މޯލްޑިވްސް ނެޝަނަލް ޕާޓީ (އެމްއެންޕީ)ގެ އިންޓެރިމް އެގްޒެކިއުޓިވް ކައުންސިލްގެ އޮނިގަނޑު އެކުލަވައިލައިފިއެވެ.
އެމްްއެންޕީގެ ތަރުޖަމާނު އަސްރާ އަހްމަދު ވިދާޅުވީ އެގޮތުން އިންޓެރިމް އެގްޒެކިއުޓިވް ކައުންސިލަށް ރައީސަކާއި ހަ ނާއިބު ރައީސުން އަދި ވިމެންސް ވިންގުން އަދި ޔޫތު ވިންގުގެ ލީޑަރުންގެ އިތުރުން 21 ކައުންސިލް މެމްބަރުން ދެ ފުށް ފެންނަ ވޯޓަކުން ހޮވިގެން ދާނެ ކަމަށެވެ.
އެމްއެންޕީން މިއަދުު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން މައްޗަންގޯޅީ ދެކުނު ދާއިރާގެ ކުރީގެ މެމްބަރު އަބްދުﷲ ސިނާން ވިދާޅުވީ ފަސް ދާއިރާއަކުން ނާއިބު ރައީސުން އައްޔަންކުރުމަށް ވެސް ނިންމައިފައިވާ ކަމަށެވެ.
އޭގެ ތެރޭގައި އަޕާ ނޯތު ދާއިރާ (ހއ. ހދ. ށ. އަދި ނ. އަތޮޅު)، ނޯތު ދާއިރާ ( ރ. ބ. އަދި ޅ. އަތޮޅު)، ސެންޓްރަލް ދާއިރާ (މ.ވ ކ. އއ. އަދި އދ. އަތޮޅު)، ސައުތު ސެންޓްރަލް ދާއިރާ (ފ.ދ.ތ. އަދި ލ) އަދި ސައުތު ދާއިރާ (ގއ. ގދ. ޏ. އަދި އައްޑޫ ސިޓީ) ހިމެނެއެވެ.
އެމްއެންޕީ ރަޖިސްޓަރކުރުމަށް މިހާރު ވަނީ އިލެކްޝަންސް ކޮމިޝަނަށް ހުށަހަޅައިފައެވެ. ރަޖިސްޓްރީ ކުރުމަށް ހުށަހަޅައިފައި ވަނީ ދިވެހިރާއްޖޭގައި މީހުން ދިރިއުޅޭ ހުރިހާ ރަށެއް ހިމެނޭ ގޮތަށް ރާއްޖޭގެ އެކިކަންކޮޅުތަކުން 5000 މެންބަރުންނަށް ވުރެ ގިނަ ފޯމާއެކުއެވެ. އިލެކްޝަންސް ކޮމިޝަނުން މޯލްޑިވްސް ނެޝަނަލް ޕާޓީގެ ނަމުގައި ސިޔާސީ ޕާޓީއެއް އުފެއްދުމަށް މަސައްކަތް ކުރުމުގެ ހުއްދަ ދެއްވައިފައި ވަނީ 15 ޖުލައި 2021 ގައެވެ.