އެމްޑީޕީއަކީ ވަޢުދުވެ، ވަޢުދު ފުއްދަން ނޭނގޭ ޕާޓީއެއް: މަލީޙް
މޯލްޑިވްސް ޑިމޮކްރަޓިކް ޕާޓީ (އެމްޑީޕީ)އަކީ ވަޢުދުވެ، އެ ވަޢުދު ފުއްދަން ނޭނގޭ ޕާޓީއެއް ކަމަށް މި ސަރުކާރުގެ ފުރަތަމަ ކޮމިއުނިކޭޝަން އެންޑް ޓެކްނޮލިޖީ މިނިސްޓަރ ޑރ.މުޙައްމަދު މަލީޙް ޖަމާލް ވިދާޅުވެއްޖެއެވެ.
ރައްޔިތުންގެ މަޖިލީހުން އިތުބާރު ނެތް ކަމަށް ފާސްކޮށް، މަޤާމުން ދުރުކުރުމަށް ފަހު ސަރުކާރަށް ވަރަށް ބޮޑަށް ފާޑު ވިދާޅުވަމުން ގެންދަވާ މަލީޙް ވިދާޅުވީ، އެމްޑީޕީއިން ވަޢުދުވެ، ވަޢުދު ފުއްދަން ނޭނގުނަސް މިހާރު އިދިކޮޅުގައި އޮތް ޕީޕީއެމަކީ ވަޢުދު ފުއްދާނެ ޕާޓީއެއް ކަމަށެވެ. މިނިސްޓަރު ކަމުން މަލީޙް ވަކި ކުރެއްވުމުން، އޭނާ ވަނީ އިދިކޮޅު ޕީޕީއެމްއާ ގުޅިވަޑައިގެންފައެވެ. މަލީޙް މިނިސްޓަރުކަން އަދާ ކުރެއްވީ، ޖުމްހޫރީ ޕާޓީގެ ސްލޮޓެއްގައެވެ.
ސަރުކާރަށް ފާޑު ވިދާޅުވެ، މަލީޙް ޓްވީޓް ކުރައްވައިފައި ވަނީ، "ވެފައިވާ ހުރިހާ ވަޢުދެއް ފަސް އަހަރުގެ ތެރޭގައި ނުފުއްދޭނެ" ކަމަށް އެމްޑީޕީގެ ޕީޖީ ލީޑަރު އަލީ އާޒިމް ވިދާޅުވި ޚަބަރުގެ ސްކްރީންޝޮޓެއް ޓްވީޓް ކުރައްވަމުންނެވެ. މިގޮތުން މަލީޙް ވަނީ ވެފައިވާ ވަޢުދުތައް ނުފުއްދޭ ނަމަ އިސްތިއުފާ ދީ، ސަރުކާރު ރައްޔިތުންނާ ހަވާލު ކުރުުމަށް ގޮވައިލާފައެވެ.
ސަރުކާރުގެ ވަޢުދުތަކާ ގުޅޭ ގޮތުން ޕީއެސްއެމްގައި ވާހަކަ ދައްކަވަމުން އާޒިމް ވިދާޅުވީ ސަރުކަރުން ވެރިކަމާއި ހަވާލުވުމުގެ ކުރިން ރައްޔިތުންނަށް ވެފައިވާ ގިނަ ވައުދުތައް ފުއްދުމަށް ވަރަށް ގިނަ މަސައްކަތްތަކެއް ކުރަމުންދާ ކަމަށެވެ. ނަމަވެސް އެ ކަންކަމަށް ކުރިމަތިވި އެންމެ ބޮޑު ހުރަހަކީ ކޮވިޑް-19 ކަމަށެވެ. ނަމަވެސް ކޮވިޑްގެ ތެރޭގައި ވެސް ސަރުކާރުން އުންމީދު ވެސް ނުކުރާހާ ރަނގަޅަށް ކަންކަން ކޮށްދެއްވާފައިވާކަމަށް އާޒިމް ވިދާޅުވިއެވެ. ސަރުކާރުން ވެފައިވާ ވައުދުތައް 5 އަހަރުގެ ދައުރުގެ ތެރޭގައި ފުއްދުމަކީ ކުރެވޭނެ ކަމެއް ނޫންކަމަށް ގަބޫލު ކުރައްވާ ކަމަށާއި ނަމަވެސް ވެފައިވާ ގިނަ ވަޢުދުތައް ފުއްދުމަށް މަސައްކަތް ކުރަމުންދާ ކަމަށް އާޒިމް ވިދާޅުވިއެވެ.
Ads by STO
