ފްލެޓު ދޮންބެ ފްލެޓު އަޅަން ފެށީމާ ބަޣާވާތްކޮށް ވެރިކަން ވައްޓައިލި: ބޮންޑެ

"ފްލެޓު ދޮންބެ" ވެރިކަމަށް އައިސް ފްލެޓު އަޅަން ފެށުމުން ބަޣާވާތްކޮށް މަގުމަތިން ވެރިކަން ވައްޓައިލި ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) ވިދާޅުވެއްޖެއެވެ.

Ads by STELCO

ބޮންޑެ މިފަދައިން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ސޯޝަލް ހައުސިން ފޯރުކޮށްދިނުމާއި ގުޅޭގޮތުން ވާހަކަ ދައްކަވަމުންނެވެ. އެގޮތުން ބޮންޑެ ވިދާޅުވީ ސުލްހަވެރި ސިޔާސީ ހަރަކާތާއި އަދުލުވެރިކަމާ އެކު ވެރިކަން ކޮށްދިނުމުގެ ވިސްނުމެއް އެމްޑީޕީ ފިޔަވައި އެހެން ޕާޓީއެއްގެ ކިބައިގައި ނެތް ކަމަށެވެ. އަދި އެމްޑީޕީން ދިވެހިރާއްޖެއަށް ތައާރަފުކުރި ޑިމޮކްރަޓިކް ވެރިކަން ނުވަތަ ރައްޔިތުންނަށް ވެރިކަން ކޮށްދިނުމުގެ ސިޔާސަތެއް އިދިކޮޅު ޕާޓީގައި ނެތްކަމަށް ބޮންޑެ ވިދާޅުވިއެވެ.

"އިދިކޮޅު ޕާޓީތަކުން އެބަ ދަސްކުރަން ޖެހޭ ރައްޔިތުންނަށް ވެރިކަން ކޮށްދިނުން. ވެރިކަމަށް އަންނަނީ ހެޔޮ ވެރިކަމެއް ކޮށްދޭން. ރައްޔިތުންނަށް އޯގާތެރި ވެރިކަމެއް ކޮށްދޭން" ބޮންޑެ ވިދާޅުވިއެވެ.

މެމްބަރު އިތުރަށް ވިދާޅުވީ ކުރީގެ ރައީސް މުހައްމަދު ނަޝީދުގެ ވެރިކަން ފެށިގެން އައިއިރު ނުވަތަ "އަނެ އްދިވެހިރާއްޖެ" އައިސް ހަތް ޕްރޮވިންސްގެ ސިޔާސަތާއި އޭރުގައި އެހުރި ވައުދުތަކާ އެކު ފްލެޓުގެ މަޝްރޫއުތަކެއް ވެސް ފެށިކަމަށެވެ. އަދި އެމަޝްރޫއުތައް ކުރިއަށް ދާން ފެށުމުން އެކަން ނުނިމޭނެކަމަށް ބުނެ އިދިކޮޅުން މަލާމާތް ކުރަން ފެށިކަމަށް ވިދާޅުވިއެވެ. މަލާމާތް ކުރަމުން ކުރަމުން ގޮސް އެންމެ ފަހުން "ފްލެޓު ދޮންބެއޭ" ގޮވައި ރައީސް ނަޝީދާ މުހާތަބު ކުރިކަމަށް ބޮންޑެ ވިދާޅުވިއެވެ.

"ހިސާބު ހަދަމުންހަދަމުން ގޮސް ވަކި ހިސާބަކުން ފްލެޓު އަޅަން ފެށީމާ ނުކުމެ ބަޣާވާތް ކުރީ. ބަޣާވާތްކޮށް ހުރިހާ ފްލެޓުތަކެއް އަތުލާ ބޭނުން ބަޔަކަށްދީ ނިންމާލިއިރުގަ މިއޮތީ ޔާމީނަށް ބޮޑު ސިންގާ 12 ބުރީގެ ޓަވަރެއް ޔާމީނު އަޅާފަ." ކުރީގެ ރައީސް އަބްދުﷲ ޔާމީނަށް ފާޑުވިދާޅުވަމުން ބޮންޑެ ވިދާޅުވިއެވެ.

ބޮންޑެ ވިދާޅުވީ ކުރީގެ ވެރިކަމުގައި ތިއްބެވި ފަރާތްތަކުން ފްލެޓުތައް ގަތް ނަމަވެސް ރައްޔިތުންނަށް ވީކަމެއް ނެތް ކަމަށެވެ. ހިޔާ މަޝްރޫއުގެ ފްލެޓުތަކަށް އިޝާރާތް ކުރައްވައި ބޮންޑެ ވިދާޅުވީ ރައްޔިތުންނަށް ލިބުނީ "އެއްކަލަ ޗޯޕަޅު ޕައްޓީ" ކަމަށެވެ. ހުޅުމާލޭގެ ބޮޑު ބިމުގައި ކުޑަކުޑަ ޓަވަރުތަކެއް ޖަހައި ރާއްޖޭގެ ތިން އަތޮޅުގެ އާބާދީ އެތަނަށް އަޅާފައިވާކަމަށް ބޮންޑެ ވިދާޅުވިއެވެ.

ބޮންޑެ ވަނީ ހިޔާ މަޝްރޫއުގެ މައްސަލަ ތަހުގީގު ކުރަންޖެހޭ ކަމަށް ވިދާޅުވެ އެކަމަށް ގޮވައިލައްވައިފައެވެ. އަދި 2008ގެ ފްލެޓު މަޝްރޫއު ފެށުނު ހިސާބުން ފެށިގެން ހިންގައިފައިވާ ޖަރީމާތައް މިހާރު އެސްއޯއީ ކޮމިޓީން ބަލަމުން ދާކަމަށާއި އެކަން ނިމުމުން އެކަމަށް ޒިންމާވާ ފަރާތްތަކާ މެދު ފިޔަވަޅު އަޅާނެކަމަށް ބޮންޑެ ވިދާޅުވިއެވެ.