އަލީ ވަހީދުގެ މައްސަލައިގެ އަޑުއެހުމެއް ސުޕްރީމް ކޯޓުގައި ތާވަލު ކޮށްފި
ޖިންސީ ގޯނާ ކުރިކަމުގެ ތުހުމަތު އުފުލިފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ މައްޗަށް ކުރާ ދައުވާތަކުގެ ޝަރީއަތް ކްރިމިނަލް ކޯޓުގައި އޮންލައިންކޮށް ކުރިއަށް ގެންދަން ނިންމި މައްސަލައިގެ އަޑުއެހުމެއް ސުޕްރީމް ކޯޓުގައި ތާވަލުކޮށްފިއެވެ.
މި މައްސަލައިގެ އަޑުއެހުމެއް ތާވަލުކޮށްފައި ވަނީ އަންނަ ނޮވެމްބަރު މަހުގެ 8ވަނަ ދުވަހަށެވެ.
އަލީ ވަހީދުގެ ޝަރީއަތް އޮންލައިންކޮށް ކްރިމިނަލް ކޯޓުން ކުރިއަށް ގެންދާ މައްސަލަ ޕްރޮސެކިއުޓާ ޖެނެރަލް (ޕީޖީ) އޮފީހުން އެންމެ ފުރަތަމަ ހުށަހެޅީ ހައިކޯޓަށެވެ. ނަމަވެސް އެ މަައްސަލަ އިސްތިއުނާފީ ދައުވާއެއްގެ ގޮތުގައި ކުރިއަށް ގެންދާނެ ޝަރުއީ އަދި ގާނޫނީ ހަމައެއް ނެތް ކަމަށް ބުނެ ހައިކޯޓުން އެ މައްސަލަ ބޭރުކޮށްލުމުން ޕީޖީން ދެން އެ މައްސަލަ ހުށަހެޅީ ސުޕްރީމް ކޯޓަށެވެ.
ޕީޖީން މި މައްސަލަ ހުށަހަޅައިފައި ވަނީ ކޯޓުގެ އިހްތިސާސް ނުހިނގާ ތަނެއްގައި ޝަރީއަތް ހިނގާ ނަމަ ކޯޓުގެ ނިޒާމު ފަނޑިޔާރަށް ކޮންޓްރޯލް ނުކުރެވޭނެ ކަމަށާއި އެހެން އެކަން ކޮށްފިނަމަ ރޫލް އޮފް ލޯ ދެމެހެއްޓޭނެ ކަމަށް ގަބޫލު ނުކުރެވޭ ކަމަށް ބުނެއެވެ. އަދި މިއީ މި މައްސަލައިގައި އަދުލުވެރި ހުކުމެއް އައުމަށް ހުރަސް އެޅޭނެ ކަމެއް ކަމަށް ވެސް ޕީޖީން ބުނެފައިވެއެވެ.
އަލީ ވަހީދުގެ މައްޗަށް ތުހުމަތު ކޮށްފައި ވަނީ، ޓޫރިޒަމް މިނިސްޓްރީގެ ގިނަ އަދަދެއްގެ އަންހެން މުވައްޒަފުންތަކަކަށް ޖިންސީ ގޯނާ ކުރިކަމަށެވެ. އެ މައްސަލައިގައި ދައުވާ ކޮށްފައިވަނިކޮށް އަލީ ވަހީދު ރާއްޖެއިން ބޭރަށް ފުރާ ވަޑައިގެންނެވީ ބޭސްފަރުވާއަށް ކަމަށް ވިދާޅުވެއެވެ. ނަމަވެސް ރާއްޖެއިން ބޭރަށް ފުރައިވަޑައިގަތުމަށް ދިން މުހުލަތުު ހަމަވީ އިރު ވެސް އޭނާ އެނބުރި ރާއްޖެއަށް ވަޑައިގެންފައެއް ނުވެއެވެ.
Ads by STO
