ތިން މެމްބަރުންނާ އެކު އެމްއެންޕީ މަޖިލީހުގެ ދަފްތަރުގައި ހިމަނައިފި
މޯލްޑިވްސް ނެޝަނަލް ޕާޓީ (އެމްއެންޕީ) އިލެކްޝަންސް ކޮމިޝަންގެ ސިޔާސީ ޕާޓީގެ ދަފްތަރުގައި ހިމެނުމާ ގުޅިގެން ، އެ ޕާޓީގެ ނަން ، ރައްޔިތުންގެ މަޖިލީހުގެ ސިޔާސީ ޕާޓީތަކުގެ ދަފްތަރުގައި ހިމަނައިފިއެވެ.
މަޖިލީހުގެ ރައީސް މުހައްމަދު ނަޝީދު ވިދާޅުވީ މަޖިލީހުގެ އިދާރާއަށް އެމްއެންޕީން ހުށަހަޅަން ޖެހޭ ލިޔެކިޔުންތައް ހުށަހެޅުމުން މަޖިލީހުގެ ސިޔާސީ ޕާޓީތަކުގެ ދަފްތަރުގައި އެ ޕާޓީ ރަޖިސްޓްރީ ކުރައްވައިފައިވާ ކަމަށެވެ.
އެމްއެންޕީ މަޖިލީހުގެ ދަފްތަރުގައި ރަޖިސްޓްރީ ކުރައްވައިފައި ވަނީ މަޖިލީހުގެ ތިން މެމްބަރަކާ އެކުގައެވެ. އެ މެމްބަރުންނަކީ އެމްއެންޕީގެ ރައީސް ދަނގެތި ދާއިރާގެ މެމްބަރު މުހައްމަދު ނާޒިމްއާއި، ތިމަރަފުށީ ދާއިރާގެ މެމްބަރު އަބްދުﷲ ރިޔާޒުގެ އިތުރުން ވިލިމާލެ ދާއިރާގެ މެމްބަރު އަހުމަދު އުޝާމްއެވެ.
ސިޔާސީ ޕާޓީއެއްގެ ގޮތުގައި އެމްއެންޕީ ރެޖިސްޓްރީ ކުރުމަށް ހުށަހަޅައިފައި ވަނީ މިދިޔަ ސެޕްޓެމްބަރު މަހުގެ 15 ވަނަ ދުވަހުގައެވެ. އެ ޕާޓީ ރެޖިސްޓްރީކުރުމަށް ހުށަހެޅީ 5،000އަށް ވުރެ ގިނަ މީހުންގެ ފޯމާ އެކުގައެވެ.
މަޖިލީހުގެ މެމްބަރުންގެ ދަފްތަރުގައި ހިމެނޭ މެމްބަރުންނަށް ބަލާއިރު އެމްޑީޕީގައި 65 މެމްބަރުން، ޕީޕީއެމްގައި 6 މެމްބަރުން، ޖުމްހޫރީ ޕާޓީގައި 3 މެމްބަރުން، ޕީއެންސީގައި 3 މެމްބަރުން، އެމްއެންޕީގައި 3 މެމްބަރުން, އެމްޑީއޭގައި 2 މެމްބަރުން އަދި މިނިވަން 5 މެމްބަރުން ހިމެނެއެވެ.
Ads by STO
