ހިޔާ ފްލެޓުތަކުގެ އެއް އަހަރުގެ ކުލި ނުސީދާކޮށް ދައުލަތަށް އެބަ ލިބޭ، ކުލި ލަސްކޮށްދީ: ބޮންޑެ
ކުރީގެ ރައީސް އަބްދުﷲ ޔާމިންގެ ސަރުކާރުން ހުޅުމާލެ ދެވަނަ ފިޔަވަހީގައި ތަރައްގީކުރި ހިޔާ ފްލެޓުތަކުގެ އެއް އަހަރު ދުވަހުގެ ކުލި ނުސީދާކޮށް ދައުލަތަށް އެބަ ލިބޭ ކަމަށާއި އެހެންކަމުން ކުލި ދައްކަން ނުޖެހޭ މުއްދަތުގެ ގޮތުގައި އެއް އަހަރު ކަނޑައެޅުމަކުން ދައުލަތަށް އެއްވެސް ގެއްލުމެއް ނުވާނެކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) ވިދާޅުވެއްޖެއެވެ.
އިއްޔެ ރައްޔިތުންގެ މަޖިލީހުގައި ބަހުސް މަރުހަލާ ކުރިއަށް ގެންދިޔަ އަމިއްލަ ފަރުދުންގެ ވިޔަފާރީގެ ގާނޫނަށް ވާހަކަ ދައްކަވަމުން ބޮންޑެ ވަނީ މާލެ ސަރަހައްދުގެ އަމިއްލަ ކުދި ވިޔަފާރިތަކުން ކުރަމުންދާ އެންމެ ބޮޑު މަސައްކަތަކީ ހިޔާ ފްލެޓުތަކުގެ ފިނިޝިން މަސައްކަތް ކަމަށެވެ. އެގޮތުން ކޮންމެ ފްލެޓެއްގެ ފިނިޝިންގް މަސައްކަތަށް ދޮޅު ލައްކަ ރުފިޔާ ހަރަދު ކުރާ ނަމަ އެއީ މުޅި ޖުމްލަ 900 މިލިއަނެއްހާ ރުފިޔާ ކަމަށް ވިދާޅުވިއެވެ. ޖުމްލަ ގޮތެއްގައި އެ ފައިސާ ހަރަދު ކުރާނީ ފަރުނީޗަރާއި ހިފާ ގެންގުޅޭ ތަކެއްޗާއި މިބާވަތުގެ އެއްޗެހި ގަންނަން ކަމަށާއި އެ ތަކެތި މިގަންނަނީ މާލޭގެ ފިހާރަތަކުންކަން މެމްބަރު ފާހަގަކުރެއްވިއެވެ. އެހެންކަމުން 900 މިލިއަން ރުފިޔާގެ ތެރެއިން ދައުލަތަށް ޖީއެސްޓީގެ ގޮތުގައި ވެސް ބޮޑު އަދަދެއް ވަންނާނެ ކަމަށް ބޮންޑެ ވިދާޅުވިއެވެ.
"އެހެންވީމަ 54 މިލިއަން ރުފިޔާ ނުސީދާ ގޮތުގަ މީރާއަށް ލިބިގެންދާނެ. އެހެންވީމަ މި ނިޒާމަކީ ޓެކްސް މެދުވެރިކޮށް ދައުލަތަށް އަނބުރާ ފައިސާ ލިބޭގޮތަށް އޮތް ފުރިހަމަ ނިޒާމެއް.... އެހެންވީމަ އަޅުގަނޑު އެދެން މި ކުލި އެއް އަހަރަށް ލަސްކޮށްދިނަސް ދައުލަތަށް ގެއްލުމެއް ނުވާނެ. ގާތްގަނޑަކަށް އެއް އަހަރު ދުވަހުގެ ކުއްޔަށް މުޅި ތަނަށް ބަލައިފިއްޔާ އެއީ 58 މިލިއަން 3 ލައްކައެއްހާ ރުފިޔާ" ބޮންޑެ ވިދާޅުވިއެވެ.
ބޮންޑެ ވިދާޅުވީ ހިޔާގައި ދިރިއުޅޭ ފަރާތްތަކުގެ ތެރޭގައި ވެސް އަމިއްލަ ކުދި ވިޔަފާރިކުރާ އެތައް ފަރާތްތަކެއް އުޅޭއިރު ކޮވިޑް-19ގެ ސަބަބުން ލިބުނު ގެއްލުމުގެ ސަބަބުން އެފަރާތްތަކުގެ އާމްދަނީ ވެސް ވަރަށް ބޮޑަށް ދަށަށް ގޮސްފައިވާ ކަމަށެވެ. އެހެންކަމުން އެއް އަހަރު ދުވަހުގެ މުއްދަތަކަށް ފްލެޓުތަކުގެ ކުލި ދައްކަން ނުޖެހޭގޮތަށް ލުއި ދިނުން މުހިންމުކަމަށް ބޮންޑެ ވިދާޅުވިއެވެ.
ހިޔާ ފްލެޓަކަށް ކުލި ދައްކަން ފަށަން ސަރުކާރުން ކަނޑައަޅައިފައި ވަނީ އަންނަ އަހަރުގެ ޖެނުއަރީ މަހުއެވެ. ކުލީގެ ގޮތުގައި ދައްކަން ޖެހެނީ 8،500 ރުފިޔާއެވެ. އެއީ މެއިންޓެނެންސް ފީގެ ގޮތުގައި ނަގާ 1،000 ރުފިޔާއާ އެކުއެވެ. ކުރީގެ ސަރުކާރުން ހިޔާ ފްލެޓަކަށް ކަނޑައެޅި ކުއްޔަކީ 5،200 ރުފިޔާއެވެ. މިސަރުކާރުން ކުލި ބޮޑުކުރިއިރު މާލެ ސިޓީ ކައުންސިލުން ތިން ފަހަރެއްގެ މަތިން ވަނީ ފްލެޓުތަކުގެ ކުލި އެންމެ ބޮޑުވެގެން 6،700 ރުފިޔާއަށް ކުޑަކޮށްދޭން ސަރުކާރުގައި އެދިފައެވެ.
މިއީއަނެއްއަދުރޭތަ