ބޭރުގެ އެހީއާ ނުލައި މަސްތުވާތަކެތީގެ ވަބާއިން ރާއްޖެ ސަލާމަތެއް ނުކުރެވޭނެ: ހަސަން ލަތީފް
ރާއްޖެއިން ބޭރުގެ ފަންނީ ބޭފުޅުންގެ އެހީއާ ނުލައި މަސްތުވާތަކެތީގެ ވަބާއިން ރާއްޖެ ސަލާމަތް ނުކުރެވޭނެކަމަށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވެއްޖެއެވެ.
ހޯމަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ވަނީ މަޖިލީހުގެ ޕެޓިޝަން ކޮމިޓީން ތައްޔާރުކުރި "ޗޭންޖް އެންޑީއޭ"ގެ ދިރާސާ ރިޕޯޓު ހުށަހަޅައިފައެވެ. އެ ރިޕޯޓަށް ވާހަކަ ދައްކަވަމުން ހަސަން ލަތީފު ވިދާޅުވީ ރިޕޯޓުގައި ފާހަގަކޮށްފައިވާ އެންމެ މުހިންމު އެއް ކަމަކީ މަސްތުވާތަކެތީގެ ވަބާގައި ޖެހިފައިވާ ޒުވާނުންނަށް ފަރުވާ ދިނުމުގެ އުސޫލަށް ބަދަލުތަކެއް ގެންނަންޖެހޭ ކަމެވެ. އެކަން ކުރުމަށް ރާއްޖޭގައި ފަންނީ މީހުން ނެތް ކަމަށާއި އެހެންކަމުން ރާއްޖެއިން ބޭރުން ފަންނީ މާހިރުން ގެންނަންޖެހޭކަމަށް ވެސް ހަސަން ލަތީފު ވިދާޅުވިއެވެ.
"އަޅުގަނޑުމެންގެ ރާއްޖޭގައި ނެތް ފަންނެއް، ނެތް ތަޖުރިބާއެއް އަޅުގަނޑުމެން އަބަދުވެސް ހޯދަންޖެހޭނީ ރާއްޖެއިން ބޭރުން ، އިއްޒަތްތެރި ރައީސް. ރާއްޖެއިން ބޭރުގެ ފަންނީ ތަޖުރިބާކާރު މާހިރުންގެ އެހީއާ އެކީގައި ނޫނީ ދެނެއް އަޅުގަނޑުމެންނަށް މި ރާއްޖެ ސަލާމަތެއް ނުކުރެވޭނެ" ހަސަން ލަތީފު ވިދާޅުވިއެވެ.
މަސްތުވާތަކެއްޗަކީ ގްރާމުން ބޭނުންކުރާ އެއްޗެއް ނަމަވެސް ރާއްޖެއަށް މަސްތުވާތަކެތި އެތެރެކުރަނީ 150 ކިލޯއިން 100 ކިލޯއިން ކަމަށް ހަސަން ލަތީފު ވިދާޅުވިއެވެ. 1970ގެ ފަހުކޮޅުގައި ރާއްޖޭގައި މުޅިން އަލަށް މަސްތުވާތަކެތި އެތެރެކޮށް އެ ތަކެތީގެ ވިޔަފާރި ފެށި އިރާއި މިހާރާ އަޅާ ބަލާއިރު ވަރަށް ބޮޑަށް ހާލަތު ތަފާތު ވެއްޖެކަމަށް އޭނާ ވިދާޅުވިއެވެ. އެގޮތުން އޭރު ބޭނުންކުރަމުން އައި މަސްތުވާތަކެތީގެ ބާވަތްތަކާއި، މިހާރު ބޭނުންކުރާ ބާވަތްތަކާއި ވަރަށް ބޮޑަށް ތަފާތު ކަމަށާއި، މަސްތުވާތަކެތި ބޭނުންކުރާ ގޮތާއި އޭގެން މީހުންނަށް ވާގޮތަށް ވެސް މިހާރު ބަދަލުތަކެއް އައިސްފައިވާކަމަށް މެމްބަރު ވިދާޅުވިއެވެ.
