ދީނަކީ ފަރުދުންނާއި، އާއިލާއާއި އިސްލާމީ މުޖުތަމަޢު ގުޅުވައިވޭ ނިޒާމެވެ: ޚުތުބާ
އެންމެހައި ޙަމްދު ތައުރީފާއި ޘަނާ ޙައްޤު ވެގެން ވަނީ މަތިވެރި ﷲއަށެވެ. ފާފަ ފުއްސެވުމަށާއި، އެހީތެރިކަމަށާއި މަދަދަށް އެދެނީ އެކަލާނގެ ޙަޟްރަތުންނެވެ. އަދި ވަކީލު ކުރަނީ ވެސް ހަމަ އެކަލާނގެއަށެވެ. އަދި ﷲ މެނުވީ ޙައްޤުވެގެން އަޅުކަން ވެވޭ އެހެން އިލާހަކު ނުވާ ކަމަށާއި މުޙައްމަދު (ޞޢވ)އަކީ އެކަލާނގެ ފޮނުއްވި ރަސޫލާ ކަމަށް އަޅު ހެކިވަމެވެ. އެ މާތް ނަބިއްޔާއަށާއި އެކަލޭގެފާނުގެ އާލު އަސްޙާބުންނާއި، ޤިޔާމަތަށް ދާންދެން އެބޭކަލުންނަށް ތަބަޢަވީހައި ބަޔަކަށް ޞަލަވާތާއި، ސަލާމާއި، ބަރަކާތް ލައްވާށިއެވެ. އާމީން!
މިއަދުގެ ހުކުރު ޚުތުބާ ޚާއްސަ ކޮށްފައި ވަނީ އިސްލާމް ދީނުގެ މަތިވެރި ނިޢުމަތުގެ މައްޗަށެވެ. އެގޮތުން ރަބީޢުލްއާޚިރު މަހަކީ މާތް ﷲ އަަޅުގަނޑުމެންނަށް އިސްލާމްދީނުގެ މަތިވެރި ހިދާޔަތް ދެއްވި މައްސަރުކަން ޚުތުބާގައި ފާހަގަ ކުރައްވައިފައިވެއެވެ.
މި ޤައުމުގެ ކާބަފައިން އިސްލާމްދީނުގެ މަތިވެރި އަޤީދާ ރަސްމީކޮށް ބަލައިގަތީ މީގެ 895 އަހަރު ކުރިން ރަބީޢުލްއާޚިރު މަހުގެ ދެވަނަ ދުވަހުއެވެ. އިސްލާމް ދީނަކީ މާތް ﷲ ބަޔަކަށް ދެއްވާނެ އެންމެ ބޮޑު ނިޢުމަތްކަން މިއަދު އަޅުގަނޑުމެން ދަންނަން ޖެހެއެވެ.
މާތް ﷲ ވަހީ ކުރައްވައިފައިވާ ބަސްފުޅެއްގެ މާނައިގައިވެއެވެ.
އެއުރެން އިސްލާމްވީ ކަމަށް ކަލޭގެފާނަށް އެއުރެން ކަލަގޮވަތެވެ. ކަލޭގެފާނު ވިދާޅުވާށެވެ! ތިޔަބައިމީހުން އިސްލާމްވީ ކަމަށް ޓަކައި ތިމަން ކަލޭގެފާނަށް ތިޔަބައިމީހުން ކަލަނުގޮވާށެވެ. އަދި ކިއެއްތަ ތިޔަބައިމީހުންނަށް އީމާންކަމަށް މަގު ދެއްކެވި ކަމަށް ޓަކައި މާތް ﷲ ތިޔަބައިމީހުންނަށް ދަރުމަވަންތަވެވޮޑިގެންވެއެވެ. އެއީ ތިޔަބައިމީހުންނަކީ ތެދުވެރިން ކަމުގައިވާ ނަމައެވެ.
މުޖުމައުއަށް އިސްލާމްދީން ބޭނުން ވަނީ ކީއްވެ ހެއްޔެވެ؟ އެއީ މީސްތަކުން އިންސާނިއްޔަތު ކަަމަށް އަނބުރާ ގެނެސްދެނީ އިސްލާމްދީން ކަމުގައިވާތީއެވެ. ދީނަކީ ފަރުދުންނާއި، އާއިލާއާއި އިސްލާމީ މުޖުތަމަޢު ގުޅުވައިވޭ ނިޒާމެވެ. އެއީ މުޅި އިންސާނިއްޔަތަށް ލާބަހުރި މަގު ދައްކައި ދިނުމަށް މާތް ﷲ ބާވައިލެއްވި އިސްލާމީ ރިސާލަތެވެ.
އިސްލާމްދީނަކީ މުސްލިމުންގެ ހަޔާތުގެ އެންމެހާ ކަންތައްތައް އެ ދީނުގައި ޝާމިލުވާ ފުރިހަމަ ދީނެވެ. އިސްލާމްދީނަކީ މުސްލިމަކު ދުނިޔެއަށް އުފަންވީއްސުރެ އުޚްރަވީ ހަޔާތަށް ވާސިލުވަންދެން އޭނާގެ ހުރިހާ ކަމެއް ރާވައިދޭ މަންހަޖެވެ.
އިސްލާމްދީނަކީ ޢިލްމާއި މަޢުރިފާގެ ދީނެވެ. އެދީނަށް މީސްތަކުން ވަދެފައި ވަނީ އެ ދީން އުނގެނި އެ ދީނުގެ މާތްކަމާއި މަތިވެރިކަން އެނގިގެންނެވެ.
