ހައެއް ފަހެއްގެ ހަމަލާ: ބަޔާން ދެއްވަން ރައީސް ނަޝީދު އެއްބަސްވެވަޑައިގެންފި
ކުރީގެ ރައީސް މުޙައްމަދު ނަޝީދު އަވަހާރަ ކޮށްލަން އަމާޒުކޮށް، މެއި މަހުގެ ހަވަނަ ދުވަހުގެ ރޭ ދިން ނިރުބަވެރި ހަމަލާއާ ގުޅިގެން، އެމަނިކުފާނު ބަޔާން ދެއްވަން އެއްބަސްވެވަޑައިގެންފިއެވެ.
ރައީސް ނަޝީދަށް އަމާޒުކޮށް ދިން އެ ހަމަލާއާ ގުޅިގެން ބަޔާން ދެއްވަން އެމަނިކުފާނު ތައްޔާރަށް ހުންނެވިކަން ހާމަވެފައި ވަނީ، އެ މަނިކުފާނުގެ ޤާނޫނީ ވަކީލުންގެ ފަރާތުން މިއަދު ޕްރޮސެކިއުޓާ ޖެނެރަލް ޙުސެއިން ޝަމީމްއަށް ފޮނުއްވި ސިޓީއަކުންނެވެ.
"ދަ ލިޓިޖަންޓްސް" ލޯ ފާމްގެ ފަރާތުން ރައީސް ނަޝީދުގެ ކޮއްކޯފުޅު އަދި ޤާނޫނީ ވަކީލު ނާޒިމް ސައްތާރު ސޮއެ ކުރައްވާ ޕީޖީ ޝަމީމްއަށް ފޮނުއްވި ސިޓީއެއްގައި ވިދާޅުވެފައި ވަނީ، ރައީސް ނަޝީދު އަވަހާރަ ކޮށްލަން ދިން ނިރުބަވެރި ހަމަލާއާ ގުޅިގެން އެމަނިކުފާނުގެ ފަރާތުން ބަޔާނެއް ދެއްވަން އެދިވަޑައިގެންފައިވާތީ އެފަދަ ބަޔާނެއް ދެއްވަން ރައީސް ނަޝީދު ހުންނެވީ ތައްޔާރަށް ކަމަށެވެ.
އެ ސިޓީގައި އިތުރަށް ވިދާޅުވެފައިވަނީ، މި މައްސަލައިގައި ތުހުމަތު ކުރެވޭ މީހުންގެ ޝަރީޢަތްތަކުގެ އިބްތިދާއީ މަރުހަލާ ނިމުމުގެ ކުރިން ރައީސް ނަޝީދުގެ ބަޔާން ނެންގެވުމަށް އެ މަނިކުފާނު އެދިވަޑައިގަންނަވާ ކަމުގައެވެ.
މެއި މަހުގެ ހަވަނަ ދުވަހުގެ ރޭ ރައީސް ނަޝީދަށް ދިން ހަމަލާއާ ގުޅިގެން ހައްޔަރުކުރި 10 މީހުންގެ ތެރެއިން ދައުވާ ކޮށްފައި ވަނީ ހަތަރު މީހަކަށެވެ. އެއީ ވ. ތިނަދޫ، ހިޔާ، އަދުހަމް އަހުމަދު ރަޝީދާއި މއ. ފޭރުގޭ މުޖާޒް އަހުމަދާއި ގއ. ކޮނޑޭ، ފޮޅޭމާ ތަހުމީން އަހުމަދު އަދި ނ. މަނަދޫ، ނޫރީގެ އަލީ ހައިޝަމްގެ މައްޗަށެވެ.
