ސިޔާސީ ޕާޓީތަކާ އެކު މަޝްވަރާ ކުރީ ޤާނޫނު އަސާސީއަށް އިސްލާހު ގެނައުމަށް ޓަކައި: ރައީސް ނަޝީދު

އިނގިރޭސިވިލާތުގައި ހުންނެވުމަށް ފަހު މާލެ ވަޑައިގެން، މި ވޭތުވެދިޔަ ތަނުގައި ވަރަށް ގިނަ ސިޔާސީ ޕާޓީތަކާ ބައްދަލުކުރެއްވި ކަމަށާއި، އެބައްދަލުވުންތަކުގެ ބޭނުމަކީ ގާނޫނު އަސާސީ އިސްލާހު ކުރުމާ ގުޅޭގޮތުން މަޝްވަރާ ކުރެއްވުންކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

Ads by Sosun Fihaara

ރައީސް ނަޝީދު މިފަދައިން ވިދާޅުވީ މިއަދު އޮތް 19 ވަނަ ރައްޔިތުންގެ މަޖިލީހުގެ 2021ވަނަ އަހަރުގެ ތިންވަނަ ދައުރުގެ 31 ވަނަ ޖަލްސާގައި ވާހަކަ ދައްކަވަމުންނެވެ. ރައްޔިތުންގެ މަޖިލީހުގެ ސިޔާސީ ޕާޓީތަކުގެ ދަފްތަރުގައި މޯލްޑިވްސް ނެޝަނަލް ޕާޓީ، އެމްއެންޕީ ހިމަނައި އެކަން ރިޔާސަތުން އިއުލާން ކުރެއްވުމަށް ފަހު ނަޝީދު ވިދާޅުވީ މިވޭތުވެދިޔަ ދެ ދުވަހު ވަރަށް ގިނަ ސިޔާސީ ޕާޓީތަކާއި ބައްދަލުކުރެއްވި ކަމަށެވެ. އަދި ޕާޓީތަކާ ބައްދަލުކުރި އެންމެ ބޮޑު ސަބަބަކީ އެކިއެކި ފަރާތްތަކުން ގާނޫނު އަސާސީއަށް އިސްލާހު ގެނައުމަށް އެދި މަޖިލީހުގެ އިދާރާއަށް ހުށަހަޅައި އެކަމަށް އެދޭތީ ކަމަށެވެ.

"ޖުޑިޝަލް ސާވިސް ކޮމިޝަން އެކުލެވިގެންވާ ގޮތް ބަދަލުކުރުމަށް ހުށަހެޅުމެއް އެބަވޭ. މިމަޖިލީހުން ލޯކަލް ކައުންސިލްތަކުގެ އިންތިހާބުގެ ކުރިއަށް ކައުންސިލްތަކުގެ އުމުރު 5 އަހަރަށް ބަދަލުކުރުމަށް ގާނޫނު އަސާސީއަށް އިސްލާހު ގެނެވިއްޖެ" ގާނޫނު އަސާސީ ބަދަލުކުރުމާ ގުޅޭ ގޮތުން ވާހަކަދައްކަވަމުން ނަޝީދު ވިދާޅުވިއެވެ.

އިތުރަށް އެ މަނިކުފާނު ވިދާޅުވީ މި ނޫނަސް އެހެން ވެސް އިސްލާހުތައް ގާނޫނު އަސާސީއަށް ގެނައުމަށް އެކި ފަރާތްތަކުން އެދެމުން ދާކަމަށެވެ. ހުރިހާ ސިޔާސީ ޕާޓީތަކާ މަޝްވަރާ ކުރެއްވީ ގާނޫނު އަސާސީއަށް އިސްލާހެއް ގެނައުމަށް ކުރެވޭ މަސައްކަތަކީ ހުރިހާ ޕާޓީތަކެއް ގުޅިގެން އެކުގައި ކުރެވޭ މަސައްކަތަކަށްވުމަކީ ރައްޔިތުންނަށް އޭގެ އެންމެ ހެޔޮ ނަތީޖާ ނިކުންނާނެ ގޮތްކަމަށް ދެކެވޭތީކަމަށް ރައީސް ނަޝީދު ވަނީ މިއަދު ވިދާޅުވެފައެވެ.

މިހާރު އޮތް ފެހި ގާނޫނު އަސާސީއަށް އަމަލުކުރަމުން ގެންދާތާ މިހާރު 13 ނުވަތަ 14 އަހަރު ވޭތުވެގެން ގޮސްފައިވާ ކަމަށާއި މިގާނޫނު އަސާސީއަށް އަމަލުކުރަމުން ދާއިރު ދިމާވާ ދަތިތަކާއި، ހުރި އުނިތައް އަދި އިސްލާހު ކުރަންޖެހޭ ކަންކަން އެންމެންނަށް ވެސް ފެނި އެކަން ސާފުވަމުންދާކަމަށް ނަޝީދު ވިދާޅުވިއެވެ.

"އަޅުގަނޑުގެ އުއްމީދަކީ ހުރިހާ ސިޔާސީ ޕާޓީތަކާ ހުރިހާ ސިޔާސީ ފިކުރާ، ހިލޭ ސާބަހަށް މަސައްކަތްކުރާ ޖަމާއަތްތަކާ އަދި އަމިއްލަ ފަރުދުން ވެސް ގުޅިގެން ރާއްޖޭގެ ސިޔާސީ މަޝްރަހު އަދި ރާއްޖޭގެ ސިޔާސީ ހަގީގަތް ރާއްޖޭގެ ރައްޔިތުންނަށް އެންމެ ފައިދާވާ ގޮތަކަށް އެތުރިގެން ދިޔުން" ނަޝީދު ވިދާޅުވިއެވެ.

މި ވޭތުވެދިޔަ ދެ ދުވަހު ރައީސް ނަޝީދު ވަނީ ޖުމްހޫރީ ޕާޓީގެ ލީޑަރު ގާސިމް އިބްރާހީމާއި، އަލަށް އުފެއްދި އެމްއެންޕީގެ އިސް ބޭފުޅުންނާ ވެސް ބައްދަލުކުރައްވައިފައެވެ. އެމްއެންޕީ އިލެކްޝަންސް ކޮމިޝަންގައި ރަޖިސްޓްރީވުމާ އެކު މަޖިލީހުގެ ދަފްތަރުގައި މިއަދު އެޕާޓީ ހިމެނިކަން ވަނީ އިއުލާންކޮށްފައެވެ. އެއާ އެކު އެޕާޓީއަށް ނިސްބަތްވެވަޑައިގަންނަވާ ތިން މެމްބަރަކު މަޖިލީހުގައި ތިއްބަވާނެއެވެ. އެއީ ދަނގެތި ދާއިރާގެ މެމްބަރު މުހައްމަދު ނާޒިމްއާއި، ތިމަރަފުށީ ދާއިރާގެ މެމްބަރު އަބްދުﷲ ރިޔާޒުގެ އިތުރުން ވިލިމާލެ ދާއިރާގެ މެމްބަރު އަހުމަދު އުޝާމްއެވެ.