މިއީ މަސްތުވާތަކެތީގެ ވަބައިގައި ޖެހިފައިވާ ޒުވާނުންނަށް ފަރުވާ ދޭ އުސޫލުތަކަށް ބަދަލުގެންނަން ޖެހޭ އެންމެ ބޮޑު ސަބަބުކަމަށް ވެސް ހަސަން ލަތީފުގެ ވާހަކަފުޅުގައި ވިދާޅުވިއެވެ. މީގެ އިތުރުން ސްކޫލުތަކާއި ޔުނިވަސިޓީތަކުގައި މަސްތުވާތަކެއްޗާ ދެކޮޅަށް ހާއްސަ ޕްރޮގުރާމުތަކެއް ފަށަން ޖެހިފައިވާކަން ވެސް މެމްބަރުގެ ވާހަކަފުޅުގައި ވިދާޅުވިއެވެ.
"ގައުމީ ކެމްޕެއިނެއް ހިންގަން ޖެހޭ ، އިއްޒަތްތެރި ރައީސް. ހަމައެކަނި ތައުލީމީ މަންހަޖުގެ ތެރެއިން މަސްތުވާތަކެތި ސްކޫލު ދަރިވަރުންނަށް ކިޔައިދިނުމުގެ އިތުރުން ގައުމީ ކެމްޕެއިނެއްގެ ގޮތުގައި އެކަން ކުރަން އެބަޖެހޭ. ޓާގެޓެޑް ޕްރޮގުރާމްތަކެއް އެބަ ހިންގަންޖެހޭ" ޑްރަގް އެޑިއުކޭޝަން ދިނުމުގެ ޕްރޮގުރާމްތަކެއް ފެއްޓެވުމާ ގުޅޭގޮތުން ހަސަން ލަތީފު ވިދާޅުވިއެވެ.
މެމްބަރު ވިދާޅުވީ މަސްތުވާތަކެތީގެ ވިޔަފާރީގައި ބިދޭސީން އިސްކޮށް އުޅޭކަން ފާހަގަކުރެވިފައިވާ ކަމަށެވެ. އޭނާ ވަނީ އެ ބިދޭސީން ޑީޕޯޓުކޮށް ނުލެވޭ ސަބަބާ މެދު ސުވާލު އުފައްދަވައިފައެވެ. އެކަން ރިޕޯޓުގައި ހުށަހަޅައިފައިވާތީ ހަސަން ލަތީފު ވަނީ އެކަމަށް ތާއީދު ކުރައްވައިފައެވެ. އަދި ވިދާޅުވީ މަސްތުވާތަކެތި ހުއްޓުވުމަށް ސަރުކާރުން ގެންގުޅޭ ސިޔާސަތަށް ވެސް ބޮޑު ބަދަލެއް ގެންނަން ޖެހޭ ކަމަށެވެ. އެހެންކަމުން މައްސަލައަށް ޖުމްލަ ހައްލެއް ހޯދުމަށް ޑްރޯވިން ބޯޑާ ހަމައަށް އަލުން ދާންޖެހޭ ކަމަށް މެމްބަރު ވަނީ ގޮވައިލައްވައިފައެވެ.
ޚާއްސަކޮށް އިންޑިއާގެ އެހީއާ ނުލައި ފޮޑިއެއްވެސް ނުޖެހޭނެ ދެއްތޯ؟ ހަސަންކޯ އަށް ހިގަންވެސް އިންޑިއާގެ އެހީ ބޭނުންވޭ.
ތިޔަކަން ހުއްޓުވާކަށް ބޭރުގެ އެއްވެސް އެހީއެއް ބޭނުމެއް ނުވޭ.ޢުމަރު ނަސީރާ ހަވާލު ކުރޭ.އެއީ ޙައްލަކީ.
ކުފޫހަމަނުވައްޔާ ވާނީއެހެން ތިމާބޭކާރު މީހަކަނވުން