އަދުރޭގެ ސުވާލެއް ރައީސަށް: ސަރުކާރު ސާފުތާހިރު މިވީ ދައުލަތުގެ ޚަޒާނާ އެއްކޮށް ހުސްކޮށްލުމުންތޯ؟
މިސަރުކާރަކީ ސާފުތާހިރު ސަރުކާރަކަށްވީ ދައުލަތުގެ ޚަޒާނާ އެއްކޮށް ހުސްކޮށްލެއްވީމައިތޯ އައްސަވައި އިދިކޮޅު ކޯލިޝަން ހިންގެވުމާ ހަވާލުވެ ހުންނެވި އަބްދުއްރަހީމް އަބްދުﷲ ރައީސުލް ޖުމްހޫރިއްޔާ އިބްރާޙީމް މުހައްމަދު ޞާލިހާ ސުވާލު ކުރައްވައިފިއެވެ.
ޖުމްހޫރީ ދުވަހު ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޞާލިޙް ވަނީ އެ މަނިކުފާނުގެ ސަރުކާރަކީ އެންމެ ސާފުތާހިރު ސަރުކާރު ކަމަށް ވިދާޅުވެފައެވެ.
ރޭ އިދިކޮޅުން ބޭއްވި ޖަލްސާގައި ވާހަކަ ދައްކަވަމުން އަދުރޭ ވިދާޅުވީ ސާފުތާހިރު ސަރުކާރެއްގެ ސިފަތަކަކީ ކޮބައިކަން މިސަރުކާރުން އަޅުގަނޑުމެންނަށް ވަރަށް ރަނގަޅަށް އެބަ ދަސްކޮށްދޭކަމަށާއި މިސަރުކާރަކީ ސާފުތާހިރު ސަރުކާރަކަށްވީ ދައުލަތުގެ ހަޒާނާ އެއްކޮށް ހުސްކޮށްލެއްވީމައިތޯ އައްސަވައި ރައީސްއާ ސުވާލު ކުރައްވައިފައެވެ.
"ރަައީސް އިބްރާހިމް މުހައްމަދު ޞާލިހް ވިދާޅުވަނީ މި އަންނަ ދެއަހަރު ނިމިގެން ދިޔައީމަ ދިވެހި ރާއްޖޭގެ ތާރިހު ދުށް އެންމެ ސާފުތާހިރު 5 އަހަރަށް ވާނީ އެމަނިކުފާނުގެ 5 އަހަރޭ އަޅުގަނޑު ހަމަ އިބްރާހިމް މުހައްމަދު ޞާލިހާއި ސުވާލުކޮށްލަން ބޭނުން މަނިކުފާނުގެ ސަރުކާރު ސާފުތާހިރު ސަރުކާރަކަށް މިވީ ދައުލަތުގެ ހަޒާނާ އެއްކޮށް ހުސްކޮށްލީމައިތޯ" އަދުރޭ ވިދާޅުވިއެވެ.
މީގެ އިތުރުން ވެސް އަދުރޭ ވަނީ ރައީސް އަބްދުﷲ ޔާމީންގެ ވެރިކަން ނިމިގެން ދިޔައިރު މިރާއްޖޭގެ ހަޒާނާގައި ހުރި ފައިސާއަށް ވީނުވީއެއް ނޭނގުން އެއީތޯ މި ސަރުކާރުގެ ސާފުތާހިރުކަމަކީ އައްސަވައި ސުވާލު ތަކުރާރު ކުރައްވައިފައެވެ.
"ރައީސް އަބްދުﷲ ޔާމީންގެ ވެރިކަން ނިމިގެން ދިޔައިރު މިރާއްޖޭގެ ހަޒާނާގައި ހުރި ފައިސާއަށް ވީނުވީއެއް ނޭނގުން އެއީތޯއޭ މަނިކުފާނުގެ ސަރުކާރުގެ ސާފުތާހިރުކަމަކީ. ނޫނީ ވިއްޔާ ހައްދެއް ނެތި އިމެއް ނެތި މިނެއް ނެތި މިސަރުކާރުން ކުރަމުން ގެންދާ ވައްކަން ތަހުގީގު ނުކުރެވި އެކަމަށް އަދަބު ނުދެވި އަދި އެ ކަންކަން ކުރާ މީހުން ހިމާޔަތް ކުރުން އެއީތޯއޭ މަނިކުފާނުގެ ވެރިކަމުގެ ސާފުތާހިރުކަމަކީ" އަދުރޭ ވިދާޅުވިއެވެ.
އޭނާ ވިދާޅުވީ ޖުމްހޫރީ ދުވަހުގެ ޖަލްސާގައި ރައީސުލް ޖުމްހޫރިއްޔާ އިބްރާހިމް މުހައްމަދު ވާހަކަފުޅު ދައްކަވަމުން ރައްޔިތުންނަށް އޮޅުވައިލައިފައިވާ ކަމަށާއި އެކަމާ ރައްޔިތުން ފުންކޮށް ވިސްނަވާނެކަމަށެވެ. އަދި ޖުމްހޫރީ ދުވަހު ރައީސް ދެއްކެވި ވާހަކަފުޅަށް ވަރަށް ބޮޑަށް ފާޑުވިދާޅުވިއެވެ.
