ރައީސްގެ ދެކަނބަލުން ރައިދާސް މޯލްޑިވްސްގެ އައު ކަލެކްޝަން ބައްލަވައިލައްވައިފި
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެ މަނިކުފާނުގެ އަނބިކަނބަލުން ފަޒްނާ އަޙުމަދު، އޭޑީ އެސްޓްރާ، ރައިދާސް މޯލްޑިވްސް ސްޕްރިންގ ސަމަރ ކަލެކްޝަން 2020 އިފްތިތާޙުކުރުމުގެ ޙަފްލާގައި ބައިވެރިވެވަޑައިގަންނަވައިފިއެވެ.
ދަ މެރީނާ އެޓް ކްރޮސްރޯޑްސްގައި ބޭއްވެވި މި ޙަފްލާއަށް ފަހު ރައީސްގެ ދެކަނބަލުން ވަނީ ރައިދާސް މޯލްޑިވްސް ފިހާރަ ވެސް ބައްލަވައިލައްވައިފައެވެ. އެ ދެކަނބަލުންގެ އަރިހުގައި ފިހާރައިގެ ވެރިފަރާތް އަދި މަޝްހޫރު ޑިޒައިނަރު ރައިދާ ޝަފީޤް ވަނީ ބައިވެރިވެފައެވެ.
ރައިދާސް މޯލްޑިވްސްއަކީ ދެހާސް ފަނަރަ ވަނަ އަހަރު ވުޖޫދަށް ގެނައި ދިވެހި ފެޝަން ލޭބަލްއެކެވެ. މި ލޭބަލް ޚާއްޞަކުރެވިފައި ވަނީ އަންހެން ބޭފުޅުންގެ ތަފާތު ވައްތަރުގެ ހެދުންތަކަށެވެ. ފާއިތުވި އަހަރުތަކުގައި ރައިދާސް މޯލްޑިވްސްގެ ހެދުން ކަލެކްޝަންތައް ވަނީ އެކި ޤައުމުތަކުގައި ދައްކާލައި، ފެޝަންގެ ދުނިޔޭގައި މީހުންގެ މަޤްބޫލުކަން ހޯދައިފައެވެ.
އަވައްޓެރި ސްރީލަންކާގެ ގިނަ ފެޝަން ޝޯތަކުގައި ރައިދާސް މޯލްޑިވްސްއިން ބައިވެރިވެއެވެ. އެގޮތުން އެ ބްރޭންޑުގެ ބައެއް ރޭމްޕްތަކުގައި ހެދުންތައް ދައްކާލަން ދިވެހި މޮޑެލްއިން ވެސް ހިނގައިފައިވެއެވެ. ފެޝަން ދާއިރާގައި ބައިނަލްއަގުވާމީ ގޮތުން ނަން ހޯދައިފައިވާ މަދު ބްރޭންޑްތަކުގެ ތެރޭގައި ރައިދާސް މޯލްޑިވްސް ފާހަގަކޮށްލެވެއެވެ.
