ހޯމަ ދުވަހު ދޫކުރާނެ ކަމަށް ބުނި އެޗް އެސް ސީ ނަތީޖާ ދޫކުރުން ފަސްކޮށްފި
މިއަހަރު އެޗްއެސްސީ އިމްތިހާނު ހެދި ދަރިވަރުންގެ ނަތީޖާ އަންނަ ހަފްތާގެ ހޯމަ ދުވަހުން ފެށިގެން ދޫކުރަން ނިންމައި އެކަން އިއުލާނު ކުރުމަށް ފަހު ނަތީޖާ ދޫކުރުން ފަސްކޮށްފިއެވެ.
ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ)އިން ކޮށްފައިވާ އިއުލާނެއްގައި ވިދާޅުވީ ޑިޕާޓްމަންޓުގެ ސާވަރ ސިސްޓަމަށް 2021 ސެޕްޓެންބަރު 21 ވަނަ ދުވަހު ދިމާވި މައްސަލަޔަކާ ގުޅިގެން ސާވަރ މެދުވެރިކޮށް، ކުރަން ޖެހޭ މަސައްކަތް ވަގުތީގޮތުން ހުއްޓިފައިވާ ކަމަށާއި ސާވަރއަށް ދިމާވި މައްސަލަ ހައްލުކުރުމުގެ މަސައްކަތް ކުރިއަށް ގެންދާކަމަށެވެ.
"އެހެންކަމުން މިއަދު ދޫކުރުމަށް ހަމަޖެހިފައިވާ އެޗް.އެސް.ސީ އިމްތިހާނުގެ ނަތީޖާ ދޫކުރުން ފަސްކުރެވިފައިވާ ވާހަކަ ދެންނެވީމެވެ. ސާވަރއަށް ދިމާވި މައްސަލަ ޙައްލުކުރެވުމުން ނަތީޖާ ދޫކުރާނެ ވާހަކަ ދަންނަވަމެވެ. ނަތީޖާ ދޫކުރެވޭނެ ސީދާ ތާރީޚެއް އެނގޭނީ ސާވަރގެ މައްސަލަ ޙައްލުކުރެވުމުން ކަމުގައި ވެސް ދެންނެވީމެވެ." ޑީޕީއީގެ އިއުލާނުގައި ބުނެފައިވެއެވެ.
ޑީޕީއީ އިން ކުރިން ވިދާޅުވެފައިވާ ގޮތުން ޖޫން މަހު ބޭއްވުނު އެޗް.އެސްސީ އިމްތިހާނު ހެދި ދަރިވަރުންގެ ތެރެއިން މި ހިނގާ ސެޕްޓެންބަރު މަހު ނަތީޖާ ދޫކުރުމަށް ހަމަޖެހިފައި ވަނީ، ޖޫން މަހު ޓީޗަރ ބޭސްޑް އެސެސްމެންޓް ހެދި ދަރިވަރުންނަށް އެކަނި ކަމަށެވެ.
