މައުމޫނު ކައިފައި ބާކީ އެތިކޮޅު ދެއްވި، މިހާރު އެވަރު ވެސް ނުވޭ: ޖާބިރު
ކުރީގެ ރައީސް ، ރައީސް މައުމޫނު އަބްދުލްގައްޔޫމުގެ ވެރިކަމުގައި އެމަނިކުފާނު "ކައިފައި" ބާކީ އެތިކޮޅު ރައްޔިތުންނަށް ދެއްވާކަމަށާއި މިހާރު ރައްޔިތުންނަށް ދޭނެ އެއްޗެއް ވެސް ނޯންނަކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
މިއަދު އޮތް ރައްޔިތުންގެ މަޖިލީހުގެ ޖަލްސާގައި ވާހަކަފުޅު ދައްކަވަމުން ޖާބިރު ވިދާޅުވީ ރައީސް މައުމޫނާއި އެމަނިކުފާނުގެ ދަރިން "ކައިފައި" ބާކީވާ އެތިކޮޅު ދިން ނަމަވެސް މިހާރު އެއްވެސް މިންވަރެއް ބާކީ ނުވަނީ ދައުލަތުގެ އަންޑަރ ބަޖެޓު އޮޕަރޭޓުވެފައި ސެންޓްރަލް ބޭންކު އެއްވެސް ވަރަކަށް އޮޕަރޭޓު ނުވާތީކަމަށެވެ. މިހާރު މޯލްޑިވްސް މަނިޓަރީ އޮތޯރިޓީގެ ގަވަރުނަރަކަށް ހުންނެވި އަލީ ހާޝިމަށް އެކަން ކުރަން އެނގިވަޑައިނުގަންނަވާނެ ކަމަށާއި އެކަން މަޖިލިސް ރައީސް މުހައްމަދު ނަޝީދަށް އެނގިވަޑައިގަންނަވާނެކަމަށް ޖާބިރު ވިދާޅުވިއެވެ.
"ދެން ކޮން ވާހަކައެއްތީ މި ދައްކަނީ" ގަވަރުނަރަށް ރައްދު ދެއްވަމުން ޖާބިރު ވިދާޅުވިއެވެ.
ޖާބިރު ވިދާޅުވީ ރައްޔިތުންގެ މަޖިލީހުގައި ކަން ހިނގާ ގޮތަށް ވެސް ބަލާލަން ޖެހޭ ކަމަށެވެ. އެގޮތުން ސަރުކާރު ޒިންމާދާރު ކުރުވުމުގައި އިދިކޮޅު ޕާޓީތަކުގެ އެއްވެސް ބާރެއް ނެތް ރައްޔިތުންގެ މަޖިލީހެއް އޮތް އިރު ގައުމުގެ ހާލަތު ގޯސްވާނެކަމަށް ޖާބިރު ވިދާޅުވިއެވެ.
ބަޖެޓާ މެދު ކަންބޮޑުވުން ފާޅުކުރައްވަމުން ޖާބިރު ވިދާޅުވީ ބަޖެޓު މިއަށް ވުރެ ހަރުދަނާކުރެވެން ޖެހޭ ކަމަށެވެ. އެގޮތުން ޖާބިރަކީ ހުވަދޫ އަތޮޅަށް ނިސްބަތްވެވަޑައިގަންނަވާ ބޭފުޅެއްކަމަށް ވިދާޅުވެ އެއަތޮޅުގައި ހުރި އިގްތިޞާދީ ކަންބޮޑުވުންތައް ޖާބިރު ފާޅުކުރެއްވިއެވެ. ޖާބިރު ވިދާޅުވީ އެއަތޮޅުގެ މަސްވެރިން އަތުން މަސް ގަންނަން ބުނި މުއްދަތުގައި އެކަން ނުކުރެވުނު ކަމަށާއި މަސްވެރިންނާ މެދު ކަންތައް ކުރީ ވަރަށް "ގަރީބު" ކޮށްކަމަށެވެ.
"ހުވަދު އަތޮޅުން ލިބޭ ލާރި އެހެން އަތޮޅުތަކަށް ދޭކަށް ނުޖެހޭނެ. ހުވަދު އަތޮޅު ވިލިނގިލިން ފެށިގެން ގޮސް ގެމަނަފުއްޓާ ހަމައަށް ބްރިޖު އަޅާ ވާހަކައެއް ނޫން މިކިޔަނީ. ގަމާ ހަމައަށް ބްރިޖު އަޅާ ވާހަކަ މިދައްކަނީ" ހުވަދު އަތޮޅު މައުޟޫއަށް ވާހަކަ ދައްކަވަމުން ޖާބިރު ވިދާޅުވިއެވެ.
ޖާބިރު ވިދާޅުވީ ރާއްޖޭގެ ހިންގާ ނިޒާމުގެ ތެރޭގައި ބޮޑެތި މައްސަލަތަކެއް ހުރިއިރު އެކަންކަން އިސްލާހުކުރުމަށް ބޭރުގެ ތަޖުރިބާކާރުންގެ އެހީތެރިކަން ހޯދުން މުހިންމު ކަމަށެވެ. އެގޮތުން އިންޝުއަރެންސްގެ ނިޒާމާއި ބޭންކިންގެ ނިޒާމު ހަރުދަނާކުރަން ބޭރުގެ އެހީތެރިކަން ހޯދަންޖެހޭކަމަށް ޖާބިރު ވިދާޅުވިއެވެ.
ޖާބިރުގެ ވާހަކަފުޅު ނިންމަވައިލެއްވުމުގެ ކުރިން ވަނީ ބަރުލަމާނީ ނިޒާމެއްގައި ދައުލަތުގެ ހަޒާނާއިން ވައްކަންކުރާ މީހުންގެ އަތް ކަނޑާނެކަމަށް ވިދާޅުވެފައެވެ. ނިޒާމުގެ ތެރެއިން ވައްކަން ކުރާ ފަރާތްތައް ފާހަގަކޮށް އެފަރާތްތަކަށް އަދަބު ދެވޭނީ ބަރުލަމާނީ ނިޒާމެއްގައިކަމަށް ޖާބިރު ވިދާޅުވިއެވެ.
