އަޅުގަނޑަށް ފުރައްސާރަކޮށް ގަލުން ތަޅާތާ ވަރަށް ދުވަސް ވެއްޖެ: ޖަޒީލް

ވެރިކަން ކުރާ އެމްޑީޕީ އޮފީސް ތެރޭގައި މިއަދު މާރާމާރީ ހިނގީ، އެ ހާދިސާގައި ތުހުމަތު ކޮށްފައިވާ ފަރާތް ކަމުގައިވާ އަހުމަދު ޖަޒީލްއަށް އެ އޮފީސް ތެރޭގައި ކުރަމުން އަންނަ ފުރައްސާރަ ބޮޑުވެގެން ކަމަށް އޭނާ ބުނެފިއެވެ.

Ads by Hajj Corporation

"ދެން"އަށް މައުލޫމާތު ދެމުން އުމުރުން 39އަހަރުގެ ޖަޒީލް ބުނީ އޭނާއަށް ފުރައްސާރަކޮށް، ބަޔަކު އޭނާގެ ގައިގައި "ޕޭވްމަންޓް" ގަލުން ތަޅަމުން ގެންދާތާ ވެސް ދުވަސްތަކެއް ވެފައިވާ ކަމަށެވެ. އޭގެ އިތުރުން އޭނާ ބުނީ، އޭނާގެ ދަރިންނަކީ އޭނާގެ ދަރިންނެއް ނޫނޭ ކިޔައިފައި ވެސް އެކި ގޮތް ގޮތުން ފުރައްސާރަ ކުރަމުން ދިޔަ ކަމަށެވެ.

"އަޅުގަނޑު ހަލާލު ގޮތުގައި ހޯދާފައި ތިބި ދަރިން އެއީ. އެކަމަކު އެއީ އަޅުގަނޑުގެ ދަރިން ނޫން ކަމަށް ބުނެ، ފުރައްސާރަ ކުރަމުންދާތާ ވަރަށް ގިނަ ދުވަސް ވެއްޖެ. މިއަދު އެ ކަންތައްތަކަށް ކެތް ނުކުރެވިގެން އަޅުގަނޑަށް ރައްދު މި ދެވުނީ" ޖަޒީލް ބުންޏެވެ.

ޖަޒީލު ބުނީ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް ނަސީމްގެ މަންމަ މަރިޔަމް ޒުބައިރު (މަންދީ)އަށް މިއަދު ޗޭނުގަނޑަކުން ހަމަލާ ދެވުނީ ވެސް އެފަދަ ފުރައްސާރައިގެ ބަސްތައް އޭނާއަށް އަމާޒު ވުމުގެ ސަބަބުން ކަމަށެވެ.

މީގެ އިތުރުން ޖަޒީލް ބުނީ އޭނާއަކީ އުމުރުން 16 އަހަރުން ފެށިގެން އެމްޑީޕީއަށް ޚިދުމަތް ކުރަމުން ގެންދިޔަ ފަރާތެއް ކަމަށާއި ނަމަވެސް އޭނާއަށް ކުރަމުންދާ ފުރައްސާރައާ ގުޅިގެން އެ ޕާޓީ ތެރެއިން އެއްވެސް އިންސާފެއް ލިބިފައި ނުވާ ކަމަށެވެ.

މިއީ ފުރައްސާރައިގެ ބަސްތަކުގެ ސަބަބުން ހިނގި ހަމަލާއެއް ކަމަށް ޖަޒީލް ކިޔައި ދިން ނަމަވެސް، މި ހަމަލާއާ ގުޅިގެން މީކާއިލް ގެ ބަސް ތަފާތެވެ. އެގޮތުން މީކާއިލް މިއަދު ވިދާޅުވެފައި ވަނީ، އޭނާގެ މަންމައަށް މެންދުރު އެމްޑީޕީ އޮފީސް ތެރޭގައި ހަމަލާ ދީފައި ވަނީ މަސްތުވެގެން ހުރި މީހެއް ކަމަށެވެ.