އައިޑެންޓިޓީ ވެރިފައިކުރެވޭ ގޮތަށް ޑޭޓާ ބޭހެއް ގާއިމުކުރުމަށް ހުށައަޅަނީ
މީހާގެ ސިފައާއި، އިނގިލީގެ ނިޝާނުން އެމީހާގެ އައިޑެންޓިޓީ ވެރިފައިކުރެވޭ ގޮތަށް އޮންނަ ސެންޓްރަލް ޑޭޓާ ބޭސް ނިޒާމެއް ގާއިމުކުރުމަށް ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީން ފާސްކޮށްފި އެވެ.
އެކޮމިޓީން މިނިންމުން ނިންމައިފައި ވަނީ އިންފޮމޭޝަން، ޓެކްނޮލޮޖީ، ސައިންސް އަދި ކޮމިއުނިކޭޝަންގެ ދާއިރާގައި ރާއްޖެ އޮތް ހާލަތު ދެނެގަންނަން ހެދި އެސެސްމަންޓަށް ފަހު ދިރާސާކޮށް އެކުލަވައިލި ރިޕޯޓުގައެވެ.
މިރިޕޯޓުގައި މުހިންމު އިތުރު ހުށައެޅުންތަކެއް ވަނީ ނިންމައިފައެވެ. މިގޮތުން ނިންމި އިތުރު ނިންމުންތަކުގެ ކޮމިއުނިކޭޝަންގެ ދާއިރާއިން ދުނިޔެ ހޯދަމުންދާ ކުރިއެރުންތަކާ އެކު، އަލަށް އުފެދިފައިވާ ޒަމާނީ އެކި ޚިދުމަތްތައް ދިވެހިރާއްޖެއަށް ގެނައުމަށް ބާރުއަޅައި، އެކަންކަމާ ގުޅިގެން ޤާނޫނުތަކާއި ގަވާއިދުތަކަށް ގެންނަން ޖެހޭ އެންމެހާ އިޞްލާޙްތައް ގެނައުމަށާއި އައިސީޓީގެ ދާއިރާ އިތުރަށް ފުޅާކޮށް ހަރުދަނާކުރުމަށް ޓަކައި ޗީފް ޓެކްނޯލޮޖީ އޮފިސަރާއި އެންވަޔަރަމަންޓް މިނިސްޓްރީއާއި ކަމާ ގުޅޭ އެންމެހައި ފަރާތްތައް ގުޅިގެން ކުރިއަށް އޮތް ހަތަރު މަސް ދުވަހުގެ ތެރޭގައި އިންފޮމޭޝަން، ޓެކްނޮލޮޖީ ސައިންސް އަދި ކޮމިއުނިކޭޝަންގެ ދާއިރާގެ އިމްޕްލިމެންޓޭޝަން ޕްލޭނެއް އެކުލަވައިލައި ނިންމުމަށް ވަނީ ފާސްކޮށްފައެވެ.
ދިއްގަރު ދާއިރާގެ އެމްޑީޕީ މެމްބަރު އިކްރާމް ހަސަންގެ އެދިވަޑައިގެންވުމާ އެކު ހެދި އެސެސްމެންޓަށް ފަހު އެކޮމިޓީން ނެރުނު ރިޕޯޓްގައި ތަފާތު ހިދުމަތްތައް ހޯދަން ދާއިރު އައިޑީކާޑު ހުށަހަޅަން ޖެހުމާއި އަދި އެ ކާޑުގެ ކޮޕީ ހައްދަންޖެހުމުގެ މައްސަލަ ފާހަގަކޮށްފައިވެއެވެ. އެހެން ނަމަވެސް އޭގެ ބަދަލުގައި ބަޔޮމެޓްރިކް ނިޒާމަކަށް ބަދަލުކޮށް ޕަބްލިކް އިންފްރާސްޓަކްޗާގެ ތެރެއަށް ޑިޖިޓަލް ސެޓްފިކެޓް ވަނުމުގެ މުހިއްމުކަން ފާހަގަކޮށްފައިވެއެވެ.
Ads by STO
