މި އަހަރު ރާއްޖެ އައި ފަތުރުވެރިންގެ އަދަދު 1.1މިލިއަނަށް ވުރެ މައްޗަށް
މި އަހަރު ރާއްޖެއަށް ޒިޔާރަތް ކުރި އަދަދު 1.1 މިލިއަނަށް ވުރެ މައްޗަށް އަރައިފިއެވެ.
ޓުރިޒަމް މިނިސްޓްރީން އެންމެ ފަހުން އާންމު ކުރި ތަފާސް ހިސާބުތަކުން ދައްކާ ގޮތުގައި މި ހިނގައި ނޮވެމްބަރު މަހުގެ 24ވަނަ ދުވަހުގެ ނިޔަލަށް ރާއްޖެއަށް ވަނީ 1،126،539 ފަތުރުވެރިން ޒިޔާރަތްކޮށްފައެވެ.
އެ ގޮތުން ދުވާލެއްގެ މައްޗަށް 3،435 ފަތުރުވެރިން ރާއްޖެއަށް ޒިޔާރަތް ކުރާއިރު އެމީހުން އާންމު ގޮތެއްގައި ރާއްޖޭގައި މަޑުކުރަނީ 8 ދުވަހު ކަމަށް ވެސް ތަފާސްހިސާބުތަކުން ހާމަވެއެވެ. މި މަހު ރާއްޖެއައި ފަތުރުވެރިންގެ އަދަދަކީ 113،611 އެވެ.
މި އަހަރު ނިމުމުގެ ކުރިން ރާއްޖެއަށް އެއް މިލިއަން ފަތުރުވެރިން އަންނާނެ ކަމަށް، މި އަހަރަށް އަމާޒުކޮށް އާންމުކުރި ބަޖެޓުގައި ހިމަނައިފައިވެއެވެ. އެހެން ނަމަވެސް އެކި ގައުމުތަކުގައި ވެކްސިން ދޭން ފެށުމާ އެކު އެ ޓާގެޓަށް ބަދަލު ގެނެސް، 1.5 މިލިއަން ފަތުރުވެރިންގެ ޓާގެޓަކަށް އަމާޒު ހިފިއެވެ.
ނަމަވެސް ދެކުނު އޭޝިއާގެ ޤައުމުތަކުން ރާއްޖެއަށް އަންނަ ދޮރުތައް ބަންދު ކުރުމުން، މި ޓާގެޓު އަނެއްކާ ވެސް މުރާޖާ ކުރަން ޖެހުނެވެ. މިހާރު ސަރުކާރުން އަމާޒު ކޮށްފައި ވަނީ 1.3 މިލިއަން ފަތުރުވެރިން މިއަހަރު ނިމުމުގެ ކުރިން ރާއްޖެއަށް ޒިޔާރަތް ކުރާނެ ކަމަށެވެ.
Ads by STO
