ހައްލަކީ ވަގުތުން ތަންފީޒް ކުރަން ފަސޭހަ ބަރުލަމާނީ ފެޑްރަލް ނިޒާމު: ބޮންޑޭ
ވަޒީރު ބޯޑުން ވަޒީރަށް ލަފާ ނުލިބިގެން މިނިމަމް ވޭޖް ކަނޑަނޭޅި ދިއުމަކީ އިންސާނީ ހަމަ ބުއްދި ގަބޫލުކުރާނެ ކަމެއް ނޫން ކަމަށާއި ހައްލަކީ ވަގުތުން ތަންފީޒުކުރަން ފަސޭހަ ބަރުލަމާނީ ފެޑްރަލް ނިޒާމުކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) ވިދާޅުވެއްޖެއެވެ.
ބޮންޑޭ މިހެން ވިދާޅުވިއިރު މިނިމަމް ވޭޖަކީ މި ސަރުކާރުގެ ރިޔާސީ ވައުދެކެވެ.
"ވަޒީރު ބޯޑުން ވަޒީރަށް ލަފާ ނުލިބިގެން މިނިމަމްވޭޖް ކަނޑަނޭޅި ދިއުމަކީ އިންސާނީ ހަމަ ބުއްދި ގަބޫލުކުރާނެ ކަމެއް ނޫން . ރިޔާސީ މަސްހުނި ނިޒާމުން މިރުސް ފިޔާ ހޮވަން ތިއްބާ ދައުރު ނިމިދޭ ! ހައްލަކީ ވަގުތުން ތަމްފީޒް ކުރަން ފަސޭހަ ބަރުލަމާނީ ފެޑްރަލް ނިޒާމު" ބޮންޑޭގެ ޓްވީޓްގައި ވިދާޅުވިއެވެ.
ބޮންޑޭއަކީ ވެރިކަން ކުރުމުގެ ނިޒާމު ރިޔާސީ ނިޒާމުން ބަރުލަމާނީ ނިޒާމަށް ބަދަލުކުރުމަށް އެންމެ ފާޅުކަން ބޮޑުގޮތެއްގައި މަސައްކަތް ކުރައްވާ އެއް މެމްބަރެވެ. މިގޮތުން ބަރުލަމާނީ ނިޒާމު ގެނައުމުގެ ޕެޓިޝަނެއް ހައްދަވައި ސޮއިކުރެއްވުމުގައި ވެސް ބޮންޑޭ ދަނީ އިސްކޮށް ހަރަކާތްތެރިވަމުންނެވެ.
މި ޕެޓިޝަނުގައި ސޮއިކުރުން އިފްތިހާހް ކުރުމަށް ބޭއްވި ބައްދަލުވުމުގައި މެމްބަރު ބޮންޑޭ ވިދާޅުވީ، ހަގީގީ ލާމަރުކަޒީ ނިޒާމަކުން ގައުމު ހިންގޭނީ ބަރުލަމާނީ ނިޒާމަކަށް ބަދަލުކޮށްގެން ކަމަށާއި ރައްޔިތުން ރައީސުލްޖުމްހޫރިއްޔާ އިންތިހާބު ކުރުމުން، ރައީސް ބަޔަކު ހޮވައިގެން ކެބިނެޓެއް އެކުލަވައިލުމަކީ "އޮލިގާކީ"ގެ ސިފައެއް ކަމަށެވެ.
