އޮޅިގެން ބޮޑު މުސާރަ ޖަމާކުރެވުނު އެކައުންޓުތައް ފްރީޒްކޮށްފި
އަތޮޅު ތެރޭގައި މަސައްކަތްކުރާ ސިއްހީ ހިދުމަތްތެރީންގެ ތެރެއިން ބައެއް ފަރާތްތަކުގެ މުސާރައިގެ ގޮތުގައި އޮޅިގެން ބޮޑެތި އަދަދުތައް ޖަމާ ކުރެވިފައިވާތީ އެ އެކައުންޓްތައް ފްރީޒް ކޮށްފިއެވެ.
މައުލޫމާތު ލިބިފައިވާގޮތުގައި އޮޅިގެން ބައެއް މުވައްޒަފުންނަށް 70000 ރުފިޔާ މުސާރައިގެގޮތުގައި ވަނީ ޖަމާ ކުރެވިފައެވެ. އަދި އަސްލު މުސާރައަށް ވުރެ އިތުރަށް ޖަމާކުރެވިފައިވާ ބައި ބޭނުން ނުކުރުމަށް ފިނޭންސް މިނިސްޓްރީން ވަނީ އެ މުވައްޒަފުންނަށް އަންގައިފައެވެ. އޭގެ އިތުރުން ބޮޑު މުސާރަ ޖަމާ ކުރެވުނު އެކައުންޓްތައް ބޭނުން ނުކުރެވޭ ގޮތަށް ފްރީޒް ކޮށްފައިކަމަށް ވެސް ވަނީ މައުލޫމާތު ލިިބިފައެވެ.
މީގެ އިތުރުން، ބައެއް މުވައްޒަފުންނަށް ލިބޭ މުސާރަ ވަނީ ބޮޑުތަނުން މަދުވެފައިވާ ކަމަށާއި ބައެއް މުވައްޒަފުންނަށް 6000 ރުފިޔާ އަދި 7000 ރުފިޔާ ވެސް މަދުވެފައިވާ ކަމަށް ވެސް ވަނީ މައުލޫމާތު ލިބިފައެވެ.
ސަރުކާރުގެ މުއައްޒަފުންގެ މުސާރަތައް ޖަމާކުރުމުގެ މަސައްކަތް ކުރަނީ ފިނޭންސް މިނިސްޓްރީންނެވެ. ސިއްހީ ދާއިރާގެ ބައެއް މުއައްޒަފުންނަށް މުސާރަ ދިނުމުގައި މިފަދަ މައްސަލަތަކެއް ދިމާވެފައިވީ ނަމަވެސް މިކަމާ ގުޅިގެން ސަރުކާރުގެ ކަމާ ބެހޭ އެއްވެސް ފަރާތަކުން ރަސްމީ ސިފައެއްގައި މިކަމުގެ މައުލޫމާތު ހާމަ ކުރައްވައިފައެއް ނުވެއެވެ. އެހެން ނަމަވެސް މުސާރައިގައި މައްސަލަ އުޅޭކަން ބައެއް ރަށްރަށުގެ ސިއްހީ މަރުކަޒުތަކުން މުވައްޒަފުންނަށް އަންގާފައިވާކަމަށް މައުލޫމާތު ލިބިފައި ވެއެވެ.
Ads by STO
