އެމްއެންޕީގެ ޓީޝާޓް ދައްކައިލައިފި
މޯލްޑިވްސް ނޭޝަނަލް ޕާޓީ (އެމްއެންޕީ)ގެ ޓީޝާޓު ދައްކައިލައިފިއެވެ.
އެމްއެންޕީގެ ޓީޝާޓް ދައްކާލައިފައި ވަނީ އެ ޕާޓީން އަތޮޅު ތެރެއަށް ކުރަމުންދާ ދަތުރުތަކުގެ ތެރެއިން ލ.އަތޮޅަށް މިހާރު ކުރަމުން އަންނަ ދަތުރުގައެވެ. ލާމު އަތޮޅުގައި މިހާރު ހަރަކާތްތެރިވާ ޓީމުގައި އިސްކޮށް ހުންނެވީ އެމްއެންޕީ އުފެއްދުމުގައި އިސްކޮށް ހަރަކާތްތެރިވާ ތިމަރަފުށީ ދާއިރާގެ މެމްބަރު އަބްދުﷲ ރިޔާޒެވެ. މި ދަތުރުގައި ލާމު އަތޮޅުގެ ހުރިހާ ރަށަކަށް ދިއުމަށް ވަނީ ހަމަޖެހިފައެވެ.
އެމްއެންޕީ، ސިޔާސީ ޕާޓީއެއްގެ ގޮތުގައި އުފެއްދުމަށް އިލެކްޝަންސް ކޮމިޝަނުން މިދިޔަ މަހުގެ 15 ވަނަ ދުވަހު ހުއްދަ ދީފައި ވަނީ ވިލިމާލެ ދާއިރާގެ މެންބަރު އަޙްމަދު އުޝާމަށެވެ. އެއަށް ފަހު އެ ޕާޓީންދަނީ ޕާޓީ އުފެއްދުމަށް ބޭނުންވާ މީހުންގެ ސޮއި ހޯދުމުގެ މަސައްކަތް ކުރަމުންނެވެ. އިލެކްޝަން ކޮމިޝަންގެ ޤަވާއިދުގައިވާ ގޮތުގައި، ޕާޓީ އުފެއްދުމަށް ހުއްދަ ދޭތާ، ތިން މަސް ދުވަހުގެ ތެރޭގައި ޕާޓީއަށް 3،000 މީހުންގެ ސޮއި ހަމަ ކުރަން ޖެހެއެވެ.
އެމްއެންޕީން މީގެ ކުރިން ހާމަކޮށްފައިވާ ގޮތުގައި އެ ޕާޓީ ހެދުމަށް ބޭނުންވާ 3،000 މެންބަރުންގެ ސޮއި މިހާރު ވަނީ ލިބިފައެވެ. އަދި އެ ޕާޓީން މަސައްކަތް ކުރަނީ ޕާޓީ އުފެއްދުމަށް އިލެކްޝަނަށް ހުށަހަޅާއިރު 5،000 މެމްބަރުންނަށްވުރެ ގިނަ މީހުންގެ ސޮޔާ އެކު އިލެކްޝަނަށް ހުށަހަޅައި އެންމެ ގިނަ މީހުންގެ ސޮއާ އެކު ހެދި ޕާޓީގެ ރިކޯޑް ހޯދުމަށެވެ.
އެމްއެންޕީއަށް މީހުން ވެއްދުމަށް އެ ޕާޓީން ގިނަ ހަރަކާތްތެއް ހިންގަމުން އަންނައިރު، ކޮންމެ ހަފްތާ ބަންދަކާ ދިމާކޮށް ރާއްޖޭގެ އެކި އަތޮޅުތަކަށްދަނީ ޒިޔާރަތްކޮށް، މެންބަރުން އިތުރު ކުރުމުގެ ހަރަކާތްތަކެއް ހިންގަމުންނެވެ. އަދި ރާއްޖޭގެ އެކި ސަރަހައްދުތަކުގައި އެ ޕާޓީގެ ފޯކަލް ޕޮއިންޓްތައް ހަމަޖައްސަމުން އަންނައިރު، ދާދިފަހުން އައްޑޫގައި އެ ޕާޓީގެ އޮފީހެއްވަނީ ހުޅުވައިފައެވެ.
