2023 އާ ހަމައަށް ހުރިހާ ރަށަކަށް ލޯކަލް ޓޫރިޒަމް ފުޅާކުރުމަކީ އަމާޒެއް: ރައީސް ޞާލިޙް

މީހުން ދިރިއުޅޭ ހުރިހާ ރަށަކަށް 2023ވަނަ އަހަރު ނިމުމުގެ ކުރިން ގެސްޓްހައުސްއާއި ހޯމް ސްޓޭގެ ޚިދުމަތް ފުޅާކުރުމަށް ޓަކައި މަސައްކަތް ކުރަމުން އަންނަ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

Ads by Sosun Fihaara

ރައީސުލްޖުމްހޫރިއްޔާ މިހެން ވިދާޅުވީ، ރާއްޖޭގެ ފަތުރުވެރިކަމުގެ ރަންޔޫބީލް ގުނަން ފެށުމުގެ ގޮތުން ކުރުނބާ މޯލްޑިވްސްގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. މިގޮތުން ވިދާޅުވީ، ސަރުކާރުގެ ސިޔާސަތާ އެއްގޮތަށް މުޅި ރާއްޖެއަށް ފަތުރުވެރިކަން ފަތުރައިލުމަށް ޓަކައި ކުރަންޖެހޭ މުހިންމު ކަންތައްތައް މިހާރު ކުރައްވަމުން ގެންދަވާ ކަމަށެވެ.

ރައީސް ވިދާޅުވީ ވައިގެ މަގުންނާއި ކަނޑު މަގުން ފަސޭހައިން ދަތުރު ކުރެވޭނެ ވިއުގައެއް ގާއިމު ކުރުމުގެ މަސައްކަތް މިހާރު ވެސް ކުރިއަށްދާ ކަމަށެވެ. އެގޮތުން ޑޮމެސްޓިކް ވައިގެ ބަނދަރުތައް އިތުރު ކުރަމުންދާ ކަމަށާއި ހަނިމާދުއާއި އައްޑޫގައި ބައިނަލްއަގްވާމީ ވައިގެ ބަނދަރު ތަރައްގީ ކުރަމުންދާ ކަމަށް ރައީސް ވިދާޅުވިއެވެ.

"ސަރުކާރުން މިހާރު މި އަންނަނީ މި ދެންނެވި ކަންތައްތައް އިރާދަކުރެއްވިއްޔާ ކުރަމުން. ވައިގެ މަގުންނާއި، ކަނޑު މަގުން ފަސޭހައިން ދަތުރުކުރެވޭނެ ވިއުގައެއް ޤާއިމުކުރުމުގެ މަސައްކަތް އެބަ ކުރިއަށްދޭ. ޑޮމެސްޓިކް ވައިގެ ބަނދަރުތައް އެބަ އިތުރުކުރަން. ހަނިމާދުއާއި އައްޑޫގައި ބައިނަލްއަޤްވާމީ ވައިގެ ބަނދަރު އެބަ ތަރައްޤީކުރަން. ކަނޑުމަގުން ރަށްރަށަށް ފަސޭހައިން ދަތުރުކުރެވޭނެ ހައި ސްޕީޑް ފެރީ ނިޒާމެއް މި އަންނަނީ ޤާއިމުކުރަމުން. މީހުން ދިރިއުޅޭ ހުރިހާ ރަށެއްގައި، އިރާދަކުރެއްވިއްޔާ 2023ވަނަ އަހަރު ނިމުމުގެ ކުރިން، ސާފު ބޯފެނާއި، ނަރުދަމާ ނިޒާމު ޤާއިމުކުރުމުގެ މަސައްކަތް ވެސް މި އަންނަނީ ކުރަމުން" ރައީސް ވިދާޅުވިއެވެ.

ރައީސްގެ ވާހަކަފުޅުގައި އިތުރަށް ވިދާޅުވީ، މުޅި ރާއްޖެއަށް ފަތުރުވެރިކަން ފަތުރައިލުމަށް ޓަކައި ކޮންމެހެން ކުރަން ޖެހޭ ވަރަށް މުހިންމު އެހެން ކަންތައްތަކެއް އެބަހުރި ކަމަށެވެ. އެގޮތުން ރަށްރަށަށް ފަސޭހައިން ދަތުރުކުރެވޭނެ އިންތިޒާމު ހަމަޖައްސަންޖެހޭއިރު، ސާފު ބޯފެނާއި، ނަރުދަމާ ނިޒާމެއް، ކޮންމެ ރަށެއްގައި ޤާއިމުވެފައި އޮންނަން ޖެހޭކަމަށް އެ މަނިކުފާނު ވިދާޅުވިއެވެ. އަދި ހުރިހާ ރަށެއްގައި، އިންޓަރނެޓްގެ ޚިދުމަތް ފަސޭހައިން ލިބޭނެ ގޮތް، ހަމަޖެހިގެން ދިއުމުން ރާއްޖޭގެ ހުރިހާ ހިސާބެއްގައި، ގެސްޓްހައުސްއާއި ހޯމް ސްޓޭގެ ޚިދުމަތް، ތަޢާރަފް ވެގެންދާނެކަމަށް ރައީސް ވިދާޅުވިއެވެ.