ރައީސް ޞާލިޙް މަޤާމުން އެކަހެރި ކުރަން މަޖިލީހަށް ހުށަހެޅި މައްސަލަ ތާވަލެއް ނުކުރި
އެމްއެމްޕީއާރސީގެ ޚިޔާނާތުގެ ފައިސާގެ ތެރެއިން 35 މިލިއަނަށް ވުރެ ގިނަ ރުފިޔާ ރައީސް އިބްރާހީމް މުޙައްމަދު ޞާލިހް ނެންގެވި ކަމަށް ކުރީގެ ޓޫރިޒަމް މިނިސްޓަރ އަލީ ވަހީދު ތުހުމަތު ކުރެއްވުމުން އެކަން ބަލައި ނިމެންދެން ރައީސް ޞާލިޙް މަޤާމުން އެކަހެރި ކުރުމަށް މަޖިލީހަށް ހުށަހެޅި ކުއްލި މައްސަލަ މިއަދުގެ މަޖިލީހުގައި އެންޖެންޑާ ނުކޮށް، އެޖެންޑާގައި ހުރި އެހެން ކަންތައްތައް ކުރިޔަށް ގެންދަން ފަށައިފިއެވެ.
މަޖިލީހުގެ ޤަވާއިދުގެ ތެރެއިން ކުއްލި މައްސަލައެއް މަޖިލީހަށް ހުށަހަޅައިފި ނަމަ އެންމެ ފުރަތަމަ ކުރިޔަށް ގެންދަން ޖެހޭނީ އެ މައްސަލައެކެވެ. އެހެން ނަމަވެސް މިއަދުގެ މަޖިލީހުގައި މިގޮތަށް ކަންތައް ކުރައްވައިފައެއް ނުވެއެވެ. ކުއްލި މައްސަލަ ހުށަހެޅުއްވި އިދިކޮޅު ޕީއެންސީގެ ޕާލިމެންޓްރީ ގްރޫޕްގެ ލީޑަރު އަދި މަޑުއްވަރީ ދާއިރާގެ މެންބަރު އާދަމް ޝަރީފް ވަނީ ކަންބޮޑުވުން ފާޅު ކުރައްވައިފައެވެ.
"މިއަދު އަޅުގަނޑު ހުށަހެޅި ކުއްލި މައްސަލައެއް ރިޔާސަތުން ޓޭބަލް ނުކުރެއްވީތީ އަޅުގަނޑު ކަންބޮޑުވާ ވާހަކަ ދަންނަވަން" މަޖިލީހުގައި ވާހަކަފުޅު ދައްކަވަމުން އާދަމް ޝަރީފް ވިދާޅުވިއެވެ.
އާދަމް ޝަރީފް ހުށަހެޅުއްވި ކުއްލި މައްސަލައިގައި ވިދާޅުވީ އެމްއެމްޕީއާރސީގެ ޚިޔާނާތުގެ ފައިސާގެ ތެރެއިން 35 މިލިއަނަށް ވުރެ ގިނަ ރުފިޔާ، އެމް.ޑީ.ޕީގެ ކުރީގެ ޕީ.ޖީ ލީޑަރު އަދި މިހާރުގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ނެންގެވިކަމަށް ކުރިން ވެސް ތުހުމަތު ކުރެވިފައި ވަނިކޮށް، ރައީސް އިބްރާހީމް މުޙައްމަދު ޞާލިހުގެ ފުރަތަމަ ޓޫރިޒަމް މިނިސްޓަރު އަދި އެމް.ޑީ.ޕީގެ ކުރީގެ ޑެޕިޔުޓީ ޕީ.ޖީ ލީޑަރުކަމާއި އެމްޑީޕީގެ ޗެއަރޕަރސަންކަން ވެސް ކުރައްވައިފައިވާ ޢަލީ ވަހީދު، 20 ސެޕްޓެންބަރު 2021 ވަނަ ދުވަހުގެ ރޭ ބޭއްވި ނޫސް ކޮންފަރެންސެއްގައި، ރެހެންދި ފްލެޓްގައި އަޙުމަދު އަދީބު ދިރިއުޅުއްވި އެޕާޓްމެންޓުން ކަޅު ދަބަހެއްގައި ރައީސް އިބްރާހީމް މުޙައްމަދު ޞާލިޙު، 35 މިލިއަނަށް ވުރެ ގިނަ ފައިސާ ގެންދެވިކަމަށާއި، އެކަން ސާބިތުވާނެ ސީސީޓީވީ ފުޓޭޖް ހުންނާނެކަމަށް ވިދާޅުވެ، ދިވެހިރާއްޖޭގެ ރައްޔިތުންނާއި ނޫސްވެރިންގެ ކުރިމަތީގައި ރައީސް އިބްރާހީމް މުޙައްމަދު ޞާލިޙުގެ މައްޗަށް ކަންބޮޑުވާ ފަދަ ބޮޑެތި ތުހުމަތުތަކެއް ކުރައްވައިފައިވާތީއާއި، އެމްއެމްޕީއާރސީގެ ޚިޔާނާތުގެ މައްސަލައިގައި ފުލުހުންގެ ތަޙުޤީޤަށް މުޙައްމަދު ޙުސައިން (އޮއިއްޓޭ) ދެއްވި ބަޔާނުގައި ރައީސް އިބްރާހިމް މުޙައްމަދު ސާލިޙު، އަޙުމަދު އަދީބު އަތުން ފައިސާ ގެންދެވިކަމަށް ބުނާ ބައިތައް ސަރުކާރުން ނުފޫޒު ފޯރުވައިގެން ބަދަލުކޮށް، ރައީސް އިބުރާހީމް މުޙައްމަދު ޞާލިޙުގެ ނަންފުޅު ތަޙުޤީޤު ބަޔާނުން އުނިކޮށްފައިވާތީވެ، ރައީސުލްޖުމްހޫރިއްޔާކަން ކުރައްވަމުންގެންދަވާ ބޭފުޅަކާ މެދު މިފަދަ ބޮޑު ތުހުމަތެއް ކުރެވެމުންދާތީވެ، މިނިވަން، އިންޞާފުވެރި ތަޙުޤީޤަކަށް މަގުފަހިކުރުމަށް ޓަކައި ތަޙުޤީޤު ނިމެންދެން، ޤާނޫނުއަސާސީގެ 115 ވަނަ މާއްދާގައި ބަޔާންކުރާ ރައީސުލްޖުމްހޫރިއްޔާގެ ބާރުތަކާއި މަސްއޫލިއްޔަތުތަކުން ރައީސް އިބްރާހީމް މުޙައްމަދު ޞާލިޙު، އެކަހެރިވެވަޑައިގަތުމަށާއި އެމްއެމްޕީއާރސީގެ ފައިސާ ރައީސް އިބްރާހީމް މުޙައްމަދު ޞާލިޙު ނެންގެވި މައްސަލަ ސަރުކާރުގެ ސަމާލުކަމަށް ގެނައުމަށާއި، މި މައްސަލަ ދިވެހި ފުލުހުންނާއި އެންޓި ކޮރަޕްޝަން ކޮމިޝަނުން، އިންޞާފުވެރި، ހަ ފުށް ފެންނަ ގޮތަކަށް ތަޙްޤީޤު ކުރެއްވުމަށް ގޮވައިލައި، ރައްޔިތުންގެ މަޖިލީހުގެ ޤަވާއިދުގެ 170 ވަނަ މާއްދާގެ ދަށުން ކުއްލި މައްސަލައެއް ހުށައަޅާ ކަމަށެވެ.
