ތިނަދޫން ބޭލި މީހުންގެ ގޯތީގެ މައްސަލައިގައި ޖަވާބެއް ނުލިބުމުން ޖާބިރު ރަތަށް
1962ވަނަ އަހަރު ގދ. ތިނަދޫގައި ކުރީގެ ރައީސް އިބްރާހިމް ނާސިރުގެ ވެރިކަމުގައި ހިންގި "ބަޣާވާތުގައި" އެ ރަށުން ބޭލިކަމަށް ބުނާ މީހުންގެ ބޯހިޔާވަހިކަމުގެ މައްސަލައިގައި ހައުސިންގ މިނިސްޓަރު މުހައްމަދު އަސްލަމް ޖަވާބެއް ނުދެއްވުމުން ކާށިދޫ ދާއިރާގެ މެމްބަރު އަބްދުﷲ ޖާބިރު ކޯފާ އިސްކުރައްވައިފިއެވެ.
މިއަދު އޮތް ރައްޔިތުންގެ މަޖިލީހުގެ ޖަލްސާގައި މިނިސްޓަރު އަސްލަމްއާ މެމްބަރުން ސުވާލު ކުރައްވަމުން ގެންދެވީ އެކި ރަށްރަށުގެ ނަރުދަމާގެ މައްސަލަތަކާ ގުޅިގެންނެވެ. އެހެން ނަމަވެސް މެމްބަރު ޖާބިރަށް ސުވާލު ކުރުމުގެ ފުރުސަތު ލިބިވަޑައިގެންނެވުމުން ފުރަތަމަ އެއްސެވީ ތިނަދޫ ބަޣާވާތުގައި އެ ރަށުން ބޭލި މީހުންގެ ގޯތި ދިނުމަށް މިނިސްޓްރީން މިހައި ތަނަށް އެއްވެސް މަސައްކަތެއް ކުރެއްވިތޯއެވެ.
މިސުވާލަށް ޖަވާބު ދެއްވަމުން އަސްލަމް ވިދާޅުވީ އެމައްސަލައަކީ ހައުސިންގ މިނިސްޓްރީގެ މަސްއޫލިއްޔަތުތަކުގެ ތެރޭގައި ހިމެނޭ ކަމެއް ނޫން ކަމަށެވެ. އެހިސާބަށް މިނިސްޓަރު ވިދާޅުވުމާ އެކު ޖާބިރު ވަނީ މަޖިލިސް ތަޅުމުގައި އަޑުގަދަކުރައްވަން ފައްޓަވައިފައެވެ. މިނިސްޓަރުގެ ވާހަކަ ހުއްޓަވައިލެއްވި ނަމަވެސް ޖާބިރު ވިދާޅުވަމުން ގެންދެވީ ތިނަދޫގައި ހިންގީ ބޮޑު ބަޣާވާތެއް ކަމަށާއި އެ ރަށުން ބޭލި ރައްޔިތުންނަށް އިންސާފު ލިބެންޖެހޭ ކަމަށެވެ.
ޖާބިރު ވިދާޅުވަމުން ގެންދެވީ ރައްޔިތުންގެ މަޖިލީހުން ޕްލޭނިންގ މިނިސްޓަރާ ސުވާލު ކުރެއްވުމުން ޖަވާބު ދެއްވަން ޖެހިވަޑައިގަންނަވާނެ ކަމަށެވެ. މިހާ ހިސާބުން މަޖިލިސް ރައީސް މުހައްމަދު ނަޝީދު ވަނީ މިނިސްޓަރު އުޅުއްވަނީ މެމްބަރުގެ ސުވާލަށް ޖަވާބު ނުދެއްވަން ނޫން ކަމަށާއި އެހެން ނަމަވެސް ކުރެއްވި ސުވާލަކީ ޕްލޭނިންގ މިނިސްޓްރީގެ މަސްއޫލިއްޔަތުތަކުގެ ތެރޭގައި ހިމެނޭ ޒާތުގެ ކަމެއް ނޫން ކަމަށެވެ. ނަޝީދު ވަނީ ފުރުސަތު ނުދެއްވަނީސް ވާހަކަ ނުދެއްއްކެވުމަށް ޖާބިރު އަރިހުގައި އެދިވަޑައިގެންފައެވެ.
ދެވަނަ ސުވާލެއްގެ ގޮތުން ޖާބިރު އެއްސެވީ ހުވަދޫ އަތޮޅުގައި އަޅަން ހަމަޖެހިފައިވާ ބްރިޖާ ގުޅޭ ގޮތުންނެވެ. އެހެން ނަމަވެސް މިސުވާލަށް ވެސް މިނިސްޓަރު ޖަވާބު އަރުވައިފައެއް ނުވެއެވެ.
ޖާބިރުގެ ވާހަކަފުޅުގައި ހުތުރު ބަހުން މިނިސްޓަރާ މުހާތަބު ކުރެއްވުމުން ހެންވޭރު ދެކުނު ދާއިރާގެ މެމްބަރު ހުސައިން ޝަހީމް ވިދާޅުވީ މިނިސްޓަރަކު މަޖިލީހަށް ވަޑައިގެންނެވުމުން މިނިސްޓަރާ މުހާތަބުކޮށް "ކުއްތާ"އަށް ގޮވުމަކީ މަޖިލިސް ގަވާއިދާ ހިލާފުވެ މަޖިލީހުގެ ހުރުމަތް ކަނޑައިލުން ކަމަށެވެ.
މިކަން މަޖިލީހުގެ ރައީސްގެ ސަމާލުކަމަށް ގެންނެވުމުން މަޖިލިސް ރައީސް ވިދާޅުވީ ފުރުސަތު ނުދެއްވަނީސް ހަޑިހުތުރު ބަހުން މުއާމަލާތް ކުރުމަކީ ކޮށްގެންވާނެ ކަމެއް ނޫން ކަމަށެވެ. އެހެން ނަމަވެސް ފުރުސަތު ނުދެއްވަނީސް ދައްކާ އެއްވެސް ވާހަކައެއް ޖަލްސާގެ ޔައުމިއްޔާއަށް ނާރާނެކަމަށް ވެސް ނަޝީދު ވިދާޅުވިއެވެ.
