ނަޝީދަށް އިންޒާރު ދިން މީހާގެ ބަންދުގެ މުއްދަތު އަނެއްކާ ވެސް އިތުރުކޮށްފި
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް މަރުގެ އިންޒާރު ދިން މީހާގެ ބަންދުގެ މުއްދަތު އިތުރުކޮށްފިއެވެ.
އޭނާގެ ބަންދާ މެދު ގޮތެއް ނިންމަން ކްރިމިނަލް ކޯޓަށް ހާޒިރު ކުރުމުން، މިމަހުގެ ހަތްވަނަ ދުވަހުން ފެށިގެން 15 ދުވަސް ގުނާ ގޮތަށް، އޭނާގެ ބަންދުގެ މުއްދަތު އަނެއްކާ ވެސް ވަނީ އިތުރުކޮށްފައެވެ.
ފޭސްބުކް ކޮމެންޓެއްގައި މަޖިލީހުގެ ރައީސް މުޙައްމަދު ނަޝީދަށް މަރުގެ އިންޒާރު ދިނުމުގެ ކުށުގައި ހައްޔަރުކޮށްފައި ވަނީ އުމުރުން 40 އަހަރުގެ އިސްމާއީލް ޔާސިފްއެވެ.
ޔާސިރު ހައްޔަރުކޮށްފައި ވަނީ ފޭސްބުކްގައި ކުރި ކޮމެންޓެއްގައި، ރައީސް ނަޝީދު އަނބުރާ ރާއްޖެ އައިސްފި ނަމަ އަބޫޖަހުލަށް ބަދުރު ހަނގުރާމައިގައި ހެދި ގޮތް ހަދައިލާނެ ކަމަށް ބުނެ މަރުގެ އިންޒާރު ދިނުމުންނެވެ. އޭނާއަކީ ރ.މީދޫ މީހަކާ ކައިވެނިކޮށްގެން އެ ރަށުގައި ދިރިއުޅެމުން އަންނަ މީހެކެވެ. އޭނާއަކީ މާލޭ މީހެއް ނަމަވެސް ދިރިއުޅެމުން އަންނަނީ މީދޫގައެވެ.
ޔާސިރު ހައްޔަރުކޮށްފައި ވަނީ އޮގަސްޓު މަހު 23 ވަނަ ދުވަހުއެވެ. ހައްޔަރުކޮށްގެން އޭނާ ފުރަތަމަ ގެންދިޔައީ އުނގޫފާރު ކޯޓަށެވެ. އެ ކޯޓުގެ ހުރުމަތް ކަނޑައިގެން ވެސް އޭނާ ވަނީ 15 ދުވަހަށް ޖަލަށް ލާން ހުކުމްކޮށްފައެވެ.
