ފުލުހުންގެ އިސް އޮފިސަރުން ވަކިކުރުމުގެ ޒިންމާ އިމްރާން ނުނެންގެވި
ފުލުހުންގެ އިސް މަގާމުތަކުގައި ތިއްބެވި 7 އޮފިސަރުން ޕޮލިސް ބޯޑުން ވަކިކުރަން ނިންމި ނިންމުމުގެ ޒިންމާ، ނުނަންގަވާ ކަމަށް ހޯމް މިނިސްޓަރު އިމްރާން އަބްދުﷲ ރައްޔިތުންގެ މަޖިލީހުގައި ވިދާޅުވެއްޖެއެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި ނައިފަރު ދާއިރާގެ މެމްބަރު އަހުމަދު ޝިޔާމް ވަނީ ފުލުހުންގެ އިސް އޮފިސަރުންތަކެއް ވަކިކުރުމާ ގުޅޭގޮތުން މިނިސްޓަރު އިމްރާންއާ ސުވާލު ކުރައްވައިފައެވެ. އެގޮތުން ޝިޔާމް ވަނީ އެކަން ހިނގައި ދިޔައީ އިންސާފުވެރިކަމާ އެކު ގާނޫނާ އެއްގޮތަށްތޯ ސުވާލު ކުރައްވައިފައެވެ.
ޖަވާބުގައި އިމްރާން ވިދާޅުވީ އެކަން ހިނގީ ގާނޫނުގައި އޮންނަ ގޮތަށް ކަމަށެވެ. އެގޮތުން ޕޮލިސް ބޯޑުން ނިންމާ ނިންމުންތަކުގައި ހޯމް މިނިސްޓަރަށް ލަފާ ދީ އެކަމުގައި ވަޒީރުގެ ދައުރު އޮންނާނެކަމަށް ގާނޫނުގައި ބުނެފައިވީ ނަމަވެސް އެކަމާ ގުޅޭ މާއްދާ ފަރުމާކޮށްފައި އޮންނަނީ ބޯޑުގެ ނިންމުންތަކުގައި މިނިސްޓަރުގެ ދައުރެއް ނޯންނަ ގޮތަށް ކަމަށެވެ. އެހެންކަމުން 7 އޮފިސަރުން ވަކިކުރުމުގައި މިނިސްޓަރުގެ ދައުރެއް ނޯންނާނެ ކަމަށް އިމްރާން ވިދާޅުވިއެވެ.
އިމްރާން ވިދާޅުވީ ބޯޑުގެ ނިންމުން ވެސް އޭނާއާ ހިއްސާކޮށްފައި ނުވާކަމަށެވެ. އަދި ގަބޫލު ކުރައްވަނީ ފުލުހުންގެ ބޯޑުން އެ ނިންމުން ނިންމީ ގާނޫނު އަސާސީއާ އެއްގޮތަށްކަމަށް އިމްރާން ވިދާޅުވިއެވެ.
އެއަށް ފަހު ޝިޔާމް ވަނީ ފުލުހުންގެ ތިން އޮފިސަރަކަށް އިސްތިއުފާ ދެއްވަން މިނިސްޓަރުގެ ނޯޓިސްއަކުން އެންގެވިންތޯ ވެސް ސުވާލުކުރައްވައިފައެވެ. އެސުވާލުގެ ޖަވާބުގައި މިނިސްޓަރު ވިދާޅުވީ ފުލުހުންގެ ބޯޑަށް އެފަދަ ނޯޓިސްއެއް ފޮނުވާފައި ނުވާނެ ކަމަށެވެ.
އިމްރާންގެ ޖަވާބާ ގުޅިގެން ރިޔާސަތުގައި އިންނެވި މަޖިލީހުގެ ނައިބުރައީސް އީވާ އަބްދުﷲ ވަނީ މެމްބަރު ކުރެއްވި ސުވާލަކީ ފުލުހުންގެ އޮފިސަރަކަށް ނޯޓިސް ފޮނުވިތޯ ކުރެއްވި ސުވާލެއްކަމުން މިނިސްޓަރުގެ ޖަވާބު، އެ ސުވާލާ ގުޅުން ނެތްކަން ފާހަގަ ކުރައްވައިފައެވެ.
އެއާއެކު އިމްރާން ވިދާޅުވީ ތިން އޮފިސަރަކަށް އަމިއްލައަށް އިސްތިއުފާ ދިނުމަށް ދަންނަވައި ނޯޓިސްއެއް ފޮނުވާފައި ނުވާނެ ކަމަށެވެ.
ގިނަ އޮފިސަރުންތަކެއް މަގާމުން ވަކިކުރަން ނިންމީ ސިޔާސީ ގޮތުން ނުފޫޒު ފޯރުވައިގެންކަމަށް ތުހުމަތު ކުރެވޭއިރު އިދިކޮޅު ޕީޕީއެމް-ޕީއެންސީން ވަނީ އެކަމާ ކަންބޮޑުވުން ފާޅުކޮށް ބަޔާނެއް ވެސް ނެރެފައެވެ. އިދިކޮޅުން ބުނީ އެ ނިންމުމަކީ ބަދަލު ހިފުމުގެ ރޫހުގައި އެމްޑީޕީން ނިންމި ނިންމުމެއް ކަމަށެވެ.
ފުލުހުންގެ ބޯޑުން ނިންމި ނިމުމާ ގުޅިގެން ޖަވާބުދާރީ ކުރުވަން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއަށް ވެސް މިހާރު ވަނީ ހުށަހަޅައިފައެވެ.
