ތަހުގީގުކުރުމުގެ ޚާއްސަ ގަވާއިދު މުރާޖަޢާކުރުމުގެ މައްސަލަ ބޭރުކޮށްލައިފި
ތަހުގީގުކުރުމުގެ ޚާއްސަ ގަވާއިދު މުރާޖަޢާކުރުމަށް ރައްޔިތުންގެ މަޖިލީހަށް މާވަށު ދާއިރާގެ މެމްބަރު މުހައްމަދު ސައީދު ހުށަހެޅުއްވި މައްސަލަ މަޖިލީހުން ބޭރުކޮށްލައިފިއެވެ.
މާވަށު ދާއިރާގެ މެމްބަރު މަޖިލީހަށް ހުށައެޅުއްވި މިމައްސަލައިގައި ބުނެފައި ވަނީ ޤާނޫނު ނަމްބަރު 34/2020 ދިވެހި ފުލުހުންގެ ޚިދުމަތުގެ ޤާނޫނު 102ވަނަ މާއްދާގެ (ނ)އާއި، 133 ވަނަ މާއްދާގެ (ނ)ގެ (14)ވަނަ ނަމްބަރުން ބާރުލިބިގެން އެކުލަވައިލައިފައިވާ ތަޙުޤީޤުކުރުމުގެ ޚާއްޞަ އުކުޅު ބޭނުންކުރުމުގެ ޤަވައިދު ޤާނޫނު އަސާސީން ރައްޔިތުންނަށް ލިބިދޭ ބައެއް އަސާސީ ޙައްޤުތަކާއި މިނިވަންކަމާއި ތަޢާރަޒުވާ ކަމަށެވެ. އަދި މި ޤަވައިދުގެ ދަށުން ފަރުދުންގެ ޒާތީ ދިރިއުޅުމުގެ މިނިވަންކަމަށް ހުރަސްއެޅޭ ކަމަށާއި ފަރުދުންގެ އަމިއްލަ ހުރިހާ
ޙަރަކާތްތައް ބަލައި ޗެކްކޮށް ފާރަލުމާއި، ކެމެރާއާއި އިލެކްޓްރޯނިކް ވަސީލަތްތައް ބޭނުންކޮށްގެން ފާރަލުމާއި، އަދި އާޓިފިޝަލް އިންޓެލިޖެންސް ވަސީލަތްތައް ބޭނުންކޮށްގެން ފަރުދުންގެ މައުލޫމާތުތައް ހޯދާ އެފަދަ ކަންކަމުގައި ބައިވެރިކޮށްގެން ކުށަށް އަރައިގަތުމަށް ފުރުސަތު ލިބޭ ފަދަ ކަންކަން ހިމެނޭކަމަށެވެ.
މީގެ އިތުރުން މިއީ ރައްޔިތުންގެ ދިރިއުޅުމުގެ ޙައްޤަށް އަރައިގަތުންކަމަށް ދެކޭ ކަމަށާއި ޤާނޫނު އަސާސީން ލިބިދޭ އެއްވެސް ޙައްގެއް ޤާނޫނަކުން ވިޔަސް އަދި ޤަވައިދަކުން ވިޔަސް ނިގުޅައި ނުގަނެވޭނެކަމަށް މި މަައްސަލައިގައި ވަނީ ބުނެފައެވެ.
އެހެންކަމުން ޙައްޤެއް ނުވަތަ މިނިވަންކަމެއް ނިގުޅައިގަނެވޭގޮތަށް ޤާނޫނުއަސާސީ މާނަ ވެސް ނުކުރެވޭނެކަމަށް ކަނޑައެޅިގެން ބަޔާންކުރެވިފައި ވާތީ، ތަޙުޤީޤުކުރުމުގެ ޚާއްޞަ އުކުޅު ބޭނުންކުރުމުގެ ޤަވައިދު އަލުން މުރާޖައާ ކުރުމަށް ސަރުކާރުގެކަމާ ބެހޭ މުއައްސަސާތަކަށް ގޮވައިލާކަމަށް މިމައްސަލަ ހުށައަޅުއްވަމުން މެމްބަރު ސައީދު ވިދާޅުވިއެވެ.
މެމްބަރު ސައީދު ހުށައެޅުއްވި މިމައްސަލަ ބަލައިގަންނަން ފެންނަ ކަމަށް ވޯޓް ދެއްވީ 7 މެމްބަރުންނެވެ. ބަލައިގަންނަން ނުފެންނަ ކަމަށް 22 މެމްބަރުން ވޯޓު ދެއްވިއެވެ. އެހެންކަމުން މިމައްސަލަ ވަނީ މަޖިލީހުން ބޭރުކޮށްލައިފައެވެ،
