ދީނީ އެއްބައިވަންތަކަން ނަގައިލާން ކުރަމުންދާ މަސައްކަތްތަކާ ދެކޮޅަށް އަވަސް ފިޔަވަޅު އަޅަންޖެހޭ:ޑރ.ޝަހީމް
ރާއްޖޭގައި ދީނީ އެއްބައިވަންތަކަން ނަގައިލާން ކުރަމުންދާ މަސައްކަތްތަކާ ދެކޮޅަށް އަވަސް ފިޔަވަޅު އަޅަންޖެހޭ ކަމަށް ކުރީގެ އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޑރ. ޝަހީމް މިހެން ވިދާޅުވީ ޝޯޝަލް މީޑިއާ މެދުވެރިކޮށް ރާއްޖޭގައި ކްރިސްޓިއަން ދީން ފަތުރަށް އުޅޭ މައްސަލައެއް ފެންމަތިވެ އެ މައްސަލަ ބަލަމުން ދާކަމަށް ފުލުހުން ބުނެފައިވާ ޚަބަރަކާ އެކު ޑރ.ޝަހީމް ކުރެއްވި ޓްވީޓެއްގައެވެ.
ދީނާއި ގުޅުން ހުރި ކަންކަމުގައި ސަރުކާރުން ފަރުވާ ކުޑަކުރައްވާ ކަމަށް ވިދާޅުވެ ޑރ. ޝަހީމް ދަނީ ސަރުކާރަށް ފާޑު ވިދާޅުވަމުންނެވެ. މިގޮތުން އިސްލާމީ މަރުކަޒުގެ މިހްރާބްގެ ބައެއް ތަންތައް ހަލާކުވެފައިވާ ފޮޓޯތަކެއް ހިއްސާ ކުރައްވައި އެ މަރުކަޒުގެ ހާލަތާ މެދު މުހައްމަދު ޝަހީމް ވަނީ ދާދި ފަހުން ކަންބޮޑުވުން ފާޅުކުރައްވައިފައެވެ.
މިފަހަކަށް އައިސް ދީނާ ހިލާފް ކަންކަން ކުރުމާއި ދީނަށް ފުރައްސާރަ ކުރުން ރާއްޖޭގައި ވަނީ ފާހަގަ ކުރެވޭ ވަރަށް އިތުރުވެފައެވެ. ހަމައެހެންމެ މިފަދަ ކަންކަމާ މެދު ގިނަ ބަޔަކު ދަނީ ސަރުކާރަށް ފާޑުކިޔަމުންނެވެ.
