަކުގެ އެއްބަސްވުންތަކުގައި ސޮއިކުރުމަށް ހިޔާ ޕޯޓަލްގައި ރަޖިސްޓްރީ ނުކުރާ އަދި އެއްބަސްވުމުގައި ސޮއިކުރަން ބޭނުންވާ މައުލޫމާތު ނުދޭ 100އަށް ވުރެ ގިނަ މީހުން ތިބި ކަމަށް ހައުސިންގް ޑިވެލޮޕްމަންޓް ކޯޕަރޭޝަން (އެޗްޑީސީ)އިން ބުނެފިއެވެ.
ހިޔާ ފްލެޓް ޓަވަރުތަކުގެ ފެނުގެ މަސައްކަތްތަކެއް ކުރުމަށް، މިއަދުގެ އެކި ވަގުތުތަކުގައި އެތަނުން ފެނުގެ ހިދުމަތް މެދުކަނޑާލާނެކަން އެންގުމަށް އިއްޔެ އެޗްޑީސީން ކުރި އިއުލާނެއްގައި ބުނީ، އެއްބަސްވުން ހެދުމަށް ޕޯޓަލްގައި ރަޖިސްޓްރީވެފައި ނުވާ މީހުންނާއި އަދި އެއްވެސް ގޮތަކަށް މައުލޫމާތު ފޯމު ހުށަނާޅާ 107 މީހަކު އަދިވެސް އެބަތިބި ކަމަށެވެ.
އެޗްޑީސީން ވަނީ މިހާތަނަށް މައުލޫމާތު ފޯމު ހުށަނާޅާ މީހުންގެ ލިސްޓެއް ވެސް މި އިއުލާނާ އެކު އާންމުކޮށްފައެވެ.
މީގެ އިތުރުން އެ އިއުލާނުގައި އެޗްޑީސީން ބުނެފައިވަނީ ޓަވަރުތަކުގެ ފެނުގެ މަސައްކަތެއް މިއަދު ކުރިއަށް ދާތީ، ފްލެޓް ހަވާލުކުރުމުގެ އެއްބަސްވުމުގައި ސޮއިކުރުން ވެސް މިއަދު ނޯންނާނެ ކަމަށެވެ. އެޗްޑީސީން ބުނީ މިއަދު އެއްބަސްވުމުގައި ސޮއިކުރަން ތާވަލުކޮށްފައި ވަނީ ފްލެޓް އެއްބަސްވުން ތައްޔާރުކުރަން ކޮންމެހެން ބޭނުންވާ މައުލޫމާތު ފުރިހަމަކޮށް، ފޯމު ހުށަހަޅައިފައިވާ މީހުންގެ ތެރެއިން މައުލޫމާތު ކަށަވަރުކޮށް ނިމިފައިވާ މީހުން ކަމަށެވެ.
ފްލެޓް އެއްބަސްވުންތަކުގައި ސޮއިކުރުން މިހާރު ކުރިއަށް ދަނީ، އެކި ސަބަބުތަކާ ހުރެ، ކުރިން އެ އެއްބަސްވުންތަކުގައި ސޮއި ނުކުރެވި ތިބި މީހުންނާ ވެސް އެކުގައެވެ.
