ކިނޮޅަހާއި ޅޮހީ ސްކޫލުގައި އިމާރާތްކުރި ކްލާސްރޫމްތައް ހަވާލުކޮށްފި
އިންޑިއާއިން ރާއްޖޭގައި ހިންގާ އިންޑިއަން ގްރާންޓް އެސިސްޓެންޓް ސްކީމުގެ ދަށުން ރ.ކިނޮޅަހާއި ނ.ޅޮހީ ސްކޫލުގައި އަލަށް އިމާރާތްކުރި ކްލާސްރޫމްތައް އިފްތިތާޙްކޮށްފިއެވެ.
މި ކްލާސްރޫމްތައް އިފްތިތާޙްކޮށްފައި ވަނީ އެކަމަށް ޓަކައި ފޮރިން މިނިސްޓްރީގައި ބޭއްވި ޚާއްސަ ރަސްމިއްޔާތެއްގައެވެ. މި ރަސްމިއްޔާތުގައި ރާއްޖޭގެ ފޮރިން ސެކްރެޓަރީ ޢަބްދުލްޣަފޫރު މުޙައްމަދާއި، ސެކެޓްރެޓަރީ މަލްޓިލޭޓަރަލް ޑރ. ހާލާ ހަމީދާއި އިންޑިއާއިން ރާއްޖެއަށް ކަނޑައަޅައިފައި ހުންނަވާ ސަފީރު ސަންޖޭ ސުދީރު ބައިވެރިވެވަޑައިގަތެވެ. އަދި އެޑިއުކޭޝަން މިނިސްޓަރ ޑރ.ޢާއިޝަތު ޢަލީއާއި، މި ދެ ސްކޫލުގެ ޕްރިންސިޕަލުން ވެސް ވަނީ ވަރޗުއަލްކޮށް މި ރަސްމިއްޔާތުގައި ބައިވެރިވެވަޑައިގެންފައެވެ.
ރ.ކިނޮޅަހާއި ނ.ޅޮހީ ސްކޫލުގައި ކްލާސް ރޫމް އިމާރާތްކުރުމުގެ މަސައްކަތްކޮށްފައި ވަނީ އިންޑިއާއިން 2019 ގައި ރާއްޖެއަށް ފޯރުކޮށްދިން 106 މިލިއަން ރުފިޔާގެ މާލީ އެހީގެ ތެރެއިންނެވެ.
މި ދެ ސްކޫލުގައި ކްލާސްރޫމް އިމާރާތްކުރުމަށް މި އެހީގެ ތެރެއިން ގާތްގަނޑަކަށް 12 މިލިއަން ރުފިޔާ ޚަރަދުކޮށްފައިވާކަމަށް ފޮރިން މިނިސްޓްރީން ވިދާޅުވެއެވެ. މި މަޝްރޫޢުގެ ތެރެއިން މިއިން ކޮންމެ ސްކޫލެއްގައި 6 ކްލާސްރޫމް ހިމެނޭހެން 2 ބުރީގެ ބްލޮކެއް އިމާރާތްކޮށްފައިވެއެވެ.
Ads by STO
