މިހާތަނަށް ތަޙްޤީޤީ އިދާރާއަކުން އެއްވެސް ސުވާލެއްކޮށްފައެއް ނުވޭ: އަލީ ވަހީދު
ކުރީގެ ޓޫރިޒަމް މިނިސްޓަރު އަލީ ވަހީދަށް ކުރާ ތުހުމަތުތަކާ ގުޅިގެން މިހާތަނަށް އެއްވެސް ސުވާލެއް ތަޙްޤީޤީ އިދާރާއަކުން ކޮށްފައިނުވާ ކަމަށް އޭނާ ވިދާޅުވެއްޖެއެވެ.
އިނގިރޭސި ވިލާތުގައި ހުންނަވައިގެން މިހާރު ކުރިޔަށްދާ ނޫސްވެރިންގެ ބައްދަލުވުމެއްގައި އަލީ ވަހީދު ވިދާޅުވީ، ޖުލައި 19 ވަނަ ދުވަހު އޭނާ ފުލުހަށް ހާޒިރު ކުރި ނަމަވެސް ތުހުމަތު ކުރެވޭ އެއްވެސް ކަމަކާއި ގުޅިގެން ސުވާލެއް ނުކުރާކަމަށެވެ. މީގެ އިތުރުން އެ މައްސަލައާ ގުޅިގެން މަޤާމުން ވަކިކުރި ފަހުން މިހާތަނަށް ދައުލަތުގެ އެއްވެސް އިދާރާއަކުން އެއްވެސް ސުވާލެއް ކޮށްފައި ނުވާކަމަށް ވެސް އަލީ ވަހީދު ވިދާޅުވިއެވެ.
“އެންމެ ފުރަތަމަ މަގާމުން ވަކި ކުރުމާ ހިސާބުން ވެސް، އަދި މިއަދާ ޖެހެންދެން ވެސް، އެއްވެސް ގާނޫނީ އިދާރާއަކުން އަޅުގަނޑުގަނޑުގެ މައްޗަށް ކުރާ ތުހުމަތު ތަކާ ބެހޭ އެއްވެސް ސުވާލެއް ކޮށްފައެއް ނުވޭ. އަޅުގަނޑު މިއަދު ޗެލެންޖް ކޮށްފައި ދަންނަވަން ޖުލައި މަހުގެ 19ވަނަ ދުވަހު އަޅުގަނޑު ގެންދިޔައީ ފުލުސް އޮފީހަށް. އެ ރޭ ޕޮލިހަށް ދިޔައިރު އަޅުގަނޑުގެ ދެފަރާތުގަ ތިބޭނެ ދެ ވަކީލުން. ވީޑިއޯ ކެމެރާއަކުން ތަހުގީގް ވީޑިއޯ ކުރަމުން ދިޔަ. އެއްވެސް ސުވާލެއް، އެއްވެސް ސުވާލެއް ކޮށްފައެއް ނެތް” އަލީ ވަހީދު ވިދާޅުވިއެވެ.
މީގެ އިތުރުން މިރޭގެ ޕްރެސްގައި އަލީ ވަހީދު ވަނީ ސަރުކާރުން ދައްކަމުންދާ ހުރިހާ ވާހަތަކަކީ ހަދަ ހަދައިގެން ވަކި ސިޔާސީ މަގުސަދެއްގައި ދައްކަމުންދާ ވާހަކަތަކެއްކަމަށް ވެސް ވިދާޅުވެފައެވެ. އަދި މިހާތަނަށް ކުރި އެއްވެސް ތަހްގީގަކުން، ކުށް ސާބިތުކުރަން ބޭނުންވި އެއްވެސް ކަމަކަށް ހެއްކެއް ފެނިފައި ނުވާކަމަށް އަލީ ވަހީދު ވިދާޅުވިއެވެ.
