ރައްޔިތުންގެ ވިންދު ދެނެގަނެ ބްރިޖާއި ބޯހިޔާވަހިކަން ފަދަ ތަރައްޤީ ގެނެސްދިނީ ޕީޕީއެމްއިން: ޑރ. ޖަމީލް
ރައްޔިތުންގެ ވިންދު ދެނެގަނެ ތަރައްޤީގެ ގިނަ މަސައްކަތްތަކެއް ކޮށްފައި ވަނީ ޕީޕީއެމްއިން ކަމަށް ކުރީގެ ނައިބު ރައީސް ޑރ. މުޙައްމަދު ޖަމީލު އަޙްމަދު ވިދާޅުވެއްޖެއެވެ.
ޖަމީލް މި ފަދައިން ވިދާޅުވީ ޕީޕީއެމްއަށް 10 އަހަރު ފުރުމުގެ މުނާސަބަތުގައި ކުރެއްވި ޓްވީޓެއްގައެވެ.
ޖަމީލް ވިދާޅުވީ ރައްޔިތުންގެ ވިންދު ދެނެގަނެ ބްރިޖާއި ބޯހިޔާވަހިކަން ފަދަ އިންޤިލާބީ ތަރައްޤީ ގެނެސްދިނީ ޕީޕީއެމްއިން ކަމަށެވެ. އަދި ޕާޓީގެ ކާމިޔާބީގެ ސިއްރަކީ އެހެން އެއްވެސް ޕާޓީއެއްގައި ނެތްފަދަ ޢިލްމީ، ކުޅަދާނަ ލީޑަރ ރައީސް ޔާމީން އަދި ހިތްވަރު ގަދަ މެމްބަރުން ކަމަށެވެ.
ޕީޕީއެމަށް 10 އަހަރު ފުރުން މިއަދު ފާހަގަކުރާ އިރު އެ ޕާޓީއަކީ ރާއްޖެއަށް ގިނަ ގޮތްގޮތުން ތަރައްޤީ ގެނެސްދިން އެއް ޕާޓީއެވެ. ވެރިކަމުގެ ނިޒާމުގެ ތެރެއިން ފަސް އަހަރުގެ ދައުރެއް ނިންމައިލި ފުރަތަމަ ރައީސް، ރައީސް އަބްދުﷲ ޔާމީންގެ ވެރިކަމުގައި ބްރިޖާއި، 25 ބުރީގެ ހޮސްޕިޓަލާއި، ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ހިޔާ ގެ ބިޔަ މަޝްރޫއެއް ވަނީ ނިންމައިލައިފައެވެ.
ޕީޕީއެމްގެ އަހަރީ ދުވަހާ ގުޅިގެން ދިދަ ނެގުމުގެ ޚާއްސަ ރަސްމިޔާތެއް މިރޭ ބޭއްވުމަށް ވަނީ ހަމަޖެހިފައެވެ.
