18 ކިލޯ ޑްރަގް މައްސަލައިގައި ހައްޔަރުކުރި އެކަކު ދޫކޮށްލައިފި
18.8 ކިލޯގެ ކޮކެއިން ފޮރުވައިގެން ރާއްޖެ ގެނައި މައްސަލައިގައި ހައްޔަރުކުރި ބްރެޒިލްގެ ދެ މީހުންގެ ތެރެއިން އަންހެން މީހާ ބަންދުން ދޫކޮށްލައިފިއެވެ.
ލަގެޖުގައި ފޮރުވައިގެން ރާއްޖެއަށް 18 ކިލޯއަށް ވުރެ ގިނަ މަސްތުވާތަކެތި އެތެރެކޮށްފައި ވަނީ މިދިޔަ މަހުގެ 2 ވަނަ ދުވަހުއެވެ. އެ މައްސަލައިގައި ވެލާނާ އިންޓަނޭޝަލް އެއާޕޯޓް (ވީއައިއޭ)އިން ހައްޔަރުކުރީ 37 އަހަރުގެ އަންހެނަކާއި 28 އަހަރުގެ ފިރިހެނެކެވެ. ދެ މީހުންނަކީ ވެސް ބްރެޒިލަށް ނިސްބަތްވާ ދެ މީހުންނެވެ.
މަސްތުވާތަކެތި ކަމަށް ޝައްކުކުރެވޭ އެއްޗެހި ފެނުނީ ފިރިހެން މީހާގެ ލަގެޖުންނެވެ. އޭނާއާ އެކު ދަތުރުކުރި އޭނާގެ ލޯބިވެރިޔާ ބުނީ، ލަގެޖުގައި މަސްތުވާތަކެތި ހުރިކަން ނޭނގޭ ކަމަށެވެ.
އެ ދެމީހުންގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން ކޯޓުން ވަނީ ޝަރުތަކާ ނުލައި އަންހެން މީހާ ދޫކޮށްލަން އަމުރުކޮށްފައެވެ. އޭނާ ބަންދުގައި ހުންނަތާ 29 ދުވަސް ވަނީ ވެފައެވެ.
ކްރިމިނަލް ކޯޓުގައި މައްސަލަ ބެއްލެވި ގާޒީ އަލީ ނަދީމް ވިދާޅުވީ، މީހެއްގެ އަތުގައި މަސްތުވާތަކެތި ހުރިކަމަށް ބެލޭނީ ދެ އުންސުރެއް ފުރިހަމަވެގެން ކަމަށް މަސްތުވާތަކެތީގެ ގާނޫނު ބުނާ ކަމަށާއި ނަމަވެސް މި މައްސަލައިގައި އޭގެން އެއްވެސް އުންސުރެއް ފުރިހަމަވި ކަމަށް ބަލާނެ ހެއްކެއް، ގަރީނާއެއް ނެތް ކަމަށެވެ.
Ads by STO
