ގައުމީ ޒުވާނުންގެ ދުވަސް: ކަނބަލުންގެ ސައިކަލު ރޭސް، ވަރަށް ތަފާތު!
ހދ. ކުޅުދުއްފުށީގައި މިއަދު ފާހަގަ ކުރަމުންދާ ގައުމީ ޒުވާނުންގެ ދުވަހުގެ އެންމެ ތަފާތު ހަރަކާތެއްގެ ގޮތުގައި ފެނުނު ކަނބަލުންގެ ސައިކަލު ރޭހެއް ބާއްވައިފިއެވެ.
މިރޭހުގައި ކުޅުދުއްފުށީގެ ގިނަ އަންހެން ކަނބަލުން ބައިވެރިވެފައިވެއެވެ. ރޭސް ކުރިއަށް ގެންގޮސްފައި ވަނީ ފުރިހަމަ ރަައްކާތެރިކަމުގެ ފިޔަވަޅުތަކާ އެކުގައެވެ. ފުލް ރޭސިން ކިޓުގައި އަންހެން ކަނބަލުން ފެނިގެން ދިޔަ މިރޭހަކީ ވަރަށް ކާމިޔާބު އަދި ރާއްޖޭގައި މިހާތަނަށް ބޭއްވުނު މިފަދަ އެންމެ ފުރަތަމަ ރޭހެވެ.
ކަނބަލުންގެ ސައިކަލް ރޭސް/ ފޮޓޯ ޔޫތު މިނިސްޓްރީ ޓްވިޓާ
ރާއްޖޭގެ އެކި ކަންކޮޅުތަކުގައި ޒުވާނުންގެ ދުވަސް މިއަދު ފާހަގަކުރަމުން ދާއިރު ޒުވާނުންގެ މިނިސްޓަރު އަހުމަދު މަހްލޫފް ވަނީ ދުވަހުގެ ތަހުނިޔާ ހުރިހާ ޒުވާނުންނަށް ފޮނުއްވައިފައެވެ.
ކަނބަލުންގެ ސައިކަލް ރޭސް/ ފޮޓޯ ޔޫތު މިނިސްޓްރީ ޓްވިޓާ
"ޔޫތު މިނިސްޓްރީގެ ފަރާތުންވެސް ކޮވިޑްގެ ދަތި އުނދަގުލުގައި ގިނަ މަސައްކަތްތަކެއް ވަނީ ކުރެވިފަ.އަދި ގިނަ ކަންތައްތަކެއް ވަނީ ރޭވިފަ. ޒުވާނުންނާ ގުޅޭ އެތައް މުހިއްމު މަސައްކަތްތަކެއް ގިނަ ވުޒާރާތަކުން ހިންގަވާއިރު މިނިސްޓްރީގެ ފުރިހަމަ އެއްބާރުލުން ވާނީ ދީފަ." ޒުވާނުންގެ ދުވަހުގެ ތަހުނިޔާ އެކު މިނިސްޓަރު ކުރެއްވި ޓްވީޓެއްގައި ވިދާޅުވިއެވެ.
މިއަހަރުގެ ޒުވާނުންގެ ދުވަސް ރަސްމީކޮށް ފާހަގަކުރަމުން ދަނީ ކުޅުދުއްފުށީ ސިޓީގައެވެ. މިގޮތުން އެސިޓީގައި މި ދުވަހާ ގުޅުވައިގެން ތަފާތު ގިނަ ހަރަކާތްތަކެއް ގެންދަނީ ކުރިއަށެވެ.
