ކުއްޔަށް ދޭ ފަރާތާއި ކުއްޔަށް ހިފާ ފަރާތުގެ ހައްގުތައް ކަށަވަރުކޮށްދޭ ބިލު ފާސްކޮށްފި
ކުއްޔަށް ދޭ ފަރާތާއި، ކުއްޔަށް ހިފާ ފަރާތުގެ ހައްގުތައް ކަށަވަރުކޮށްދޭ، "ގޯތިގެދޮރު ކުއްޔަށް ދިނުމާ ބެހޭ ބިލު" މިއަދު ރައްޔިތުންގެ މަޖިލީހުން ފާސްކޮށްފިއެވެ.
މި ބިލު ފާސްކޮށްފައި ވަނީ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީންނެވެ. އެ ކޮމިޓީން މި ބިލު ދިރާސާކުރުމަށްފަހު އެކުލަވައިލި ކޮމިޓީ ރިޕޯޓަށް ނެގުނު ވޯޓުގައި 48 މެންބަރުން ވޯޓު ދެއްވީ ފާސްކުރުމަށެވެ.
ސަރުކާރުގެ ފަރާތުން މި ބިލު ހުށަހެޅުއްވީ މުލަކު ދާއިރާގެ މެންބަރު އިބްރާހީމް ނަސީރެވެ. މި ބިލުގައި ގޯތިގެދޮރު ކުއްޔަށް ދިނުމާއި ކުއްޔަށް ހިފުމާ ގުޅިގެން ކުއްޔަށް ހިފާ ފަރާތާއި ކުއްޔަށްދޭ ފަރާތަށް ލިބިދެވޭ ހައްގުތައް ބަޔާންކޮށްފައިވެއެވެ. އަދި ދިރިއުޅުމަށް ޓަކައި ކުއްޔަށް ދޭ ތަންތަނުގައި ހުންނަންޖެހޭ އަސާސީ މިންގަނޑުތަކާއި، ކުއްޔާ ގުޅިގެން އަންނަ ދެބަސްވުންތައް ޙައްލުކުރުމުގައި ޢަމަލުކުރާނެ އުސޫލުތައް ވެސް ބަޔާންކޮށްފައިވެއެވެ.
މި ބިލު ޤާނޫނަކަށް ވެގެން ގޮސްފި ނަމަ އެއްވެސް ތަނެއް ދިރިއުޅުމަށް ޓަކައި ކުއްޔަށްދެވޭނީ، ކުއްޔަށް ދިނުމުގެ ހުއްދައަށް އެދި ކައުންސިލަށް ހުށަހަޅައި، ކުއްޔަށް ދިނުމުގެ ހުއްދަ ލިބުމުންނެވެ. އެ ނޫން ގޮތަކަށް އެއްވެސް ތަނެއް ކުއްޔަށް ދިނުން މަނާ ވާނެއެވެ.
ކުއްޔަށް ދޭ ތަންތަނުގެ އަސާސީ މިންގަނޑު
▪︎ ފެނާއި، ނަރުދަމާއާއި ކަރަންޓުގެ ޚިދުމަތް ލިބުމުގެ ވަސީލަތްތައް ދައުލަތުގެ އިދާރާތަކުން ކަނޑައަޅައިފައިވާ މިންގަނޑަށް ޤާއިމުވެފައިވުން
▪︎ ކުއްޔަށްދޭ ތަނަކީ، ޢިމާރާތެއް ނުވަތަ ޢިމާރާތެއްގެ ބައެއް ނަމަ އެހެން ޢިމާރާތެއްގެ ބައެއް ބޭނުން ކުރުމެއް ނެތި އަދި އުނދަގޫކަމެއް ނެތި ވަކިން ވަދެ ނިކުމެވޭނެ ފަދަ އިންތިޒާމެއް ހަމަޖެހިފައިވުން
▪︎ ކުއްޔަށް ދޭ ތަނަކީ އިމާރާތެއް ނަމަ ޢިމާރާތްކުރުމުގެ ޤާނޫނުގައި ކަނޑައަޅައިފައިވާ މިންގަނޑުތަކަށް ފެތޭ ޢިމާރާތެއް ނުވަތަ ޢިމާރާތެއްގެ ބަޔަކަށްވުން.
▪︎ ކުއްޔަށްދޭ ތަނުގެ އަކަފޫޓުގެ ނިސްބަތުން ގިންތިކުރެވި އެ ތަނެއްގެ ކުޑަ ބޮޑުމިނަށް ބަލައި އެތަނެއްގައި އެންމެ ގިނައިން ދިރިއުޅެވޭނެ މީހުންގެ ޢަދަދެއް ކަނޑައެޅުން
▪︎ އެތަނެއްގައި ނިދައި ކައިބޮއި ހެދޭނެ ވަސީލަތްތައް ޤާއިމުވެފައި ހުރުން
