ރައީސް ޔާމީންގެ ޝަރީއަތް: ދެ ފަރާތުން ވެސް މިއަދު އާ ހެކިތަކެއް ހުށަހެޅި
ސުޕްރީމް ކޯޓުގައި މިއަދު ކުރިއަށް ދިޔަ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ އިސްތިއުނާފް މައްސަލައިގައި އެމަނިކުފާނުގެ ފަރާތްޕުޅުން އަދި ދައުލަތުގެ ފަރާތުން އައު ހެކިތަކެއް ޝަރީއަތަށް ހުށަހަޅައިފިއެވެ.
މަނީ ލޯންޑަރިންގެ ދައުވާ ސާބިތުވާކަމަށް ކަނޑައަޅައި ފަސް އަހަރު ދުވަހަށް ޖަލަށް ލައި، ފަސް މިލިއަން ޑޮލަރުގެ ޖޫރިމަނާއެއް ދެއްކުމަށް ރައީސް ޔާމީންގެ މައްޗަށް ހުކުމް ކުރީ 28 ނޮވެމްބަރ 2019ގައެވެ.
ދަށު ކޯޓުން ކުރި އެ ހުކުމް ހައި ކޯޓުގައި އިސްތިއުނާފު ކުރުމަށް ހުށަހެޅުމުން، މި އަހަރުގެ ޖެނުއަރީ މަހުގެ 21 ވަނަ ދުވަހު އެ ކޯޓުން ވެސް ވަނީ ކްރިމިނަލް ކޯޓުގެ ހުކުމަށް ތާއީދު ކޮށްފައެވެ.
ރައީސް ޔާމީންގެ ފަރާތުން އެ މައްސަލަ ސުޕްރީމް ކޯޓުގައި އިސްތިއުނާފު ކުރުމަށް ބޭއްވި ޝަރީއަތުގެ އަޑުއެހުންތައް މިއަދު ފަށައިފައިވާއިރު އެ މައްސަލަ ބައްލަވާ ބެންޗުގެ ރިޔާސަތުގައި އިންނެވި ފަނޑިޔާރު މަހާޒު އަލީ ވިދާޅުވީ ދެ ފަރާތުން ވެސް އައު ހެކިތަކެއް ޝަރީއަތަށް ހުށަހަޅައިފައިވާ ކަމަށެވެ.
ނަމަވެސް އެ ހެކިތައް ބަލައިގަތުމާ މެދު ގޮތެއް ނިންމޭނީ ވާހަކަދެއްކުމަށް ފަހު ކަމަށާއި އެކަމާ މެދު ކުރިއަށް ހުރި އަޑުއެހުންތަކުގައި ގޮތެއް ނިންމަވާނެ ކަމަށް ވެސް ފަނޑިޔާރު ވިދާޅުވިއެވެ.
ރައީސް ޔާމީންގެ ފަރާތްޕުޅުން މި މައްސަލަ އިސްތިއުނާފް ކުރިއިރު 22 ނުކުތާއެއް ފާހަގަކުރައްވައިފައިވެއެވެ. އަދި އޭގެތެރެއިން ހަތް ނުކުތާއެއް މިއަދު ވަނީ ކޯޓަށް ހުށަހަޅައިފައެވެ.
މި މައްސަލައިގައި ދެން ހުރި ނުކުތާތަކާ ގުޅިގެން ވާހަކަދެއްކުމަށް މާދަމާ ހެނދުނު 9:00އަށް އިތުރު އަޑުއެހުމެއް ވަނީ ތާވަލްކޮށްފައެވެ.
Ads by STO
