ކާމިޔާބު ލިބުނަސް ޝަރުއީ ދާއިރާގައި ހައްލު ކުރަން ޖެހޭ ބޮޑެތި މައްސަލަތައް އެބަހުރި: ވަކީލުން
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ކްރިމިނަލް ކޯޓުން 2019 ވަނަ އަހަރު އިއްވި ހުކުމުން ސަލާމަތްވެ މިވަގުތަށް ކާމިޔާބު ލިބުނު ނަމަވެސް، ރާއްޖޭގެ ޝަރުއީ ދާއިރާގައި އިސްލާހުކުރަން ޖެހޭ ބޮޑެތި މައްސަލަތައް އަދިވެސް އެބަހުރި ކަމަށް އެމަނިކުފާނުގެ ގާނޫނީ ވަކީލުންގެ ޓީމުން ވިދާޅުވެއްޖެއެވެ.
ރައީސް ޔާމީންގެ ޤާނޫނީ ވަކީލުންގެ ޓީމުން މިއަދު ބޭއްވި ނޫސްވެރިންގެ ބައްދަލުވުމެއްގައި، އެ ޓީމުގައި އެންމެ އިސްކޮށް ހަރަކާތްތެރިވާ ކުރީގެ ނައިބު ރައީސް ޑރ. މުޙައްމަދު ޖަމީލު އަހުމަދު ވިދާޅުވީ ރައީސް އިބްރާހިމް މުޙައްމަދު ޞާލިޙަށް ގިނަ ބަޔަކު ވޯޓު ދިނީ ވަރަށް ގިނަ ކަންކަން އިސްލާހުކުރާނެ ކަމަށް ވެވަޑައިގަތް ވައުދާ އެކުގައި ކަމަށެވެ. އޭގެ ތެރޭއިން އެންމެ މުހިންމު އެއް ވައުދަކީ ޖުޑިޝަލް ސާވިސް ކޮމިޝަން (ޖޭއެސްސީ) އިސްލާހު ކުރުން ކަމަށް ވިދާޅުވިއެވެ.
ނަމަވެސް މިއަދާ ހަމައަށް ވެސް އެ މަސައްކަތް ކުރެވިފައި ނުވާ ކަމަށާއި، ކުރީގެ ރައީސް މުޙައްމަދު ނަޝީދާއި ސިޔާސީ ބޭފުޅުން ކަމުގައިވާ ހިސާން ހުސައިން ފަދަ ބޭފުޅުން އެ ތަނުގައި ތިއްބެވިހާ ހިނދަކު އެތަން އިސްލާހު ނުކުރެވޭނެ ކަމަށް ވެސް ޑރ. ޖަމީލު ވިދާޅުވިއެވެ.
"އަޅުގަނޑުމެން އަބަދުވެސް މަސައްކަތްކުރަނީ ގާނޫނުން ދީފައި ހުރި ރައްކާތެރިކަން ހޯދަން. އެއްވެސް އިރެއްގައި ރާއްޖޭގެ ކޯޓުތަކަށް އިތުރުބާރު ނުކުރަނީއެއް ނޫން. މި ރާއްޖޭގައި ހުންނަނީ ސަރުކާރުގެ ޕްރޮސިކިއުޓަރެއް. އެއީ ދައުލަތުގެ ޕްރޮސެކިއުޓަރެއް ނޫން،" ޑރ. ޖަމީލް ވިދާޅުވިއެވެ.
ޑރ. ޖަމީލު އިތުރަށް ވިދާޅުވީ ރައީސް ޔާމީންގެ މައްޗަށް ގާނޫނާ ހިލާފަށް ތަހުގީގެއް ހިންގައި ދައުވާ އުފުލައިފައި ވަނީ ސަރުކާރުން އަންގައިގެން ކަމަށެވެ.
Ads by STO
