އަލީ ވަހީދުގެ އިންޒާރެއް: ދައްކަން އުޅުނު ވާހަކަ ދައްކާނަން!
އިނގިރޭސި ވިލާތުގެ އިމިގްރޭޝަންގެ ކުށްތަކެއްގައި އެ ގައުމުގައި ހައްޔަރު ކޮށްފައިވާ، ރާއްޖޭގެ ކުރީގެ ޓޫރިޒަމް މިނިސްޓަރު އަލީ ވަހީދުގެ ޓްވީޓެއް އަނެއްކާ ވެސް ފެންމަތިވެއްޖެއެވެ.
ކުއްލި ގޮތަކަށް ރޭ އަލީ ވަހީދު ކުރެއްވި ޓްވީޓުގައި ދިވެހި ދައުލަތަށް މެސެޖެއް ދެއްވަމުން އޭނާ ވިދާޅުވެފައި ވަނީ ސިޔާސީ ދައުވާތަކާއި މީހުން ފްރޭމް ކުރުމާއި އަނިޔާވެރިކަމުގެ ކުރިމަތީ "ފަހަތަށް" ނުޖެހޭނެ ކަމަށެވެ.
"އިންސާފުވެރި ޢަދުލުވެރި ޝަރުޢީ ނިޒާމެއް ދިވެހި ރައްޔިތުންނަށް ހޯދައި ދިނުމަށް ޓަކައި ވާން ޖެހުނު ކޮންމެ ޤުރުބާނީއެއް ވާނަން. އިރާދަފުޅުން ދައްކަން އުޅުނު ވާހަކަ ދައްކާނަން. އެނބުރި އަންނާނަން" އަލީ ވަހީދު ވިދާޅުވެފައިވެއެވެ.
މިއީ ޓޫރިޒަމް މިނިސްޓްރީގެ މުވައްޒަފުންތަކަކަށް ޖިންސީ ގޯނާކުރި ކަމަށް ތުހުމަތު ކުރެވޭ މައްސަލައެއްގައި ދައުވާ އުފުލާފައި ވަނިކޮށް، ބޭސްފަރުވާއަށް އިނގިރޭސި ވިލާތަށް ވަޑައިގެންނެވި ގޮތަށް، ރާއްޖެ ވަޑައިނުގެން އެ ގައުމުގައި ހުންނަވަނިކޮށް، މިދިޔަ މަހުގެ 25 ގައި އަލީ ހައްޔަރުކުރި ފަހުން ކުރެއްވި ފުރަތަމަ ޓުވީޓެވެ. ނަމަވެސް އެތަނުގައި ހުންނަވައިގެން ހައްޔަރު ކުރުމުގެ ކުރިން ވެސް އޭނާ ވަނީ ޓްވީޓެއް ކުރައްވައިފައެވެ.
ރޭގައި ޓުވީޓް ކުރެއްވިއިރު އިނގިރޭސި ވިލާތުގެ ކަމާ ގުޅޭ އިދާރާގެ ބަންދުން އަލީ ވަހީދު މިނިވަންވި ކަމެއް އަދި އެނގިފައެއް ނުވެއެވެ. ވިސާގެ މުއްދަތު އިތުރު ކުރަން ނުވަތަ ނުކުރުމާ މެދު އެ ގައުމުގެ ކަމާ ބެހޭ ފަރާތްތަކުން ގޮތެއް ނިންމި ކަމެއް ވެސް އަދި އެނގިފައެއް ނުވެއެވެ.
